Esdras

4 Kan maaraman kan mga kaiwal kan Juda asin kan Benjamin+ na an mga nagbaralik hali sa pagkabihag sa ibang nasyon+ nagtutugdok nin templo para ki Jehova na Diyos kan Israel, 2 tulos-tulos nindang dinulok si Zerubabel saka an mga pamayo kan mga angkan asin nagsabi sa sainda: “Patabangon nindo kami sa pagtugdok nindo; huling arog nindo, sinasamba* mi an saindong Diyos+ asin nag-aatang na kami sa saiya puon pa kan panahon ni Hading Esar-hadon+ kan Asiria, na iyo an nagdara sa samo digdi.”+ 3 Alagad, si Zerubabel asin si Jesua saka an iba pang mga pamayo kan mga angkan sa Israel nagsarabi sa sainda: “Dai kamo puwedeng tumabang sa samo sa pagtugdok nin harong para sa samuyang Diyos,+ huling kami sana an matugdok kaiyan para ki Jehova na Diyos kan Israel, arog kan ipinagbuot sa samo ni Hading Ciro na hadi kan Persia.”+

4 Dangan an mga tawo sa nakapalibot na mga lugar padagos na naggibo nin paagi para mangluya an buot* kan mga taga Juda asin madisganar sa pagtugdok.+ 5 Nagbayad sinda nin mga parakonseho tanganing ulangon an mga plano ninda+ sa bilog na panahon kan paghadi ni Hading Ciro kan Persia sagkod sa paghadi ni Hading Dario+ kan Persia. 6 Sa kapinunan kan paghadi ni Ahasuero, naggibo sinda nin surat na nagsasambit nin mga akusasyon laban sa mga nag-iistar sa Juda asin Jerusalem. 7 Asin kan panahon ni Hading Artajerjes kan Persia, si Bislam, Mitredat, Tabeel, asin an iba pa niyang mga kairiba nagsurat ki Artajerjes na hadi; itrinadusir ninda an surat sa lengguwaheng Aramaiko,+ na isinurat iyan gamit an mga letrang Aramaiko.*

8 * Si Rehum na panginot na opisyal kan gobyerno asin si Simsai na eskriba naggibo nin surat para ki Hading Artajerjes laban sa mga taga Jerusalem. Ini an nasa surat: 9 (Hali iyan ki Rehum na panginot na opisyal kan gobyerno asin ki Simsai na eskriba saka sa iba pa nindang mga kairiba, an mga hukom asin an sekondaryong mga gobernador, an mga sekretaryo, an mga taga Erec,+ an mga Babilonyo, an mga taga Susa,+ na iyo an mga Elamita,+ 10 asin sa iba pa na nasa mga nasyon na puwersahan na dinara kan makapangyarihan asin ginagalangan na si Asenapar sa mga siyudad kan Samaria,+ asin sa iba pa na nasa rehiyon na Ibong kan Salog,* asin ngunyan 11 ini an kopya kan surat na ipinadara ninda sa saiya.)

“Para ki Hading Artajerjes, hali sa saimong mga lingkod na nasa rehiyon na Ibong kan Salog: Ngunyan 12 dapat na maaraman kan hadi na an mga Judio na nagdirigdi sa samo hali sa saimo nakaabot na sa Jerusalem. Itinutugdok giraray ninda an siyudad kan mga rebelyoso asin maraot na mga tawo, saka tinatrabaho na ninda an mga pader+ asin pighihirahay ninda an mga pundasyon. 13 Dapat na maaraman kan hadi na sa oras na maitugdok liwat an siyudad na ini asin matapos an mga pader kaiyan, dai na sinda matao nin buhis, tributo,*+ o bayad sa pag-agi sa mga tinampo, asin magigin kawaran iyan sa kaban nin yaman kan mga hadi. 14 Huling hali sa palasyo an suweldo mi* asin habo ming mahiling na naaapektaran an kapakanan kan hadi, nagdesisyon kaming magpadara nin surat para ipaaram ini sa hadi, 15 tanganing magkaigwa nin pagsiyasat sa libro kan mga rekord kan saimong mga apuon.+ Mahihiling mo sa libro kan mga rekord asin maaaraman mo diyan na an mga nasa siyudad na ini rebelyoso, nakakaraot sa mga hadi asin sa mga probinsiya,* saka puon pa kan suanoy na mga panahon may mga promotor na nin sedisyon sa siyudad na ini. Iyan an dahilan kaya linaglag an siyudad na ini.+ 16 Ipinapaaram mi sa hadi na pag maitugdok giraray an siyudad na ini asin pag matapos na an mga pader kaini, mawawaran ka nin kontrol* sa rehiyon na Ibong kan Salog.”+

17 An hadi nagpaabot nin mensahe ki Rehum na panginot na opisyal kan gobyerno asin ki Simsai na eskriba asin sa iba pa nindang mga kairiba na nasa Samaria asin sa gabos na iba pa na nasa rehiyon na Ibong kan Salog:

“Akua an sakuyang pangungumusta! Ngunyan 18 nabasa na nin malinaw* sa atubangan ko an opisyal na dokumento na ipinadara nindo sa samo. 19 Ipinagbuot kong magkaigwa nin pagsiyasat, asin naaraman paagi kaiyan na puon pa kan inot na mga panahon an mga tawo sa siyudad na iyan nagtumang sa mga hadi, asin nagkaigwa diyan nin mga pagrebelde.+ 20 Igwa kaidto nin makapangyarihan na mga hadi sa Jerusalem na namahala sa bilog na rehiyon na Ibong kan Salog, asin sainda ibinayad an mga buhis, tributo, asin bayad sa pag-agi sa mga tinampo. 21 Kaya magpaluwas kamo nin pagbuot na ipundo kan mga tawong iyan an saindang pagtrabaho, tanganing an siyudad na iyan dai maitugdok liwat sagkod na dai ako magpaluwas nin pagbuot. 22 Siguraduhon nindong maaksiyunan an bagay na ini, tanganing an mga bagay na para sa kapakanan kan hadi dai na maapektaran pa.”+

23 Kan an kopya kan opisyal na dokumento na hali ki Hading Artajerjes nabasa na sa atubangan ni Rehum asin ni Simsai na eskriba saka kan saindang mga kairiba, tulos-tulos sindang nagduman sa mga Judio na nasa Jerusalem tanganing puwersahan sindang papunduhon. 24 Iyan an panahon na napundo an pagtrabaho sa harong nin Diyos sa Jerusalem sagkod sa ikaduwang taon kan paghadi ni Hading Dario kan Persia.+