Jeremias

39 Kan ikasiyam na taon ni Hading Zedekias kan Juda, kan ikasampulong bulan, uminabot si Hading Nabucodonosor* kan Babilonya sa Jerusalem kaiba an bilog niyang hukbo, asin sinalikupan ninda ini.+

2 Kan ika-11 taon ni Zedekias, kan ikaapat na bulan, kan ikasiyam na aldaw kan bulan, nalabot* ninda asin nalaog an pader kan siyudad.+ 3 Asin nagralaog an gabos na halangkaw na opisyal* kan hadi kan Babilonya asin nagtukaw sa may Tahaw na Trangkahan+—si Nergal-sarezer na Samgar, si Nebo-sarsekim na Rabsaris,* si Nergal-sarezer na Rabmag,* asin an gabos na iba pang halangkaw na opisyal* kan hadi kan Babilonya.

4 Kan mahiling an mga ini ni Hading Zedekias kan Juda asin kan gabos na suldados, nagdurulag sinda,+ asin nagluwas sinda sa siyudad pagkabanggi; nag-agi sinda sa hardin kan hadi, sa trangkahan na nasa pag-ultanan kan duwang pader, asin nagdulag sinda pasiring sa Araba.+ 5 Pero linapag sinda kan hukbo kan mga Caldeo, asin naabutan kan mga ini si Zedekias sa disyertong kapatagan kan Jerico.+ Dinakop ninda siya asin dinara ki Hading Nabucodonosor* kan Babilonya sa Ribla+ sa daga nin Hamat,+ kun sain siya sinentensiyahan kaini. 6 Ipinagadan kan hadi kan Babilonya duman sa Ribla an mga aking lalaki ni Zedekias sa mismong atubangan kaini, asin ipinagadan man kan hadi kan Babilonya an gabos na respetadong tawo sa Juda.+ 7 Dangan binuta niya an mga mata ni Zedekias, tapos kinadenahan niya siya nin kadenang tanso tanganing darahon sa Babilonya.+

8 Pagkatapos, sinulo kan mga Caldeo an harong* kan hadi asin an mga harong kan banwaan,+ asin rinumpag ninda an mga pader kan Jerusalem.+ 9 Puwersahan na dinara* sa Babilonya ni Nebuzaradan+ na pamayo kan mga guwardiya an iba pa sa mga namamanwaan na natada sa siyudad, saka an mga nagharali diyan para kumampi sa saiya, asin an siisay man na natada.

10 Pero si Nebuzaradan, na pamayo kan mga guwardiya, iwinalat sa daga nin Juda an nagkapira sa pinakapobre sa mga tawo, su mga mayo nin ano man na pagsadiri. Kan aldaw na idto, tinawan man niya sinda nin mga ubasan asin mga uma na tatrabahuhon.*+

11 Ngunyan, ini an ipinagbuot ni Hading Nabucodonosor* kan Babilonya ki Nebuzaradan na pamayo kan mga guwardiya may koneksiyon ki Jeremias: 12 “Kuanon mo siya asin asikasuhon; dai mo siya paggibuhan nin maraot, asin itao mo saiya an ano man na hagadon niya saimo.”+

13 Kaya nagsugo si Nebuzaradan na pamayo kan mga guwardiya, si Nebusazban na Rabsaris,* si Nergal-sarezer na Rabmag,* asin an gabos na panginot na lalaking lingkod kan hadi kan Babilonya 14 asin ipinakua ninda si Jeremias sa Patyo kan Guwardiya+ asin itinao ki Gedalias+ na aki ni Ahikam+ na aki ni Safan+ tanganing darahon sa harong kaini. Kaya nag-istar siya kaiba kan banwaan.

15 Mantang nakadetenir kaidto si Jeremias sa Patyo kan Guwardiya,+ uminabot sa saiya an tataramon ni Jehova, na an sabi: 16 “Magduman ka ki Ebed-melec+ na Etiope asin sabihon mo sa saiya, ‘Ini an sabi ni Jehova na pamayo nin mga hukbo, an Diyos kan Israel: “Uutubon ko an mga sinabi kong kapahamakan, bakong karahayan, laban sa siyudad na ini, asin sa aldaw na iyan mahihiling mong mangyayari iyan.”’

17 “‘Pero ililigtas taka sa aldaw na iyan,’ an sabi ni Jehova, ‘asin dai ka itatao sa mga tawong kinakatakutan mo.’

18 “‘Huling tatabangan takang makadulag, asin dai ka magagadan sa espada. Mapapasaimo an saimong buhay*+ bilang samsam,* ta nagtiwala ka sa sakuya,’+ an sabi ni Jehova.”