Ikaduwang Cronica

18 Dakula an nagin kayamanan asin kamurawayan ni Jehosafat,+ pero nakipag-alyansa siya ki Ahab+ paagi sa pakipag-aguman nin saro sa pamilya niya sa saro sa pamilya kaini. 2 Kaya pakalihis nin pirang taon, nagpasiring siya ki Ahab sa Samaria,+ asin nagbuno* si Ahab nin dakul na karnero saka baka para sa saiya asin para sa mga tawong kairiba niya. Asin dinagka* niya siya na magsalakay laban sa Ramot-gilead.+ 3 Dangan sinabi ni Hading Ahab kan Israel ki Hading Jehosafat kan Juda: “Maiba ka sako sa Ramot-gilead?” Nagsimbag siya sa saiya: “Ika asin ako saro sana, asin an saimong banwaan asin an sakong banwaan saro sana; susuportaran mi ika sa giyera.”

4 Alagad sinabi ni Jehosafat sa hadi kan Israel: “Maghapot nguna tabi kita kun ano an sasabihon ni Jehova.”+ 5 Kaya tinipon kan hadi kan Israel an mga propeta, 400 na lalaki, asin ihinapot sa sainda: “Makikigiyera kita sa Ramot-gilead o dai?” Nagsimbag sinda: “Sige, sumalakay ka huling itatao iyan kan tunay na Diyos sa kamot kan hadi.”

6 Dangan sinabi ni Jehosafat: “Mayo digding propeta si Jehova?+ Maghapot man kita paagi saiya.”+ 7 Kaya sinabi kan hadi kan Israel ki Jehosafat: “May saro pa+ na mahahaputan ta kun ano an sasabihon ni Jehova; pero anggot ako saiya, ta mayo man lamang siyang pigpropesiyang marahay na mga bagay manungod sa sako, pirmi na sanang maraot.+ Siya si Micaias na aki ni Imla.” Alagad sinabi ni Jehosafat: “Dai dapat nagtataram nin arog kaiyan an hadi.”

8 Kaya nagpaapod an hadi kan Israel nin sarong opisyal sa palasyo asin sinabihan ini: “Darahon mo tulos digdi si Micaias na aki ni Imla.”+ 9 An hadi kan Israel asin si Jehosafat na hadi kan Juda, na mga nakasulot nin badong panghadi, parehong nakatukaw sa saindang trono; nakatukaw sinda sa may ginikan na yaon sa may trangkahan kan Samaria, asin nagpopropesiya sa atubangan ninda an gabos na propeta. 10 Dangan si Zedekias na aki ni Kenaana naggibo nin sadiri niyang lansang na mga sungay asin nagsabi: “Ini an sabi ni Jehova, ‘Gamit an mga ini, susuagon* mo an mga Siriano sagkod na maubos mo sinda.’” 11 Arog man kaini an propesiya kan gabos na iba pang propeta. An sabi ninda: “Salakayon mo an Ramot-gilead asin manggagana ka;+ itatao iyan ni Jehova sa kamot kan hadi.”

12 Kaya an mensahero na nag-apod ki Micaias nagsabi sa saiya: “Hilinga! Pararehong magagayon an sinabi kan mga propeta sa hadi. Tabi na magin arog man lugod kan sa sainda an sabihon mo;+ magayon man an sabihon mo.”+ 13 Pero sinabi ni Micaias: “Isinusumpa ko sa ngaran kan buhay na Diyos na si Jehova, kun ano an sabihon kan sakong Diyos, iyan an sasabihon ko.”+ 14 Pag-abot niya sa hadi, hinapot siya kan hadi: “Micaias, makikigiyera kami sa Ramot-gilead o dai?” Tulos siyang nagsimbag: “Sige, sumalakay ka asin manggagana ka; itatao sinda sa saindong kamot.” 15 Huli kaini sinabi kan hadi sa saiya: “Pirang beses taka bayang dapat pasumpaon tanganing su totoo sana an sabihon mo sa sako sa ngaran ni Jehova?” 16 Kaya sinabi niya: “Nahihiling ko an gabos na Israelita na nagkakasuruway-suway sa ibabaw kan mga bukid na garo mga karnerong daing pastor.+ Nagsabi si Jehova: ‘Mayo nang kagurangnan an mga ini. Papulion nin may katuninungan sa harong ninda an kada saro.’”

17 Kaya sinabi kan hadi kan Israel ki Jehosafat: “Sabi ko na saimo, ‘Mayo siyang ipopropesiyang marahay na mga bagay manungod sa sako, puro sana maraot.’”+

18 Dangan sinabi ni Micaias: “Kun siring, danguga an mensaheng ini hali ki Jehova: Nahiling ko si Jehova na nakatukaw sa saiyang trono+ asin an bilog na hukbo kan kalangitan+ nakatindog sa saiyang tuo saka sa saiyang wala.+ 19 Tapos sinabi ni Jehova, ‘Siisay an maloko ki Hading Ahab kan Israel tanganing sumalakay siya asin magadan sa Ramot-gilead?’ Asin may sinabi an sarong anghel mantang iba man an sinabi kan saro pa. 20 Dangan sarong espiritu*+ an nagpainutan asin nagtindog sa atubangan ni Jehova asin nagsabi, ‘Ako an maloko saiya.’ Hinapot siya ni Jehova, ‘Paano mo iyan gigibuhon?’ 21 Nagsimbag siya, ‘Mahali ako asin magigin akong sarong espiritu na mapandaya sa nguso kan gabos niyang propeta.’ Kaya sinabi niya, ‘Sige, lokohon mo siya, asin magigin mapanggana ka. Maghali ka na asin gibuha iyan.’ 22 Kaya, nagbugtak si Jehova nin sarong espiritu na mapandaya sa nguso kan mga propeta mong ini,+ pero nagdesisyon na si Jehova na paabutan ka nin kapahamakan.”

23 Nagrani si Zedekias+ na aki ni Kenaana asin sinampaling+ si Micaias+ asin nagsabi: “Sain na dalan nag-agi an espiritu ni Jehova hali sako tanganing makipag-ulay saimo?”+ 24 Nagsimbag si Micaias: “Maghalat ka! Maaaraman mo kun sain na dalan pag nag-abot an aldaw na malaog ka sa pinakalaog na kuwarto tanganing magtago.” 25 Dangan sinabi kan hadi kan Israel: “Dakupon si Micaias asin darahon ki Amon na pamayo kan siyudad asin ki Joas na aki kan hadi. 26 Sabihan sinda, ‘Ini an sabi kan hadi: “Ipreso nindo an tawong ini+ asin tawan nindo siya nin diit sanang tinapay saka tubig sagkod na makabalik ako nin may katuninungan.”’” 27 Alagad sinabi ni Micaias: “Kun makabalik ka nin may katuninungan, buot sabihon dai nakipag-ulay sako si Jehova.”+ Dangan sinabi pa niya: “Kamo gabos, tandaan nindo an sinabi ko.”

28 Kaya sinalakay kan hadi kan Israel asin ni Jehosafat na hadi kan Juda an Ramot-gilead.+ 29 Sinabi kan hadi kan Israel ki Jehosafat: “Babaguhon ko an itsura ko tanganing dai ako mamidbid, asin maduman ako sa ralaban, pero ika, magsulot ka kan bado mong panghadi.” Kaya binago kan hadi kan Israel an saiyang itsura, asin nagduman sinda sa ralaban. 30 Ipinagbuot kan hadi kan Siria sa saiyang mga komandante kan mga karwahe: “Dai kamo makipaglaban sa kiisay man, sa suldados man o sa opisyal, kundi sa hadi sana kan Israel.” 31 Asin kan mahiling kan mga komandante kan mga karwahe si Jehosafat, naisip ninda: “Iyo idto an hadi kan Israel.” Kaya sinalakay ninda siya; asin nagkurahaw si Jehosafat tanganing magpatabang.+ Tinabangan siya ni Jehova, asin tulos sindang isinuki nin Diyos parayo sa saiya. 32 Kan mahiling kan mga komandante kan mga karwahe na bako siya an hadi kan Israel, tulos sindang nagpundo sa paglapag sa saiya.

33 Alagad may saro na nagpana asin natsambahan niyang tamaan* an hadi kan Israel sa sugpunan kan saiyang gubing na metal.* Kaya sinabi kan hadi sa nagpapadalagan kan saiyang karwahe: “Magpabirik ka na; irayo mo ako sa ralaban,* ta grabe an tama ko.”+ 34 Matindi an labanan kan bilog na aldaw na idto, asin kinaipuhan na patindugon sa karwahe an hadi kan Israel, paatubang sa mga Siriano sagkod magbanggi; asin nagadan siya pagsulnop kan aldaw.+