Bilang

18 Dangan sinabi ni Jehova ki Aaron: “Ika saka an saimong mga aki asin an saimong angkan an maninimbag sa ano man na pagbalga sa mga pagbuot may koneksiyon sa santuwaryo,+ asin ika saka an saimong mga aki an maninimbag sa ano man na pagbalga sa mga pagbuot may koneksiyon sa pagkasaserdote.+ 2 Paranihon mo man an saimong mga tugang na gikan sa tribo ni Levi, an tribo kan saimong ama, tanganing tumabang sinda sa saimo asin maglingkod sa saimo+ saka sa saimong mga aki sa tolda kan Patotoo.+ 3 Uutubon ninda an saindang paninimbagan sa saimo asin sa bilog na tolda.+ Alagad, dai sinda dapat magrani sa mga kagamitan kan banal na lugar asin sa altar, tanganing sinda saka kamo dai magadan.+ 4 Matabang sinda saimo asin uutubon ninda an saindang paninimbagan sa tolda nin pakipagtagbuan saka gigibuhon ninda an gabos na paglilingkod sa tolda, pero an siisay man na bako man awtorisado* dai puwedeng magrani sa saindo.+ 5 Utubon nindo an saindong paninimbagan sa banal na lugar+ asin sa altar,+ tanganing dai na ako maanggot+ sa banwaan nin Israel. 6 Ako mismo an nagkua sa saindong mga tugang, an mga Levita, hali sa mga Israelita para itao sa saindo bilang regalo.+ Itinao sinda ki Jehova para mag-asikaso kan paglilingkod sa tolda nin pakipagtagbuan.+ 7 Ika saka an saimong mga aki an may paninimbagan sa saindong mga gibuhon bilang saserdote may koneksiyon sa altar asin sa nasa laog kan kurtina,+ asin gibuhon nindo an paglilingkod na iyan.+ Itinao ko sa saindo bilang regalo an paglilingkod bilang saserdote, asin an siisay man na magrani sa santuwaryo na bako man awtorisado* dapat na gadanon.”+

8 Sinabi pa ni Jehova ki Aaron: “Ako mismo an nagpili sa saimo na mag-asikaso kan mga kontribusyon na itinatao para sa sako.+ Itinatao ko sa saimo saka sa saimong mga aki bilang saindong permanenteng kahirasan an ibang kabtang kan gabos na banal na bagay na itinatao kan mga Israelita.+ 9 Ini an mga mapapasaimo hali sa kabanal-banaling mga dulot na pinaagi sa kalayo: an lambang dulot na dadarahon ninda sa sako—an saindang mga dulot na tipasi,+ an saindang mga dulot para sa kasalan,+ asin an saindang mga dulot para sa pagkakasala.+ Kabanal-banali an mga dulot na iyan asin para iyan sa saimo saka sa saimong mga aki. 10 Kakanon mo iyan sa sarong kabanal-banaling lugar.+ Puwede iyan kakanon kan lambang lalaki. Magigin banal iyan para sa saimo.+ 11 Mapapasaimo man ini: an mga porsiyon na isinusuway bilang kontribusyon+ hali sa saindang mga dulot saka an gabos na dulot na pigtuturutabyon+ kan mga Israelita. Itinatao ko an mga iyan sa saimo saka sa saimong mga aking lalaki asin mga aking babayi bilang permanenteng kahirasan nindo.+ Puwedeng magkakan kaiyan an gabos na malinig sa saimong pamilya.+

12 “Itinatao ko saimo an gabos na pinakamarahay na lana asin an gabos na pinakamarahay na bagong arak asin tipasi, an saindang mga inot na bunga,+ na itinatao ninda ki Jehova.+ 13 Mapapasaimo an mga inot na hinog na bunga kan gabos na hali sa saindang daga, na dadarahon ninda ki Jehova.+ Puwedeng magkakan kaiyan an gabos na malinig sa saimong pamilya.

14 “Mapapasaimo an gabos na bagay sa Israel na idinusay.*+

15 “Mapapasaimo an lambang panganay kan gabos na nabubuhay na linalang*+ na idudulot ninda ki Jehova, iyan man tawo o hayop. Alagad, dapat nanggad na balukaton an panganay kan katawuhan,+ asin dapat man na balukaton an inot na ugbon kan mga maating hayop.+ 16 Pag iyan sarong bulan na pataas, dapat tubuson iyan kan halagang pambalukat sigun sa tamang kantidad na limang siklong* pirak,+ na uyon sa siklo kan banal na lugar.* An sarong siklo katumbas nin 20 gerah.* 17 An dai sana babalukaton iyo an inot na ugbon na torong baka o an inot na ugbon na lalaking kordero o an inot na ugbon na kanding.+ Banal an mga iyan. Iwirik mo an mga dugo kaiyan sa altar+ asin paasuhon mo an mga taba kaiyan bilang dulot na pinaagi sa kalayo na an parong nakakapaginhawa* ki Jehova.+ 18 Asin magigin saimo an karne kaiyan arog kan daghan na dulot na pigtuturutabyon asin arog kan tuong paa.+ 19 Itinatao ko sa saimo saka sa saimong mga aking lalaki asin mga aking babayi bilang saindong permanenteng kahirasan+ an gabos na banal na kontribusyon na itinatao kan mga Israelita ki Jehova.+ Saro iyan na nagdadanay na tipan nin asin* sa pag-ultanan nindo ni Jehova saka kan saimong mga gikan.”

20 Sinabi pa ni Jehova ki Aaron: “Dai ka magkakaigwa nin mana sa daga nin Israel, asin mayong parte kan dagang iyan an magigin kahirasan mo.+ Ako an saimong kahirasan asin an saimong mana sa banwaan nin Israel.+

21 “Itinatao ko sa mga aki ni Levi an gabos na ikasampulong kabtang+ sa Israel bilang saindang mana karibay kan ginigibo nindang paglilingkod sa tolda nin pakipagtagbuan. 22 Dai na puwedeng magrani an banwaan nin Israel sa tolda nin pakipagtagbuan, ta kun marani sinda, magkakasala sinda asin magagadan. 23 An mga Levita an maglilingkod sa tolda nin pakipagtagbuan, asin sinda an maninimbag sa pagkakasala kan banwaan.+ Dai sinda dapat magkaigwa nin sadiring daga sa banwaan nin Israel bilang mana. Saro ining nagdadanay na reglamento para sa gabos nindong henerasyon.+ 24 Huli ta itinatao ko sa mga Levita bilang saindang mana an ikasampulong kabtang na itinatao kan banwaan nin Israel, na itinatao ninda ki Jehova bilang kontribusyon. Iyan an dahilan kaya sinabi ko sa sainda, ‘Sa banwaan nin Israel, dai sinda dapat magkaigwa nin sadiring daga bilang mana.’”+

25 Dangan sinabi ni Jehova ki Moises: 26 “Sabihan mo an mga Levita, ‘Mareresibi nindo hali sa mga Israelita an ikasampulong kabtang na itinatao ko sa saindo bilang saindong mana,+ asin dapat nindong itao ki Jehova bilang kontribusyon an ikasampulong kabtang kan ikasampulong kabtang na iyan.+ 27 Asin ibibilang iyan na saindong kontribusyon; an tipasi, an arak, o an lana magigin garo man sana hali sa sadiri nindong ginikan,+ pugaan nin ubas, o gibuhan nin lana. 28 Sa paaging iyan, makakatao man kamo ki Jehova nin kontribusyon hali sa gabos na ikasampulong kabtang na nareresibi nindo sa mga Israelita. Hali diyan itao nindo ki Aaron na saserdote an kontribusyon na para ki Jehova. 29 Hali sa lambang klase nin regalo na itinatao sa saindo, itao nindo ki Jehova bilang kontribusyon an pinakamarahay kaiyan+ bilang banal na bagay.’

30 “Asin sabihon mo sa sainda, ‘Pag itinatao nindo an pinakamarahay hali sa mga nareresibi nindo, magigin nang saindo na mga Levita an matatada sa tipasi, sa arak, o sa lana, na garo man sana an mga iyan hali sa sadiri nindong ginikan, pugaan nin ubas, o gibuhan nin lana. 31 Puwede nindong kakanon iyan asin kan saindong pamilya maski sain na lugar, huling kabayadan iyan sa saindo karibay kan paglilingkod nindo sa tolda nin pakipagtagbuan.+ 32 Dai kamo magkakasala sa bagay na ini sagkod na itinatao nindo an pinakamarahay sa mga iyan, asin dai nindo paglapastanganon an mga banal na bagay kan mga Israelita, ta pag ginibo nindo iyan, magagadan kamo.’”+