Ikaduwang Cronica

1 Lalo pang kuminusog sa saiyang posisyon bilang hadi si Solomon na aki ni David, asin nasa kaibanan niya si Jehova na saiyang Diyos asin pinabantog Niya siyang marhay.+

2 Ipinaapod ni Solomon an bilog na Israel, an mga namamayo nin manangribo saka nin mananggatos, an mga hukom, asin an gabos na pamayo kan bilog na Israel, na mga pamayo nin mga angkan. 3 Dangan nagpasiring sa halangkaw na lugar sa Gibeon si Solomon saka an bilog na katiripunan.*+ Yaon kaya duman an tolda nin pakipagtagbuan* kan tunay na Diyos, an tolda na ginibo sa kaawagan kan lingkod ni Jehova na si Moises. 4 Alagad bago kaiyan, dinara kaidto ni David an Kaban kan tunay na Diyos hali sa Kiriat-jearim+ patukad sa lugar na ihinanda ni David para digdi; nagpatindog siya nin tolda sa Jerusalem para digdi.+ 5 Asin an altar na tanso+ na ginibo ni Bezalel+ na aki ni Uri na aki ni Hur ibinugtak sa atubangan kan tabernakulo ni Jehova; asin namimibi sa atubangan kaini* si Solomon saka an katiripunan. 6 Nag-atang diyan si Solomon nin mga dulot sa atubangan ni Jehova; nag-atang siya nin 1,000 dulot na pigtututong sa altar na tanso+ kan tolda nin pakipagtagbuan.

7 Kan bangging iyan, nagpahiling an Diyos ki Solomon asin sinabi sa saiya: “Hagadon mo kun ano an gusto mong itao ko saimo.”+ 8 Nagsimbag sa Diyos si Solomon: “Nagpahiling ka nin dakulang maimbod na pagkamuot sa sakong amang si David,+ asin ginibo mo akong hadi na kasalida niya.+ 9 Ngunyan, O Diyos na Jehova, magin totoo lugod an panuga mo ki David na sakong ama,+ huling ginibo mo akong hadi sa sarong banwaan na siring kadakul kan mga alpog sa daga.+ 10 Tawan mo tabi ako ngunyan nin kadunungan asin kaaraman+ tanganing mapanginutan ko an banwaan na ini,* huling siisay an makakapagserbing hukom sa saimong dakulang banwaan na ini?”+

11 Dangan sinabi nin Diyos ki Solomon: “Huling ini an mawot kan saimong puso asin dai ka naghagad nin mga pagsadiri, kayamanan, asin onra o na magadan an* mga naaanggot* sa saimo, ni naghagad ka nin halawig na buhay,* kundi naghagad ka nin kadunungan saka kaaraman tanganing makapagserbi ka bilang hukom sa sakong banwaan na sa sainda ginibo takang hadi,+ 12 tatawan taka nin kadunungan saka kaaraman; pero tatawan taka pa nin mga pagsadiri saka kayamanan asin onra na dai nakamtan kan mga hading nainot sa saimo asin dai makakamtan kan mga hading masurunod sa saimo.”+

13 Kaya hali sa atubangan kan tolda nin pakipagtagbuan na yaon sa halangkaw na lugar sa Gibeon,+ nagpasiring si Solomon sa Jerusalem; asin naghadi siya sa Israel. 14 Nagparatipon pa si Solomon nin mga karwahe saka mga kabayo.* Igwa siya nin 1,400 na karwahe asin 12,000 na kabayo,*+ asin ilinaag niya an mga iyan sa mga siyudad para sa mga karwahe+ asin sa Jerusalem harani sa hadi.+ 15 Huli sa ginibo kan hadi, nagin kasingdakul nin mga gapo an plata* asin bulawan sa Jerusalem,+ asin an mga sedro nagin kasingdakul kan mga puon nin sikomoro sa Sefela.+ 16 An mga kabayo ni Solomon binabakal hali sa Ehipto,+ asin grupo-grupo nin mga kabayo an binabakal kan mga negosyante kan hadi* sigun sa kantidad kan barakalan kaiyan.+ 17 An kantidad kan kada karwahe na binabakal sa Ehipto 600 na pidasong pirak, asin an sarong kabayo 150 pidasong pirak; dangan, ipinapabakal man ninda iyan sa gabos na hadi kan mga Hiteo saka sa mga hadi kan Siria.