Ikaduwang Cronica

6 Sinabi ni Solomon kan pagkakataon na iyan: “Sinabi mo Jehova na mag-iirok ka sa mahibog na maitom na mga panganuron.+ 2 Nakapagtugdok na ako nin kahanga-hangang harong para saimo, sarong permanenteng lugar na saimong maiirukan sagkod lamang.”+

3 Dangan uminatubang an hadi asin binendisyunan an bilog na katiripunan* nin Israel mantang nakatirindog sinda.+ 4 Sinabi niya: “Pag-umawon lugod si Jehova na Diyos kan Israel, na nanuga* ki David na sakong ama asin paagi kan saiya mismong mga kamot inutob niya ini, na nagsasabi, 5 ‘Puon kan aldaw na iluwas ko sa daga nin Ehipto an banwaan ko, mayo akong piniling sarong siyudad sa gabos na tribo kan Israel tanganing tugdukan nin harong na diyan magdadanay an sakong pangaran,+ asin mayo man akong piniling sarong tawo tanganing magin lider kan banwaan kong Israel. 6 Pero ngunyan, pinili ko an Jerusalem+ tanganing diyan magdanay an sakong pangaran, asin pinili ko si David para mamahala sa banwaan kong Israel.’+ 7 Asin mawot kan puso ni David na sakong ama na magtugdok nin harong para sa pangaran ni Jehova na Diyos kan Israel.+ 8 Alagad sinabi ni Jehova ki David na sakong ama, ‘Mawot kan saimong puso na magtugdok nin harong para sa sakong pangaran; marahay nanggad na minawot mo ini sa saimong puso. 9 Pero, bako ika an matugdok kan harong, kundi an saimong aki na mamumundag sa saimo.* Siya an matugdok kan harong para sa sakong pangaran.’+ 10 Inutob ni Jehova an saiyang ipinanuga, huling ako an nagsalida ki David na sakong ama asin nagtukaw ako sa trono kan Israel,+ siring kan ipinanuga ni Jehova.+ Naitugdok ko man an harong para sa pangaran ni Jehova na Diyos kan Israel, 11 asin diyan ko ibinugtak an Kaban kun sain nakalaag an tipan+ na ipinakipagtipan ni Jehova sa banwaan nin Israel.”

12 Dangan nagtindog siya sa atubangan kan altar ni Jehova, sa atubangan kan bilog na katiripunan nin Israel, asin itinaas niya an saiyang mga kamot na nakabuka an mga palad.+ 13 (Naggibo kaya si Solomon nin sarong entablado na gibo sa tanso, asin ipinuwesto niya iyan sa tahaw kan patyo.*+ Limang maniko* an laba kaiyan, limang maniko an lakbang, saka tulong maniko an langkaw; asin nagtindog siya sa ibabaw kaiyan.) Asin nagluhod siya sa atubangan kan bilog na katiripunan* nin Israel, asin itinaas niya pasiring sa langit an saiyang mga kamot na nakabuka an mga palad,+ 14 asin sinabi niya: “O Jehova na Diyos kan Israel, mayo nin Diyos na arog saimo sa kalangitan o sa daga, na inuutob an tipan asin nagpapahiling nin maimbod na pagkamuot sa saimong mga lingkod na naglalakaw sa atubangan mo nin bilog nindang puso.+ 15 Inutob mo an saimong ipinanuga sa saimong lingkod na si David na sakong ama.+ Ika mismo an nanuga kaini, asin ngunyan na aldaw inutob mo iyan paagi kan sadiri mong kamot.+ 16 Asin ngunyan, O Jehova na Diyos kan Israel, utuba an saimong ipinanuga sa lingkod mong si David na sakong ama kan ika magsabi: ‘Kun tatawan nin atensiyon kan saimong mga aking lalaki an saindang dalan paagi sa paglakaw sa sakuyang katugunan, arog kan paglakaw mo sa sakuyang atubangan, pirming igwa nin saro sa saimong mga gikan na matukaw sa atubangan ko sa trono kan Israel.’+ 17 Asin ngunyan, O Jehova na Diyos kan Israel, lugod na magkatotoo an ipinanuga mo sa saimong lingkod na si David.

18 “Alagad, talaga daw na mag-iirok sa daga an Diyos kaiba kan katawuhan?+ Kun sa langit ngani mismo, iyo, sa langit kan mga langit, dai ka magkaigo,+ di lalo na sa harong na ini na itinugdok ko!+ 19 O Jehova na sakuyang Diyos, tawi tabi nin atensiyon an pamibi saka an pakimahirak kan saimong lingkod, asin danguga tabi an paghagad nin tabang saka an ipinapamibi kan saimong lingkod sa atubangan mo. 20 Lugod na nakabantay ka* sa harong na ini aldaw asin banggi tanganing magdangog sa mga pamibi kan saimong lingkod na ipinapamibi niya paatubang sa direksiyon kan lugar na ini na sinabi mong diyan mo ibubugtak an saimong pangaran.+ 21 Asin danguga tabi an mga pakiulay kan saimong lingkod para maghagad nin tabang asin an mga pakiulay kan saimong banwaan na Israel pag namimibi sinda paatubang sa direksiyon kan lugar na ini,+ asin magdangog ka lugod hali sa iniirukan mo, hali sa kalangitan;+ iyo, lugod na magdangog ka asin magpatawad.+

22 “Kun an sarong tawo inakusaran na nagkasala sa saiyang kapwa, tapos pinasumpa* siya kan nag-akusar sa saiya, asin huli sa saiyang isinumpa magdigdi siya sa atubangan kan saimong altar sa harong na ini,+ 23 magdangog ka lugod hali sa kalangitan asin humiro ka asin husgaran mo an saimong mga lingkod. Papagbayadon mo an saro na maraot asin padusahan mo siya sigun sa ginibo niyang karatan.+ Asin ipahayag mong daing sála* an saro na matanos asin tawan mo siya nin balos sigun sa saiyang katanusan.+

24 “Asin kun madaog kan saindang kalaban an saimong banwaan na Israel huling pirmi sindang nagkakasala saimo,+ asin nagbalik sinda asin pinamuraway an saimong pangaran+ tapos namibi+ saka nakimahirak sinda sa atubangan mo sa harong na ini,+ 25 magdangog ka tabi hali sa kalangitan+ asin patawadon mo an kasalan kan saimong banwaan na Israel asin ibalik mo sinda sa daga na itinao mo sa sainda asin sa saindang mga apuon.+

26 “Pag masarahan an langit asin dai mag-uran+ huling pirmi sindang nagkakasala saimo,+ asin namibi sinda paatubang sa direksiyon kan lugar na ini asin pinamuraway an saimong pangaran asin nagsurulsol sinda sa saindang kasalan huling pinadusahan* mo sinda,+ 27 magdangog ka tabi hali sa kalangitan asin patawadon mo an kasalan kan saimong mga lingkod, kan saimong banwaan na Israel, huling itutukdo mo sa sainda an marahay na dalan na dapat nindang lakawan;+ asin magpauran ka+ sa daga na itinao mo sa saimong banwaan bilang pamana.

28 “Kun magkaigwa nin tiggutom sa nasyon,+ o nin sarong epidemya,+ pagkaalang huli sa mainit na duros, alamag,+ mahibog na panganuron nin mga duron, o mga duron* na daing kabasugan;+ o kun salikupan sinda kan saindang mga kalaban sa arin man na siyudad sa nasyon*+ o kun magkaigwa nin ano man na klase nin damat o hilang,+ 29 ano man na pamibi,+ ano man na pakimahirak+ an tibaad gibuhon nin siisay man na tawo o kan bilog mong banwaan na Israel (huling aram kan kada saro sa sainda an sadiri niyang pagsakit* asin an sadiri niyang kulog)+ pag inunat ninda pasiring sa harong na ini an saindang mga kamot na nakabuka an mga palad,+ 30 magdangog ka lugod hali sa kalangitan, na saimong irukan,+ asin magpatawad ka lugod;+ asin tawan mo nin balos an lambang saro sigun sa gabos niyang gibo, huling aram mo an saiyang puso (ika sana an talagang nakakaaram sa puso nin tawo),+ 31 tanganing magkaigwa sinda nin pagkatakot sa saimo asin maglakaw sa saimong mga dalan sa gabos na aldaw na sinda nabubuhay sa daga na itinao mo sa samong mga apuon.

32 “Asin kun manungod man sa taga ibang nasyon na bakong kabtang kan saimong banwaan na Israel na nagpasiring digdi hali sa harayong lugar huli sa saimong dakulang pangaran*+ asin sa makusog mong kamot saka nakaunat na takyag, asin nagdigdi siya asin namibi paatubang sa direksiyon kan harong na ini,+ 33 magdangog ka lugod hali sa kalangitan, na saimong irukan, asin gibuha an gabos na ipinakiulay sa saimo kan taga ibang nasyon, tanganing mamidbid kan gabos na tawo sa bilog na daga an saimong pangaran+ asin magkaigwa sinda nin pagkatakot sa saimo, arog kan saimong banwaan na Israel, asin tanganing maaraman ninda na an saimong pangaran yaon sa harong na ini na itinugdok ko.

34 “Kun an saimong banwaan magduman sa giyera laban sa saindang mga kalaban, sain man na lugar iyan,+ asin mamibi sinda+ sa saimo paatubang sa direksiyon kan siyudad na ini na saimong pinili asin kan harong na itinugdok ko para sa saimong pangaran,+ 35 danguga tabi hali sa kalangitan an saindang pamibi saka an saindang pakimahirak asin tawan mo sinda nin hustisya.+

36 “Kun magkasala sinda saimo (huling mayo nin tawo na dai nagkakasala),+ asin maanggot ka sa sainda asin pabayaan mo sindang madaog kan saindang mga kalaban, asin bihagon sinda kan saindang mga kalaban asin darahon sinda sa sarong daga, harayo man o harani,+ 37 asin makapag-isip-isip sinda sa daga kun sain sinda dinarang bihag, asin magbalik sinda saimo asin makimahirak saimo mantang nasa daga kun sain sinda bihag, na nagsasarabi, ‘Nagkasala kami asin naggibo nin sala; guminibo kami nin maraot,’+ 38 asin magbalik sinda sa saimo nin bilog na puso+ saka bilog na kalag* mantang nasa daga kun sain sinda dinarang bihag,+ asin mamibi sinda paatubang sa direksiyon kan saindang daga na itinao mo sa saindang mga apuon asin sa direksiyon kan siyudad na saimong pinili+ asin kan harong na itinugdok ko para sa saimong pangaran, 39 danguga tabi hali sa kalangitan, na saimong irukan, an saindang pamibi saka pakimahirak, asin tawan mo sinda nin hustisya+ asin patawadon mo an saimong banwaan na nagkasala saimo.

40 “Ngunyan, O sakuyang Diyos, lugod na magtao ka tabi nin atensiyon* asin magdangog* sa mga pamibi sa* lugar na ini.+ 41 Asin ngunyan, O Diyos na Jehova, magpasiring ka sa saimong irukan,+ ika asin an Kaban kan saimong kusog. O Diyos na Jehova, lugod na magubingan nin kaligtasan an saimong mga saserdote, asin lugod na mag-urugma huli sa saimong karahayan an mga maimbod sa saimo.+ 42 O Diyos na Jehova, dai mo isikwal an* saimong linahidan.*+ Lugod na girumdumon mo an saimong maimbod na pagkamuot ki David na saimong lingkod.”+