Inot na Samuel

18 Pagkatapos na makipag-ulay ni David ki Saul, nagin dayupot na marhay na mag-amigo si Jonathan+ saka si David,* asin namutan siya ni Jonathan nin siring sa saiyang sadiri.*+ 2 Puon kan aldaw na idto, kinua na ni Saul si David tanganing maglingkod sa saiya, asin dai na niya ini tinugutan na magpuli sa harong kan saiyang ama.+ 3 Asin nakipagtipan si Jonathan ki David,+ huling namutan niya ini nin siring sa saiyang sadiri.*+ 4 Hinuba ni Jonathan an sulot niyang pang-ibabaw na bado na daing manggas asin itinao iyan ki David, pati na an saiyang gubing na panggiyera, espada, pana, asin paha. 5 Puon kaidto, minaduman si David maski sain siya suguon ni Saul para makilaban asin pirmi siyang nagigin mapanggana.*+ Kaya sa saiya ipinamahala ni Saul an mga lalaking parapakilaban,+ asin ikinaugma ini kan gabos na Israelita saka kan mga lingkod ni Saul.

6 Pag minabalik na si David saka an iba pa hali sa pakikipaglaban sa mga Filisteo, nagruruluwas an mga babayi hali sa gabos na siyudad sa Israel na maugmang nagkakaranta+ asin nagbabarayle, na may mga tamburin+ saka instrumentong tulo an kuwerdas, para sabaton si Hading Saul. 7 Nagkakaranta an mga babaying nagseselebrar kan kapangganahan:

8 Angguton si Saul,+ asin dai niya nagustuhan an kantang ini, mala ta an sabi niya: “An ipinang-umaw ninda ki David, manampulong ribo, pero sako rinibo sana. Kulang na sanang itao ninda sa saiya an pagkahadi!”+ 9 Puon kan aldaw na idto, pirmi nang pigsususpetsaran ni Saul si David.

10 Kan sunod na aldaw, itinugot nin Diyos na purisawon si Saul nin maraot na kaisipan,*+ asin huminiro siya na siring sa ibang tawo* sa laog kan saiyang harong, mantang nagtutugtog si David nin arpa+ arog kan dati. May kapot na garod si Saul,+ 11 asin ipinatama niya ki David an garod,+ na sinasabi sa sadiri: ‘Itatadok ko si David sa lanob!’ Alagad duwang beses na nakadulag sa saiya si David. 12 Natakot si Saul ki David huli ta nasa kaibanan ni David si Jehova,+ alagad si Saul binayaan na Niya.+ 13 Kaya hinali siya ni Saul sa paglilingkod sa laog kan saiyang harong asin ginibo siyang namamayo nin sangribong suldados, asin papanginutan ni David an hukbo sa pakikipaglaban.*+ 14 Padagos na nagin mapanggana* si David+ sa gabos niyang ginigibo, asin nasa kaibanan niya si Jehova.+ 15 Asin kan mahiling ni Saul na mapangganang marhay si David, natakot siya sa saiya. 16 Pero namutan si David kan bilog na Israel asin kan Juda, huli ta pinanginginutan niya sinda sa saindang mga pakikipaglaban.

17 Kan huri, sinabi ni Saul ki David: “Uni an matua kong aking babayi na si Merab.+ Ipapaagom ko siya sa saimo,+ basta padagos kang maglingkod sako nin may kusog nin buot asin ipakipaglaban mo an mga giyera ni Jehova.”+ Sinabi kaya ni Saul sa sadiri niya: ‘Bakong kamot ko an madutdot sa saiya, kundi an kamot kan mga Filisteo an magadan sa saiya.’+ 18 Kaya nagsimbag si David ki Saul: “Siisay man ako asin an pamilya kan sakong ama sa Israel, para magin manugang ako kan hadi?”+ 19 Alagad, kan uminabot na an panahon para itao ki David an aki ni Saul na si Merab, naitao na ini ki Adriel+ na Meholatita para magin agom.

20 Ngunyan, namumuot ki David an aking babayi ni Saul na si Mical.+ May nagsabi kaini ki Saul, asin ikinaugma niya ini. 21 Kaya sinabi ni Saul: “Ipapaagom ko siya ki David para magin paon sa saiya, tanganing magadan siya kan mga Filisteo.”+ Dangan sa ikaduwang pagkakataon sinabi ni Saul ki David: “Magigin manugang taka* ngunyan.” 22 Ipinagbuot man ni Saul sa saiyang mga lingkod: “Pasekreto nindong kaulayon si David, ngantig, ‘Gustuhon ka kan hadi asin kan gabos na lingkod niya. Kaya mag-uyon ka nang magin manugang kan hadi.’” 23 Kan sabihon ini kan mga lingkod ni Saul ki David, nagsimbag si David: “Paghuna nindo, pasilon sana na magin manugang kan hadi? Pobre man sana baga ako saka ordinaryong tawo.”+ 24 Dangan ibinareta ki Saul kan mga lingkod niya: “Ini an mga sinabi ni David.”

25 Huli kaini sinabi ni Saul: “Ini an sabihon nindo ki David, ‘Dai man mahagad an hadi nin ano man na dote,+ kundi an gusto niya 100 na kublit sa puro kan ikinabuhay+ kan mga lalaking Filisteo, para makabalos an hadi sa mga kalaban niya.’” Pero pakana lang ini ni Saul para magadan si David kan mga Filisteo. 26 Kaya isinabi ini ki David kan mga lingkod ni Saul, asin nagusto na si David na magin manugang kan hadi.+ Bago pa mag-abot an itinalaan na panahon, 27 naghali si David kaiba an mga tawuhan niya asin ginaradan an 200 na lalaking Filisteo, tapos dinara ni David sa hadi an gabos na nakua niyang kublit sa puro kan ikinabuhay kan mga ini para magin manugang siya kan hadi. Kaya, ipinaagom ni Saul ki David an saiyang aking si Mical.+ 28 Narealisar ni Saul na tinatabangan ni Jehova si David+ asin na namumuot digdi an aki niyang si Mical.+ 29 Dahil diyan lalo pang natakot si Saul ki David, asin nagin kalaban ni Saul si David sagkod na siya nabubuhay.+

30 An mga pamayo* kan mga Filisteo minaruluwas tanganing makipaglaban. Pero sa kada pagsalakay ninda, mas nagigin mapanggana* si David kisa sa gabos na lingkod ni Saul;+ kaya nagin respetado siyang marhay.*+