An Ikatulong Surat ni Juan

1 Hali sa gurang na lalaki,* para ki Gayo, an namumutan, na tunay kong padangat.

2 Namumutan kong tugang, ipinapamibi ko na sa gabos na bagay lugod na padagos na magin marahay an saimong kamugtakan asin an saimong salud, arog kan kamugtakan mo* ngunyan. 3 Huli ta nag-ugma akong marhay kan may nagdigding mga tugang asin kan sabihon ninda an manungod sa pangangapot mo sa katotoohan, arog kan aram ko mismo, na padagos kang naglalakaw sa katotoohan.+ 4 Mayo nang mas makakapaugma sa sako* kisa kaini: an madangog ko na an sakuyang mga aki padagos na naglalakaw sa katotoohan.+

5 Namumutan kong tugang, ipinapahiling mo an kaimbudan mo sa mga ginigibo mo para sa mga tugang, maski duman sa mga bako mong kabisto.+ 6 Nagpatotoo sinda sa atubangan kan kongregasyon manungod sa saimong pagkamuot. Sa paghali ninda, tabi man na asikasuhon mo sinda sa paaging makakapaugma sa Diyos.+ 7 Huli ta nagduduman sinda sa manlain-lain na lugar para sa saiyang pangaran, na dai nag-aasang mag-ako nin ano man+ hali sa mga tawo kan mga nasyon. 8 Kaya may obligasyon kitang istimaron an mga arog ninda,+ tanganing kita magin mga kapwa ninda trabahador para sa katotoohan.+

9 May ipinadara akong surat sa kongregasyon, pero si Diotrefes, na gustong siya an pirming nangingibabaw sa saindo,+ habo niyang akuon na may paggalang+ an ano man na sabihon niyamo. 10 Kaya kun makadiyan ako, ihahayag ko an ginigibo niyang pagpalakop nin maraot na mga istorya* manungod sa samuya.+ Asin dai pa nakontento kaini, habo man niyang akuon na may paggalang an mga tugang;+ tapos idtong mga gustong akuon sinda, hinihinguwa niyang pugulan saka halion sa kongregasyon.

11 Namumutan kong tugang, dai mo pag-arugon an maraot, kundi arugon mo an marahay.+ An saro na naggigibo nin marahay naggikan sa Diyos.+ An saro na naggigibo nin maraot dai nakahiling sa Diyos.+ 12 Gabos sinda magayunon an sinasabi manungod ki Demetrio, asin pinapatunayan iyan kan pamumuhay niya kauyon kan katotoohan. Sa katunayan, pati kami nagpapatotoo manungod sa saiya, asin aram mo na totoo an sinasabi mi.

13 Dakul pa akong gustong isurat sa saimo, pero habo kong ipaagi pa iyan sa pansurat asin tinta. 14 Alagad naglalaom ako na mahiling taka sa dai na mahahaloy, asin maulay kita nin personal.

Mapasaimo lugod an katuninungan.

Kinukumusta ka kan mga amigo ta digdi. Ipaabot mo an sakong pangungumusta sa kada saro sa mga amigo ta diyan.