Jeremias

43 Kan matapos nang sabihon ni Jeremias sa bilog na banwaan an gabos na tataramon na ini hali ki Jehova na saindang Diyos, an lambang tataramon na sinabi ni Jehova na saindang Diyos na sabihon niya sa sainda, 2 si Azarias na aki ni Hosaias, si Johanan+ na aki ni Karea, asin an gabos na pangahas na lalaki nagsabi ki Jeremias: “Kaputikan ’yang pigsasabi mo! Dai ka isinugo ni Jehova na samuyang Diyos tanganing sabihon, ‘Dai kamo magpasiring sa Ehipto tanganing duman mag-istar.’ 3 Pigsusutsutan ka lang ni Baruc+ na aki ni Nerias para magtaram laban samo, tanganing maitao kami sa mga Caldeo, para gadanon kami o puwersahan na darahon sa Babilonya.”+

4 Kaya si Johanan na aki ni Karea saka an gabos na namamayo nin hukbo asin an bilog na banwaan dai nagsunod sa boses ni Jehova na magpirmi sinda sa daga nin Juda. 5 Imbes, dinara ni Johanan na aki ni Karea saka kan gabos na namamayo nin hukbo an gabos na natatada sa Juda na nagbaralik para mag-istar sa daga nin Juda hali sa gabos na nasyon kun sain sinda nagkawararak.+ 6 Dinara ninda an mga lalaki, an mga babayi, an mga aki, an mga aking babayi kan hadi, asin an kada saro sa mga* iwinalat ni Nebuzaradan+ na pamayo kan mga guwardiya ki Gedalias+ na aki ni Ahikam+ na aki ni Safan,+ pati man si Jeremias na propeta asin si Baruc na aki ni Nerias. 7 Asin nagpasiring sinda sa daga nin Ehipto, huli ta dai ninda sinunod an boses ni Jehova, asin nakaabot sinda sagkod sa Tapanhes.+

8 Dangan uminabot ki Jeremias sa Tapanhes an tataramon ni Jehova, na an sabi: 9 “Magkua ka nin darakulang gapo, asin mantang nakahiling an mga lalaking Judio, itago mo an mga iyan sa nakataas na salog na ladrilyo* na yaon sa may entrada kan harong ni Faraon sa Tapanhes, asin plastaran mo nin pansemento. 10 Dangan sabihon mo sa sainda, ‘Ini an sabi ni Jehova na pamayo nin mga hukbo, an Diyos kan Israel: “Ipapaapod ko si Nabucodonosor* na hadi kan Babilonya, na sakuyang lingkod,+ asin ibubugtak ko an trono niya sa mismong ibabaw kan mga gapong ini na itinago ko, asin ibibiklad niya sa ibabaw kan mga ini an saiyang toldang panghadi.+ 11 Asin maabot siya dangan sasalakayon an daga nin Ehipto.+ An siisay man na para sa nakakagadan na damat magigin para sa nakakagadan na damat, asin an siisay man na para sa pagkabihag magigin para sa pagkabihag, asin an siisay man na para sa espada magigin para sa espada.+ 12 Asin susuluon ko sa kalayo an mga harong* kan mga diyos nin Ehipto,+ asin tutumtumon niya an mga iyan asin dadarahon niya sinda bilang bihag. Ipapatos niya sa sadiri niya an daga nin Ehipto kun paanong ipinapatos nin sarong pastor sa sadiri niya an gubing kaini, asin may katuninungan siyang mahali diyan.* 13 Asin titipak-tipakon niya an mga harigi* kan Bet-semes* sa daga nin Ehipto, asin susuluon niya sa kalayo an mga harong* kan mga diyos nin Ehipto.”’”