Hukom

2 Asin hali sa Gilgal,+ nagpasiring sa Bokim an anghel ni Jehova+ asin nagsabi: “Ilinuwas ko kamo sa Ehipto asin dinara sa daga na isinumpa ko sa saindong mga apuon.+ Apuwera kaiyan, nagsabi ako, ‘Dai ko nuarin man babalgahon an sakuyang tipan sa saindo.+ 2 Sa parte man nindo, dai kamo dapat makipagtipan sa mga nakaistar sa dagang ini+ asin dapat nindong garabaon an saindang mga altar.’+ Pero dai nindo sinunod an sinabi* ko.+ Ano ta ginibo nindo ini? 3 Iyan an dahilan kaya nagsabi man ako, ‘Dai ko sinda papalayason sa atubangan nindo,+ asin magigi sindang siod sa saindo+ asin maeengganyo kamong sambahon an saindang mga diyos.’”+

4 Kan sabihon ini kan anghel ni Jehova sa gabos na Israelita, an banwaan nagpuon na magtangis nin makusog. 5 Kaya pinangaranan ninda an lugar na iyan na Bokim,* asin nag-atang sinda duman ki Jehova.

6 Kan pahalion na ni Josue an banwaan, an lambang Israelita nagpasiring sa saiyang mana para sakupon iyan.+ 7 Padagos na naglingkod ki Jehova an banwaan sa bilog na panahon na nabubuhay si Josue asin sa bilog na panahon na nabubuhay an mga kamagurangan na mas huring nagadan ki Josue asin nakahiling kan gabos na makangangalas na mga ginibo ni Jehova para sa Israel.+ 8 Dangan, si Josue na aki ni Nun, na lingkod ni Jehova, nagadan sa edad na 110.+ 9 Kaya ilinubong ninda siya sa minana niyang daga sa Timnat-heres,+ sa kabukidan nin Efraim, sa norte kan Bukid nin Gaas.+ 10 Pag-abot nin panahon, nagadan an bilog na henerasyon na iyan.* Tapos sarong bagong henerasyon an suminunod, sarong henerasyon na dai nakakamidbid ki Jehova o dai nakakaaram kan ginibo niya para sa Israel.

11 Kaya ginibo kan mga Israelita kun ano an maraot sa paghiling ni Jehova, asin naglingkod* sinda sa mga Baal.+ 12 Sa siring, binayaan ninda si Jehova, an Diyos kan saindang mga ama, na nagluwas sa sainda sa daga nin Ehipto.+ Asin nagsunod sinda sa ibang mga diyos, an mga diyos kan mga banwaan na nasa palibot ninda,+ asin nagduko sinda sa sainda asin pinaanggot* si Jehova.+ 13 Binayaan ninda si Jehova asin naglingkod ki Baal saka sa mga imahen ni Astoret.+ 14 Huli kaini, naanggot na marhay si Jehova sa Israel, kaya itinao niya sinda sa mga parasamsam na nanamsam sa sainda.+ Itinao* niya sinda sa kamot kan mga kalaban sa palibot ninda,+ asin dai na ninda nagibong labanan an saindang mga kalaban.+ 15 Maski sain sinda magduman, pinapadusahan sinda ni Jehova* asin pinapaabutan nin kapahamakan,+ arog kan sinabi ni Jehova asin arog kan isinumpa sa sainda ni Jehova,+ asin nagsakit sindang marhay.+ 16 Kaya nagnonombra si Jehova nin mga hukom na nagliligtas sa sainda sa kamot kan mga nananamsam sa sainda.+

17 Pero dai sinda nagdangog maski sa mga hukom, saka dai sinda nagin maimbod mala ta nagsamba sinda* sa ibang mga diyos, asin duminuko sinda sa sainda. Madalion sindang suminuway sa dalan na piglakawan kan saindang mga apuon, kan mga nagsunod sa mga tugon ni Jehova.+ Dai ninda inarog an saindang mga apuon. 18 Kada magnombra si Jehova nin mga hukom para sa sainda,+ si Jehova nasa kaibanan kan hukom na pignombrahan niya asin iliniligtas niya sinda sa kamot kan saindang mga kalaban sa bilog na panahon na nabubuhay an hukom na iyan; nahirak kayang marhay si Jehova sa sainda*+ dahil sa pag-agrangay ninda huli sa mga nang-aapi+ asin nagmamaltrato sa sainda.

19 Pero pag nagadan na an hukom, minabalik sinda sa maraot nindang mga gibo asin ginigibo an mas maraot pa sa ginibo kan saindang mga ama. Nagsusunod sinda sa ibang mga diyos asin naglilingkod saka nagduduko sa sainda.+ Dai ninda binayaan an saindang maraot na mga gibo-gibo asin an katagasan kan saindang payo. 20 Kan huri, naanggot na marhay si Jehova sa Israel,+ asin nagsabi siya: “Huling binalga kan nasyon na ini an sakuyang tipan+ na ipinakipagtipan ko sa saindang mga apuon asin dai sinda nagsunod sa sako,+ 21 dai ko papalayason sa atubangan ninda an maski saro sa mga natadang nasyon na dai nasakop ni Josue bago siya magadan.+ 22 Sa paaging ini, mapupurbaran kun baga susunudon kan Israel an dalan ni Jehova+ arog kan ginibo kan saindang mga ama.” 23 Iyan an dahilan kaya pinabayaan ni Jehova na magdanay an mga nasyon na ini. Dai niya sinda pinalayas tulos, asin dai niya sinda itinao sa kamot ni Josue.