Hukom

6 Alagad ginibo na naman kan mga Israelita an maraot sa paghiling ni Jehova,+ kaya itinao sinda ni Jehova sa kamot kan Midian sa laog nin pitong taon.+ 2 Dinaog-daog kan Midian an Israel.+ Dahil sa Midian, naggiribo an mga Israelita nin mga taguan ninda* sa mga bukid, sa mga kuweba, asin sa mga lugar na masakit madumanan.+ 3 Pag nagsabwag nin banhi an Israel, sinasalakay sinda kan Midian saka kan Amalek+ asin kan mga taga Sirangan.+ 4 Nagkakampo sinda para salakayon an Israel asin rinaraot ninda an mga pananom sagkod sa Gaza, asin mayo sindang itinatadang kakanon o karnero o baka o asno para sa Israel.+ 5 Huli ta minaabot sinda dara an saindang mga ataman na hayop saka mga tolda, asin kasingdakul sinda kan mga duron.+ Dai sinda mabilang sa kadakulan pati an saindang mga kamelyo,+ asin minaabot sinda sa daga kan Israel para rauton iyan. 6 Kaya nagin tios na marhay an Israel dahil sa Midian; asin an mga Israelita nag-apod ki Jehova para maghagad nin tabang.+

7 Kan mag-apod an mga Israelita ki Jehova para maghagad nin tabang dahil sa Midian,+ 8 nagsugo si Jehova sa mga Israelita nin sarong propeta na nagsabi sa sainda: “Ini an sinabi ni Jehova na Diyos kan Israel, ‘Dinara ko kamo digdi hali sa Ehipto, kun sain kamo nagin mga uripon.*+ 9 Kaya ilinigtas ko kamo sa kamot kan Ehipto saka sa gabos na nang-aapi sa saindo, asin pinalayas ko sinda sa saindong atubangan, tapos itinao ko sa saindo an saindang daga.+ 10 Asin sinabi ko saindo: “Ako si Jehova na saindong Diyos.+ Dai kamo matakot sa mga diyos kan mga Amorita na an daga iyo an pig-iistaran nindo.”+ Pero dai kamo nagsunod sako.’”*+

11 Dai nahaloy, nag-abot an anghel ni Jehova+ asin nagtukaw sa sirong kan dakulang kahoy sa Ofra, na sadiri ni Joas na Abi-ezrita.+ An aki niyang si Gideon+ nagrarapas kaidto nin trigo sa pugaan nin ubas tanganing dai iyan mahiling kan Midian. 12 Nagpahiling sa saiya an anghel ni Jehova asin nagsabi: “Nasa kaibanan mo si Jehova,+ ika na matibay na parapakilaban.” 13 Huli kaini, nagsabi si Gideon sa saiya: “Pasensiya na po, kagurangnan ko, pero kun nasa kaibanan mi si Jehova, ano ta nangyari samo an gabos na ini?+ Hain na an gabos na makangangalas na mga bagay na ginibo niya na inistorya sa samo kan samuyang mga ama,+ na sinasabi, ‘Bakong ilinuwas kita ni Jehova sa Ehipto?’+ Pinabayaan na kami ngunyan ni Jehova+ asin itinao sa kamot kan Midian.” 14 Nag-atubang sa saiya si Jehova asin nagsabi: “Sige na, gamiton mo an kusog na yaon saimo, asin ililigtas mo an Israel sa kamot kan Midian.+ Bakong ako an nagsusugo saimo?” 15 Nagsimbag saiya si Gideon: “Pasensiya na po Jehova. Paano ko maililigtas an Israel? Hilinga! An angkan* ko an pinakamaluya sa tribo ni Manases, asin ako an pinakahamak sa pamilya kan sakuyang ama.” 16 Pero sinabihan siya ni Jehova: “Huling masasakaibanan mo ako,+ dadaugon mo an Midian na garo sana sinda sarong tawo.”

17 Dangan nagsabi si Gideon sa saiya: “Kun inuuyunan mo ako, tawan mo tabi ako nin tanda na ika talaga an nakikipag-ulay sako. 18 Dai ka tabi maghali digdi sagkod na makabalik ako dara an sakuyang regalo asin maiserbi ko iyan saimo.”+ Kaya nagsabi siya: “Dai ako mahali digdi sagkod na makabalik ka.” 19 Naghali si Gideon asin nagluto nin sarong ugbon na kanding saka naggibo nin tinapay na daing lebadura gamit an sarong epa* nin harina.+ Ilinaag niya an karne sa basket asin an sabaw sa kuron; tapos dinara niya an mga iyan sa saiya asin isinerbi sa saiya sa sirong kan dakulang kahoy.

20 Dangan sinabi saiya kan anghel kan tunay na Diyos: “Kuana an karne saka an tinapay na daing lebadura, tapos ibugtak mo iyan sa ibabaw kan dakulang gapo duman, asin iula mo diyan an sabaw.” Asin iyo iyan an ginibo niya. 21 Dangan inunat kan anghel ni Jehova an saiyang kamot asin dinutan niya kan puro kan sugkod na kapot niya an karne saka an tinapay na daing lebadura, asin biglang may kalayong luminaad hali sa gapo asin tinumtom kaiyan an karne saka an tinapay na daing lebadura.+ Pagkatapos, nawara an anghel ni Jehova. 22 Napag-isip-isip ngunyan ni Gideon na anghel idto ni Jehova.+

Tulos-tulos na suminabi si Gideon: “Hirak man sako, O Soberanong Kagurangnan* na Jehova, huli ta nahiling ko nin hampangan an anghel ni Jehova!”+ 23 Pero sinabi sa saiya ni Jehova: “Dai ka mahadit* asin dai ka matakot;+ dai ka magagadan.” 24 Kaya naggibo duman si Gideon nin altar para ki Jehova, asin inaapod iyan na Jehova-shalom*+ sagkod sa aldaw na ini. Yaon pa iyan sa Ofra, an siyudad kan mga Abi-ezrita.

25 Kan bangging iyan, sinabihan siya ni Jehova: “Kuanon mo an torilyong baka kan saimong ama, an ikaduwang torilyong baka na pitong taon na, asin gabaon mo an altar ni Baal na sadiri kan saimong ama, asin putulon mo an sagradong poste* na kataid kaiyan.+ 26 Asin maggibo ka nin altar para ki Jehova na saimong Diyos sa itaas kan kutang ini paagi sa paggibo nin sarong raya nin mga gapo. Pagkatapos kaiyan, kuanon mo su torilyong baka* asin iatang mo iyan diyan bilang dulot na pigtututong sa ibabaw kan mga panggatong na hali sa sagradong poste* na pinutol mo.” 27 Kaya nag-iba si Gideon nin sampulong lalaking lingkod niya, asin ginibo niya an sinabi saiya ni Jehova. Pero dahil sa sobrang takot niya sa pamilya kan saiyang ama asin sa mga lalaki kan siyudad, ginibo niya iyan nin banggi, imbes na aldaw.

28 Kinaagahan, pagmatang amay kan mga lalaki kan siyudad, nahiling ninda na gaba na an altar ni Baal asin putol na an sagradong poste* na kataid kaiyan asin nakaatang na su ikaduwang torilyong baka sa bagong gibong altar. 29 Nagharaputan sinda: “Siisay an naggibo kaini?” Pagkatapos nindang mag-imbestigar, sinabi ninda: “Si Gideon na aki ni Joas an may kagigibuhan kaini.” 30 Kaya sinabihan kan mga lalaki kan siyudad si Joas: “Iluwas mo an aki mo tanganing magadan siya, huling ginaba niya an altar ni Baal asin pinutol an sagradong poste* na kataid kaiyan.” 31 Nagsabi si Joas+ sa gabos na nagkumprontar sa saiya: “Kaipuhan daw nindong idepensa si Baal? Kaipuhan daw nindo siyang iligtas? An siisay man na magdepensa sa saiya dapat na gadanon ngunyan na aga.+ Kun diyos siya, di idepensa niya an sadiri niya,+ ta may naggaba kan altar niya.” 32 Asin inapod niyang Jerubaal* si Gideon kan aldaw na iyan, na sinasabi: “Pabayai si Baal na idepensa an sadiri niya, huling may naggaba kan altar niya.”

33 Pinagsararo kan bilog na Midian+ saka Amalek+ asin kan mga taga Sirangan an saindang puwersa;+ asin nagbalyo sinda sa salog pasiring sa Kababan* nin Jezreel asin nagkampo duman. 34 Dangan an espiritu ni Jehova uminabot* ki Gideon+ tapos pinatanog niya an hamudyong,+ asin nag-arabot an mga Abi-ezrita+ para suportaran siya. 35 Nagsugo siya nin mga mensahero sa bilog na tribo ni Manases, asin nag-arabot man sinda para suportaran siya. Nagsugo man siya nin mga mensahero sa tribo ni Aser, Zebulon, asin Neftali, asin nagduruman man sinda sa saiya.

36 Dangan sinabi ni Gideon sa tunay na Diyos: “Kun ililigtas mo an Israel paagi sa sako, arog kan ipinanuga mo,+ 37 mabugtak ako ngunyan nin barahibo nin karnero sa ginikan. Kun an barahibo sana an mabasa nin ambon* pero an daga sa palibot kaiyan mara, maaaraman ko na ililigtas mo an Israel paagi sa sako, arog kan ipinanuga mo.” 38 Asin iyo iyan an nangyari. Pagmata niyang amay kinaagahan, biniringan* niya an barahibo. An nabiring niya diyan na tubig igo para mapano an sarong dakulang mangko na pambangkete. 39 Alagad, sinabi ni Gideon sa tunay na Diyos: “Dai ka tabi maanggot sako; tugutan mo akong makiulay nin saro pang beses. Tugutan mo tabi akong gamiton an barahibong ini para sa saro pang pagbalo. Pangyarihon mo tabi na an barahibo na man an mara, pero an daga sa palibot kaini an mabasa nin ambon.” 40 Kaya iyan an ginibo nin Diyos kan bangging iyan; an barahibo sana an mara, pero an daga sa palibot kaiyan nabasa nin ambon.