Inot na Samuel

8 Kan gurang na si Samuel, ninombrahan niya an saiyang mga aking lalaki na magin mga hukom sa Israel. 2 An pangaran kan saiyang panganay Joel, asin an ikaduwa, Abias;+ mga hukom sinda sa Beer-sheba. 3 Alagad an mga aki niya dai naglakaw sa saiyang mga dalan; mas gusto kan mga ini an magganar sa madayang paagi,+ nag-aako sinda nin suhol,+ asin binibiribid ninda an hustisya.+

4 Pag-abot nin panahon, nagtiripon an gabos na kamagurangan kan Israel asin nagduman ki Samuel sa Rama. 5 Sinabi ninda sa saiya: “Hilinga, naggurang ka na, pero an mga aki mo dai naglalakaw sa mga dalan mo. Magnombra ka ngunyan para sa samo nin sarong hadi na magigin samuyang hukom arog kan sa gabos na iba pang mga nasyon.”+ 6 Alagad dai nagustuhan* ni Samuel an sinabi nindang: “Tawan mo kami nin sarong hadi na magigin samuyang hukom.” Dangan namibi si Samuel ki Jehova, 7 asin sinabi ni Jehova ki Samuel: “Magdangog ka sa gabos na sinasabi sa saimo kan banwaan; huli ta bako man ika an isinikwal ninda, kundi ako an isinikwal ninda bilang saindang hadi.+ 8 Ginigibo ninda an arog man sana kan ginibo ninda puon pa kan aldaw na iluwas ko sinda sa Ehipto sagkod sa aldaw na ini; pirmi ninda akong binabayaan+ asin naglilingkod sinda sa ibang mga diyos,+ asin iyan man an ginigibo ninda sa saimo. 9 Magdangog ka sa sainda. Pero dapat mo sindang seryosong patanidan; sabihon mo sa sainda kun ano an mga deretso kan hadi na mamamahala sa sainda na obligado nindang itao.”

10 Kaya gabos na sinabi ni Jehova, isinabi ni Samuel sa banwaan na naghahagad sa saiya nin sarong hadi. 11 Sinabi niya: “Ini an mga deretso kan hadi na mamamahala sa saindo na obligado nindong itao:+ Kukuanon niya an saindong mga aking lalaki+ asin ilalaag sinda sa saiyang mga karwahe+ asin gigibuhon niya sindang saiyang mga parakabayo,+ saka an iba papadalaganon niya sa inutan kan saiyang mga karwahe. 12 Asin matalaga siya para sa saiyang sadiri nin mga namamayo sa kada sangribo katawo,+ asin mga namamayo sa kada singkuwenta.+ An iba mag-aarado para sa saiya,+ mag-aani para sa saiya,+ asin magibo kan saiyang mga armas na panggiyera saka kagamitan para sa saiyang mga karwahe.+ 13 Kukuanon niya an saindong mga aking babayi asin gigibuhon na mga paratimpla nin panglahid,* mga paraluto, asin mga paragibo nin tinapay.+ 14 Kukuanon niya an pinakamarahay nindong mga uma, mga ubasan, saka mga tanuman nin olibo,+ asin itatao niya an mga iyan sa saiyang mga lingkod. 15 Kukuanon niya an ikasampulong kabtang kan mga inani nindo sa saindong mga uma saka mga ubasan, asin itatao niya an mga iyan sa mga opisyal kan saiyang palasyo saka sa saiyang mga lingkod. 16 Asin kukuanon niya an saindong mga uripon na lalaki asin babayi, saka an pinakamarahay sa saindong mga baka, pati an saindong mga asno, asin gagamiton niya an mga iyan sa saiyang mga patrabaho.+ 17 Kukuanon niya an ikasampulong kabtang kan saindong mga karnero,+ asin kamo magigin mga lingkod niya. 18 Maabot an aldaw na maagrangay kamo dahil sa hadi na saindong pinili,+ pero dai kamo sisimbagon ni Jehova sa aldaw na iyan.”

19 Alagad, dai pig-iintindi kan banwaan an mga sinasabi ni Samuel sa sainda, asin nagsarabi sinda: “Dai, desidido kaming magkaigwa nin hadi. 20 Dangan magigin arog kami kan gabos na iba pang mga nasyon, asin an hadi mi an magigin samuyang hukom saka papanginutan niya kami asin makikilaban siya sa samong mga kalaban.” 21 Pagkatapos na madangog ni Samuel an gabos na sinabi kan banwaan, inutro niya an mga iyan ki Jehova. 22 Sinabi ni Jehova ki Samuel: “Magdangog ka sa sainda. Magnombra ka nin hadi na mamamahala sa sainda.”+ Dangan sinabi ni Samuel sa mga lalaki kan Israel: “Magbaralik na kamo sa kanya-kanya nindong siyudad.”