Bilang

20 Kan inot na bulan, an bilog na katiripunan kan mga Israelita nakaabot sa kaawagan nin Zin, asin nag-istar an banwaan sa Kades.+ Duman si Miriam+ nagadan asin ilinubong.

2 Mayo kaidto nin tubig para sa katiripunan,+ asin nagtiripon sinda laban ki Moises saka ki Aaron. 3 Iniriwal si Moises kan banwaan,+ asin pigparataraman: “Nagadan na lang kuta kami kan magkagaradan an samong mga tugang sa atubangan ni Jehova! 4 Ano ta dinara nindo sa kaawagan na ini an kongregasyon ni Jehova? Para digdi kami magadan saka an mga ataman ming hayop?+ 5 Asin ano ta ilinuwas nindo kami sa Ehipto tanganing darahon sa masakiton na lugar na ini?+ Dai makakatanom sa lugar na ini, asin mayo digding mabubuhay na puon nin higera, o ubas, o granada, saka mayo digdi nin maiinom na tubig.”+ 6 Dangan huminali si Moises saka si Aaron sa atubangan kan katiripunan* asin nagpasiring sa may entrada kan tolda nin pakipagtagbuan tapos suminubsob sinda sa daga, asin nahiling ninda an kamurawayan ni Jehova.+

7 Dangan sinabi ni Jehova ki Moises: 8 “Kuana an sugkod asin tipunon nindo ni Aaron na saimong tugang an katiripunan, asin sa atubangan ninda sabihan nindo an dakulang gapo na magtao iyan nin tubig. Makakapaluwas kamo nin tubig para sa sainda hali sa dakulang gapo, asin matatawan nindo nin maiinom na tubig an katiripunan asin an saindang mga ataman na hayop.”+

9 Kaya kinua ni Moises an sugkod sa atubangan ni Jehova,+ arog kan ipinagbuot Niya sa saiya. 10 Dangan tinipon ni Moises saka ni Aaron an katiripunan* sa atubangan kan dakulang gapo, asin sinabi niya sa sainda: “Magdangog kamo, kamong mga rebelde! Ano, gusto nindong magpaluwas kami nin tubig para sa saindo hali sa dakulang gapong ini?”+ 11 Dangan itinaas ni Moises an kamot niya asin duwang beses niyang pinukpok kan saiyang sugkod an dakulang gapo, asin buminulos an kadakul na tubig. Tapos nag-inom an katiripunan asin an saindang mga ataman na hayop.+

12 Paghaloy-haloy, sinabi ni Jehova ki Moises saka ki Aaron: “Huling dai kamo nagpahiling nin pagtubod sa sako asin dai nindo ako pinabanal sa atubangan kan banwaan nin Israel, bako kamo an madara sa katiripunan* na ini sa daga na itatao ko sa sainda.”+ 13 Iyan an tubig kan Meriba,*+ kun sain nakipag-iwal an mga Israelita ki Jehova, kaya pinatunayan niya sa sainda na banal siya.

14 Dangan hali sa Kades, nagsugo si Moises nin mga mensahero sa hadi kan Edom:+ “Ini an sabi kan tugang mong si Israel,+ ‘Aram mong marhay an gabos na kasakitan na inagihan mi. 15 Nagpasiring kaidto sa Ehipto an samong mga ama,+ asin nag-istar kami sa Ehipto nin dakul na taon,*+ asin pinasakitan kami kan mga Ehipsiyo pati an samong mga ama.+ 16 Kan huri, nag-agrangay kami ki Jehova,+ asin dinangog niya kami. Nagsugo siya nin anghel+ tapos ilinuwas kami sa Ehipto, asin uni kami ngunyan sa Kades, sarong siyudad na nasa linderos* kan saimong teritoryo. 17 Tugutan mo tabi kaming umagi sa saimong kadagaan. Dai kami maagi sa arin man na uma o ubasan, asin dai kami mainom sa arin man na bubon. Maagi kami sa Tinampo kan Hadi asin dai kami masiko sa tuo o sa wala sagkod na makalagbas kami sa saimong teritoryo.’”+

18 Alagad, nagsabi sa saiya an hadi kan Edom: “Dai ka puwedeng mag-agi sa samong teritoryo. Pag ginibo mo iyan, sasabaton taka na may darang espada.” 19 Nagsimbag sa saiya an mga Israelita: “Sa tinampo kami maagi, asin kun mag-inom kami saka an samong mga ataman na hayop kan tubig nindo, babayadan mi iyan.+ Makikiagi man sana kami sa saindo.”+ 20 Pero nagsabi siya: “Dai ka puwedeng mag-agi.”+ Kaya luminuwas an hadi kan Edom kaiba an dakula asin makusog na hukbo* para sabaton sinda. 21 Dai nagtugot an hadi kan Edom na mag-agi an Israel sa saiyang teritoryo; kaya, linikawan kan Israel an Edom.+

22 Naghali sa Kades an banwaan nin Israel, an bilog na katiripunan, asin nakaabot sa Bukid nin Hor.+ 23 Dangan sinabi ni Jehova ki Moises saka ki Aaron sa Bukid nin Hor na nasa may linderos kan Edom: 24 “Magagadan si Aaron asin ilulubong arog kan saiyang mga apuon.*+ Dai siya makakalaog sa daga na itatao ko sa mga Israelita, huling pareho nindong sinuway an sakong pagbuot may koneksiyon sa tubig kan Meriba.+ 25 Kuanon mo si Aaron asin an aki niyang si Eleazar asin darahon mo sinda sa itaas kan Bukid nin Hor. 26 Hubaon mo ki Aaron an saiyang gubing na pansaserdote+ asin isulot mo iyan ki Eleazar+ na aki niya, asin duman magagadan si Aaron.”*

27 Kaya ginibo ni Moises an ipinagbuot ni Jehova, asin nagtukad sinda sa Bukid nin Hor mantang nagmamasid an bilog na katiripunan. 28 Dangan hinuba ni Moises ki Aaron an gubing na pansaserdote asin isinulot iyan sa aki kaining si Eleazar. Pagkatapos kaiyan, nagadan si Aaron duman sa itaas kan bukid.+ Dangan nagbaba sa bukid si Moises saka si Eleazar. 29 Kan maaraman kan bilog na katiripunan na gadan na si Aaron, 30 aldaw+ na pigtangisan kan bilog na nasyon* nin Israel an pagkagadan ni Aaron.