Ruth

1 Kan panahon na an mga hukom+ an nagpapautob nin hustisya,* nagkaigwa nin tiggutom sa daga; asin sarong lalaki na taga Betlehem+ sa Juda an nagpasiring sa daga nin Moab+ tanganing mag-istar duman bilang dayuhan. Kaiba niya an saiyang agom asin an saiyang duwang aking lalaki. 2 An pangaran kan lalaki Elimelec,* an agom niya iyo si Noemi,* asin an duwa niyang aki iyo si Malon* saka Kilion.* Mga Efrateo sinda sa Betlehem sa Juda. Nag-abot sinda sa Moab asin nag-istar duman.

3 Pag-abot nin panahon, nagadan si Elimelec, kaya nabayaan niya an agom niyang si Noemi asin an duwang aking lalaki. 4 Dai naghaloy, an mga lalaking ini nag-agom nin mga babaying Moabita; an pangaran kan saro Orpa, asin an saro Ruth.+ Mga sampulong taon sindang nag-istar duman. 5 Dangan nagadan man si Malon saka si Kilion, kaya nabayaan si Noemi kan agom niya pati kan duwa niyang aking lalaki. 6 Nagdesisyon siya ngunyan na maghali sa Moab kaiba an saiyang mga manugang na babayi; nabaretaan niya kaya sa Moab na binebendisyunan na giraray ni Jehova an saiyang banwaan paagi sa pagtao sainda nin kakanon.*

7 Binayaan niya an lugar na iniistaran ninda kan saiyang mga manugang na babayi. Mantang nagbabaklay sinda sa dalan pabalik sa Juda, 8 sinabi ni Noemi sa duwa niyang manugang: “Sige na, magpuli na kamo sa harong kan saindong mga ina. Pahilingan lugod kamo ni Jehova nin maimbod na pagkamuot,+ arog kan ipinahiling nindo sa mga lalaking nagadan asin sa sako. 9 Tawan* lugod kamo ni Jehova nin trangkilong buhay* sa harong kan saindong magigin agom.”+ Dangan hinadukan niya sinda, asin naghiribian sinda nin makusog. 10 Pauruutro nindang sinabi sa saiya: “Dai, maiba kami saimo sa pagbalik mo sa saimong banwaan.” 11 Pero sinabi ni Noemi: “Magpuli na kamo mga aki ko. Taano ta maiba pa kamo sako? Magkakaigwa pa daw ako nin mga aking lalaki na puwede nindong magin agom?+ 12 Magpuli na kamo mga aki ko. Sige na, gurangon na baga ako para mag-agom pa. Dawa sabihon ta pang makakahanap ako nin magigin agom ngunyan na banggi asin magkakaaki nin mga lalaki, 13 magpaparahalat daw kamo sagkod na magdakula sinda? Dai nguna daw kamo mapaagom giraray para lang sa sainda? Dai, mga aki ko, makulugon* sa buot kong nadadamay kamo, ta nagin laban sako an kamot ni Jehova.”+

14 Naghiribian giraray sinda nin makusog, tapos hinadukan ni Orpa an panugangan niya asin naghali na. Pero si Ruth nagdanay na kaibanan kan panugangan niya. 15 Kaya nagsabi si Noemi: “Hilinga! Nagbalik na an saimong bilas sa saiyang banwaan asin sa saiyang mga diyos. Bumalik ka na kaiba kan saimong bilas.”

16 Alagad sinabi ni Ruth: “Dai mo tabi ako pagpakiulayan na bayaan ka o na dai na mag-iba sa saimo; huling kun sain ka magduman, maduman ako, asin kun sain ka magturog, duman ako maturog. An saimong banwaan magigin sakuyang banwaan, asin an saimong Diyos sakuyang Diyos.+ 17 Kun sain ka magadan duman ako magagadan, asin duman ako ilulubong. Padusahan lugod ako ni Jehova nin magabat kun tutugutan ko an ano man na bagay, apuwera sa kagadanan, na isuway ako sa saimo.”

18 Kan mahiling ni Noemi na talagang desidido si Ruth na mag-iba sa saiya, dai na niya ini pinirit na magpuli. 19 Asin nagpadagos sindang duwa sa pagbaklay sagkod na makaabot sinda sa Betlehem.+ Pagkaabot-abot ninda sa Betlehem, nagkariribok an bilog na siyudad dahil sa sainda, asin nagsarabi an mga babayi: “Bakong si Noemi iyan?” 20 Sinasabi niya sa mga babayi: “Dai nindo ako pag-apudon na Noemi.* Apudon nindo akong Mara,* huling an sakuyang buhay ginibo nanggad na mapait kan Makakamhan sa Gabos.+ 21 Yaon sako an gabos kan maghali ako, pero pinabalik ako ni Jehova na mayo na lamang nin ano man. Taano ta aapudon pa nindo akong Noemi, mantang si Jehova na ngani an nagin laban sa sako asin an Makakamhan sa Gabos na mismo an nagpaabot sa sako nin trahedya?”+

22 Iyan an istorya kan pagbalik ni Noemi hali sa Moab,+ kaiba an saiyang Moabitang manugang na si Ruth. Nag-abot sinda sa Betlehem kan nagpupuon na an aranihan kan sebada.+