Inot na Samuel

13 Nagpuon na maghadi si Saul+ sa edad na . . . ,* asin duwang taon na siyang namamahala sa Israel. 2 Nagpili si Saul nin 3,000 na lalaki sa Israel; 2,000 sa mga ini an kaiba ni Saul sa Micmash saka sa kabukidan nin Bethel asin an 1,000 kaiba ni Jonathan+ sa Gibeah+ sa Benjamin. Asin an iba pa sa banwaan pinapuli niya sa kanya-kanya nindang tolda. 3 Dangan sinalakay asin nadaog ni Jonathan an tropa nin mga suldados na* Filisteo+ na nasa Geba,+ asin nabaretaan ini kan mga Filisteo. Tapos ipinagbuot ni Saul na magpatanog nin hamudyong+ sa bilog na nasyon, na sinasabi: “Magdangog an mga Hebreo!” 4 Nakalakop sa bilog na Israel an bareta: “Sinalakay asin nadaog ni Saul an sarong tropa nin mga suldados na* Filisteo, asin angguton na ngunyan sa Israel an* mga Filisteo.” Kaya ipinaapod an banwaan tanganing magduruman ki Saul sa Gilgal.+

5 Nagtiripon man an mga Filisteo tanganing makipaglaban sa Israel. Igwa sinda nin 30,000 na karwaheng panggiyera asin 6,000 na parakabayo saka mga suldados na kasingdakul kan mga baybay sa gilid kan dagat;+ asin nagturukad sinda saka nagkampo sa Micmash sa may sirangan kan Bet-aven.+ 6 Nahiling kan mga lalaki kan Israel na namemeligro sinda saka gipit na; kaya nagtarago sinda sa mga kuweba,+ sa mga gaak, sa mga dakulang gapo, sa mga labot* sa irarom kan daga, asin sa mga kalot na istakan nin tubig. 7 An iba sa mga Hebreo nagbaralyo pa ngani sa Jordan pasiring sa daga nin Gad asin Gilead.+ Pero dai naghali sa Gilgal si Saul, asin nagtatarakig sa takot an gabos na tawong nagsusurunod sa saiya. 8 Padagos siyang naghalat sa laog nin pitong aldaw uyon sa itinalaan na panahon na sinabi ni Samuel, alagad dai nag-abot sa Gilgal si Samuel, asin diit-diit na siyang binabayaan kan mga tawo. 9 Kan huri, sinabi ni Saul: “Daraha sako an atang na pigtututong saka an mga atang sa pakikikabtang.” Asin idinulot niya an atang na pigtututong.+

10 Alagad pagkatapos niyang maidulot an atang na pigtututong, nag-abot si Samuel. Kaya nagluwas si Saul tanganing sabaton siya asin maugmang akuon.* 11 Dangan sinabi ni Samuel: “Ano ining ginibo mo?” Nagsimbag si Saul: “Nahiling ko kayang binabayaan na ako kan mga tawo,+ saka dai ka man nag-abot sa itinalaan na panahon, tapos an mga Filisteo nagtitiripon na sa Micmash.+ 12 Kaya naisip ko, ‘Sasalakayon na ako kan mga Filisteo digdi sa Gilgal, pero dai ko pa nahahagad an pag-uyon* ni Jehova.’ Kaya napiritan akong idulot an atang na pigtututong.”

13 Huli kaini, sinabi ni Samuel ki Saul: “Kamangmangan an ginibo mo. Dai mo sinunod an ipinagbuot sa saimo ni Jehova na saimong Diyos.+ Kun nagsunod ka, papasarigon kutana ni Jehova an saimong kahadian sa Israel sagkod lamang. 14 Pero ngunyan, dai na magdadanay an saimong kahadian.+ Mahanap si Jehova nin sarong lalaki na nauuyunan kan saiyang puso,+ asin nonombrahan siya ni Jehova na magin lider kan saiyang banwaan,+ huling dai mo sinunod an ipinagbuot sa saimo ni Jehova.”+

15 Dangan naghali si Samuel asin nagtukad hali sa Gilgal pasiring sa Gibeah sa Benjamin. Binilang ni Saul an mga dai nagbaya sa saiya—mga 600 pang lalaki.+ 16 Nagpirmi si Saul sa Geba sa Benjamin, kaiba an aki niyang si Jonathan saka an mga lalaking dai nagbaya sa sainda.+ An mga Filisteo nakakampo na kaidto sa Micmash.+ 17 Asin tulong grupo nin nananakyadang tropa an minaluwas sa kampo kan mga Filisteo. An sarong tropa minaagi sa dalan na pasiring sa Ofra asin sa daga nin Sual; 18 an saro pang tropa minaagi sa dalan na pasiring sa Bet-horon;+ asin an ikatulo minaagi sa dalan na pasiring sa linderos* kun sain natatanaw an kababan nin Zeboim, na pasiring sa kaawagan.

19 Mayong makua ni sarong panday sa bilog na kadagaan nin Israel, huling sinabi kan mga Filisteo: “Tanganing an mga Hebreo dai makagibo nin espada o kaya garod.”* 20 Asin an gabos na Israelita kaipuhan pang magduman sa mga Filisteo tanganing magpatais kan saindang mga arado, piko, patok, o asyab. 21 Sarong pim* an bayad para sa pagpatais nin mga arado, nin mga piko, nin mga gamit na may tulong panas, nin mga patok, asin para sa pagpakabit nin panas sa mga sugkod na pampasunod sa baka. 22 Asin sa aldaw nin ralaban, mayo ni saro sa mga tawuhan ni Saul asin Jonathan an may espada o garod;+ si Saul sana saka an aki niyang si Jonathan an may mga armas.

23 Asin sarong tropa nin mga suldados na* Filisteo an nagluwas tanganing magpasiring sa pigbabalyuhan sa may ampas kan Micmash.+