Bilang

14 Dangan nag-agrangay nin makusog an bilog na katiripunan, asin gabos sinda nagparatarangis kan bangging iyan.+ 2 Naggurumod-gumod an gabos na Israelita laban ki Moises saka ki Aaron,+ asin an bilog na katiripunan nagtaram nin maraot na mga bagay laban sa sainda, na sinasabi: “Mas marahay pang nagadan na lang kita sa Ehipto o sa kaawagan na ini! 3 Ano ta dadarahon kita ni Jehova sa dagang iyan para lang magadan sa espada?+ Magigin mga samsam an satuyang mga agom saka mga aki.+ Bako daw na mas marahay na bumalik na lang kita sa Ehipto?”+ 4 Nag-urulay-ulay pa ngani sinda: “Magpili kita nin lider asin bumalik kita sa Ehipto!”+

5 Huli kaini, suminubsob sa daga si Moises saka si Aaron sa atubangan kan bilog na katiripunan* kan mga Israelita. 6 Ginisi ni Josue+ na aki ni Nun asin ni Caleb+ na aki ni Jefunne, na kaiba sa mga nag-espiya, an saindang bado, 7 asin ini an sinabi ninda sa bilog na katiripunan kan mga Israelita: “Marahayon nanggad an daga na pig-espiyahan mi.+ 8 Kun nauuyunan kita ni Jehova, siguradong dadarahon niya kita sa dagang iyan asin itatao niya iyan sa sato, sarong daga na nagbubulos nin gatas saka tangguli.+ 9 Pero dai kamo magrebelde ki Jehova, asin dai kamo matakot sa mga tawo duman,*+ huling kayang-kaya ta sindang sakupon.* Hinali na sa sainda an saindang proteksiyon, asin nasa kaibanan ta si Jehova.+ Dai kamo matakot sa sainda.”

10 Alagad, an bilog na katiripunan nag-urulay-ulay na garapuon sinda.+ Pero biglang nahiling kan bilog na banwaan nin Israel an kamurawayan ni Jehova sa ibabaw kan tolda nin pakipagtagbuan.+

11 Dangan sinabi ni Jehova ki Moises: “Sagkod nuarin ako dai igagalang kan banwaan na ini,+ asin sagkod nuarin sinda dai magkakaigwa nin pagtubod sa sako sa ibong kan gabos na tanda na ginibo ko sa sainda?+ 12 Pabayai akong paabutan sinda nin damat* asin paraon sinda, asin pabayai akong gibuhon kang sarong nasyon na mas dakula saka mas makapangyarihan kisa sa sainda.”+

13 Alagad sinabi ni Moises ki Jehova: “Kinua mo sa mga Ehipsiyo an banwaan na ini paagi kan saimong kapangyarihan, kaya pag ginibo mo iyan, maaaraman iyan kan mga Ehipsiyo,+ 14 asin sasabihon ninda iyan sa mga nakaistar sa dagang ini. Pati sinda, aram ninda, O Jehova, na nasa kaibanan ka kan banwaan na ini+ asin na nagpahiling ka sa sainda nin hampangan.+ Ika si Jehova, asin an saimong panganuron nakatindog sa ibabaw ninda, asin nasa inutan ka ninda paagi sa hariging panganuron pag aldaw asin paagi sa hariging kalayo pag banggi.+ 15 Kun uubuson mong garadanon nin sabay-sabay* an mga tawong ini, arog kaini an sasabihon kan mga nasyon na nakaaram kan saimong kabantugan: 16 ‘Dai nagibong darahon ni Jehova an banwaan na ini sa daga na isinumpa niyang itatao sa sainda, kaya ginaradan niya sinda sa kaawagan.’+ 17 Ipahiling mo tabi ngunyan Jehova an saimong dakulang kapangyarihan, arog kan ipinanuga mo kan ika magsabi: 18 ‘Si Jehova, dai tulos naaanggot asin abunda sa maimbod na pagkamuot,*+ nagpapatawad nin salang gibo asin paglapas, pero dai niya nanggad papabayaan na dai mapadusahan an may sála, nagpapadusa sa mga aki huli sa pagkakasala kan saindang mga ama, sagkod sa ikatulong henerasyon asin sagkod sa ikaapat na henerasyon.’+ 19 Patawadon mo tabi an pagkakasala kan banwaan na ini kauyon kan saimong dakulang maimbod na pagkamuot, arog kan pagpatawad mo sa banwaan na ini puon pa kaidto sa Ehipto sagkod ngunyan.”+

20 Dangan sinabi ni Jehova: “Pinapatawad ko na sinda kauyon kan sinabi mo.+ 21 Pero, maski pa arog kaiyan, isinusumpa ko sa sadiri ko,* an bilog na daga mapapano kan kamurawayan ni Jehova.+ 22 Alagad, sa mga nakahiling kan sakuyang kamurawayan asin kan sakuyang mga tanda+ na ginibo ko sa Ehipto saka sa kaawagan pero padagos pa man giraray na nagpurbar sa sako+ nin sampulong beses asin dai nagdangog sa sako,+ mayo ni saro sa sainda 23 an makakahiling kan daga na isinumpa kong itatao sa saindang mga ama. Mayo ni saro sa mga daing paggalang sa sako an makakahiling kaiyan.+ 24 Pero dahil naiiba* an sakuyang lingkod na si Caleb+ asin padagos siyang nagsunod sa sako nin bilog na puso, dadarahon ko nanggad siya sa dagang pigdumanan niya, asin magigin sadiri iyan kan saiyang mga gikan.+ 25 Huling nakaistar an mga Amalekita asin an mga Canaanita+ sa kababan,* sa aga bumalik kamo sa kaawagan asin mag-agi kamo sa dalan na pasiring sa Dagat na Pula.”+

26 Dangan sinabi ni Jehova ki Moises saka ki Aaron: 27 “Sagkod nuarin magpaparagurumod-gumod laban sa sako an maraot na katiripunan na ini?+ Nadangog ko kun ano an pigpaparagurumod-gumod kan mga Israelita laban sa sako.+ 28 Sabihon nindo sa sainda, ‘“Isinusumpa ko sa sadiri ko,”* an sabi ni Jehova, “gigibuhon ko sa saindo an nadangog kong pigsarabi nindo!+ 29 Magkakagaradan kamo sa kaawagan na ini,+ iyo, an gabos na nakarehistro na 20 anyos pataas, kamo gabos na naggurumod-gumod laban sa sako.+ 30 Dai nin siisay man sa saindo an makakalaog sa daga na isinumpa ko* na papaistaran sa saindo,+ apuwera ki Caleb na aki ni Jefunne asin ki Josue na aki ni Nun.+

31 “‘“Kun manungod sa mga aki nindo na sinabi nindong magigin mga samsam,+ dadarahon ko sinda duman, asin mahihiling nanggad ninda an daga na hinabuan nindo.+ 32 Pero kamo, magkakagaradan kamo sa kaawagan na ini. 33 Asin an saindong mga aki magigin mga pastor sa kaawagan sa laog nin 40 taon,+ asin maninimbag sinda dahil sa pagigin bakong maimbod nindo,* sagkod na maubos kamong magadan sa kaawagan.+ 34 Sigun sa bilang kan aldaw na nag-espiya kamo sa dagang idto, 40 aldaw,+ sarong aldaw para sa sarong taon, sarong aldaw para sa sarong taon, maninimbag kamo sa saindong pagkakasala sa laog nin 40 taon,+ asin maaaraman nindo kun ano an resulta kan pagtumang sa sako.*

35 “‘“Ako, si Jehova, an nagsabi kaini. Ini an gigibuhon ko sa bilog na maraot na katiripunan na ini, sa mga nagtiripon laban sa sako: Sa kaawagan na ini an magigin katapusan ninda, asin digdi sinda magagadan.+ 36 An mga lalaking sinugo ni Moises na mag-espiya sa dagang idto asin nagin dahilan na maggurumod-gumod an bilog na banwaan laban sa saiya kan magbalik sinda dara an bakong magayon na bareta manungod sa dagang idto,+ 37 iyo, an mga lalaking nagdara nin bakong magayon na bareta manungod sa kadagaan, papadusahan sinda asin magagadan sa atubangan ni Jehova.+ 38 Pero magdadanay nanggad na buhay si Josue na aki ni Nun asin si Caleb na aki ni Jefunne, na kaiba sa mga nag-espiya sa kadagaan.”’”+

39 Kan sabihon iyan ni Moises sa gabos na Israelita, grabe an pagmundo kan banwaan. 40 Amay man sindang nagmata pagkaaga asin nagpurbar na tumukad pasiring sa ibabaw kan kabukidan, na sinasabi: “Nagkasala kami. Pero ngunyan handa na kaming tumukad pasiring sa lugar na sinabi ni Jehova.”+ 41 Alagad sinabi ni Moises: “Ano ta gigibuhon nindo an dai man ipinagbubuot ni Jehova? Dai iyan magigin mapanggana. 42 Dai kamo magtukad pasiring duman, ta mayo sa kaibanan nindo si Jehova; asin madadaog kamo kan saindong mga kaiwal.+ 43 Yaon duman an mga Amalekita saka an mga Canaanita para atubangon kamo,+ asin magkakagaradan kamo paagi sa espada. Dahil dai na kamo nagsusunod ki Jehova, dai kamo tatabangan ni* Jehova.”+

44 Sa ibong kaiyan, may kapangahasan sindang nagpasiring sa ibabaw kan kabukidan,+ pero an kaban kan tipan ni Jehova saka si Moises nagdanay sa tahaw kan kampo.+ 45 Dangan an mga Amalekita saka an mga Canaanita na nakaistar sa kabukidan na iyan buminaba asin sinalakay sinda tapos linapag sinda sagkod sa Horma.+