Inot na Samuel

30 Bago mag-abot sa Ziklag+ si David saka an saiyang mga tawuhan kan ikatulong aldaw, sinalakay kan mga Amalekita+ an timog* saka an Ziklag, asin sinulo ninda an Ziklag. 2 Dinara nindang bihag an mga babayi+ asin an gabos na yaon duman. Mayo sindang ginadan, pero gabos dinara ninda paghali ninda. 3 Kan mag-abot si David asin an mga tawuhan niya, nahiling nindang sulo na an siyudad, asin dinarang bihag an saindang mga agom asin mga aki nindang lalaki saka babayi. 4 Kaya nagparatangis nin makusog si David asin an saiyang mga tawuhan sagkod na maubusan sinda nin kusog na magtangis pa. 5 Dinarang bihag man an duwang agom ni David na si Ahinoam na taga Jezreel saka si Abigail, an balo ni Nabal na taga Carmel.+ 6 Napurisaw na marhay si David ta pinag-uurulayan kan mga tawuhan niya na gapuon siya. Angguton kaya an gabos niyang tawuhan* huli sa pagkawara kan saindang mga aking lalaki saka aking babayi. Alagad pinakusog ni David an saiyang sadiri paagi ki Jehova na saiyang Diyos.+

7 Dangan sinabi ni David sa saserdoteng si Abiatar+ na aki ni Ahimelec: “Daraha tabi digdi an efod.”+ Kaya dinara ni Abiatar ki David an efod. 8 Naghapot si David ki Jehova:+ “Dapat ko daw na lapagon an tropang idto nin mga parasamsam? Maaabutan ko pa daw sinda?” Sinabi Niya sa saiya: “Lapagon mo sinda, ta siguradong maaabutan mo pa sinda asin maisasalbar mo gabos na kinurua ninda.”+

9 Dali-daling naghali si David kaiba an 600 niyang tawuhan+ sagkod na makaabot sinda sa Sulugan na Kababan* nin Besor, kun sain nagpawalat an iba niyang tawuhan. 10 Ipinagpadagos ni David an paglapag kaiba an 400 niyang tawuhan, huling nagpawalat na su 200 ta paragal nang marhay asin dai na kayang magbalyo sa Sulugan na Kababan nin Besor.+

11 Nanumpungan ninda sa kalangtadan an sarong Ehipsiyo asin dinara ninda siya ki David. Tinawan ninda siya nin kakanon asin tubig, 12 saka sarong pidaso nin tinapay na gibo sa pinilpig na igos asin duwang tinapay na gibo sa pasas. Pagkatapos niyang magkakan, nagkusog na siya giraray,* ta tulong aldaw asin tulong banggi na siyang mayong kinakakan na ano man o iniinom na tubig. 13 Hinapot siya ni David: “Kiisay kang lingkod, saka sain ka hali?” Nagsimbag siya: “Ehipsiyo ako, asin uripon nin sarong Amalekita, pero binayaan ako kan sakong kagurangnan ta nagkahilang ako, tulong aldaw na an nakaagi. 14 Nanalakay kami sa timog* kan teritoryo kan mga Keretita+ asin sa teritoryo kan Juda saka sa timog* kan teritoryo ni Caleb,+ tapos sinulo mi an Ziklag.” 15 Kaya sinabi ni David sa saiya: “Puwede mo akong ibanan pasiring sa tropang ini nin mga parasamsam?” Nagsimbag siya: “Kun isusumpa mo nguna sa ngaran nin Diyos na dai mo ako gagadanon saka dai mo ako ibabalik sa sakong kagurangnan, iibanan taka pasiring sa tropang ini nin mga parasalakat.”

16 Kaya inibanan niya si David sa lugar kun sain suruway-suway an mga parasamsam, na nagkakarakan asin nag-iirinom saka nagseselebrar huling kadakul nindang nasamsam sa daga kan mga Filisteo asin sa daga nin Juda. 17 Dangan ginaradan sinda ni David puon sa mag-aagahon sagkod sa pagsulnop kan aldaw;* mayo ni saro an nakadulag+ apuwera duman sa 400 na nagsakay sa mga kamelyo asin nagdurulag. 18 Nabawi ni David an gabos na kinurua kan mga Amalekita,+ asin naisalbar ni David an duwa niyang agom. 19 Mayo nin nawara sa gabos na kinua sa sainda, puon sa pinakaaki sagkod sa pinakagurang. Nabawi ninda an saindang mga aking lalaki saka aking babayi asin an mga sinamsam sa sainda.+ Nabawi ni David an gabos na kinurua kan mga Amalekita. 20 Kaya kinurua ni David an gabos na karnero saka baka kan mga Amalekita, asin dinara an mga ini kan saiyang mga tawuhan sa inutan kan sadiri nindang mga hayop na nabawi ninda. Asin sinarabi ninda: “Ini an mga samsam ni David.”

21 Dangan binalikan ni David an 200 niyang tawuhan na dai na nakaiba sa saiya huli sa sobrang kapagalan asin nagpawalat na sana sa Sulugan na Kababan nin Besor.+ Sinabat ninda si David saka an mga kaiba niya. Kan harani na si David sa sainda, kinumusta niya sinda. 22 Alagad an nagkapirang maraot saka daing kuwentang lalaki na nag-iba ki David nagsarabi: “Dai man sinda nag-iba sa sato, kaya dai niyato sinda dapat tawan nin ano man sa mga nabawi tang samsam. Kuanon lang ninda an mga agom ninda saka mga aki, tapos puwede na sindang humali.” 23 Pero sinabi ni David: “Mga tugang ko, dai nindo ini paggibuhon sa itinao sa sato ni Jehova. Prinotektaran niya kita tapos itinao niya sa satong kamot an tropang nanalakat sa sato.+ 24 Sa paghuna nindo may mauyon sa sinabi nindong ini? An kahirasan kan saro na nag-iba sa ralaban magigin kapareho lang sa kahirasan kan saro na nagbantay sa mga bagahe.+ Gabos dapat may kahirasan.”+ 25 Asin an sinabing ini ni David nagin regulasyon asin patakaran sa Israel puon kan aldaw na idto sagkod ngunyan.

26 Pagbalik ni David sa Ziklag, ipinadara niya sa kamagurangan kan Juda, na mga amigo niya, an iba sa mga samsam, na sinasabi: “Regalo* ini sa saindo hali sa mga nasamsam mi sa mga kaiwal ni Jehova.” 27 Ipinadara an mga regalo sa kamagurangan na yaon sa Bethel,+ sa Ramot kan Negeb,* sa Jatir,+ 28 sa Aroer, sa Sifmot, sa Estemoa,+ 29 sa Racal, sa mga siyudad kan mga Jerameelita,+ sa mga siyudad kan mga Kenita,+ 30 sa Horma,+ sa Borasan, sa Atac, 31 sa Hebron,+ asin sa kamagurangan kan gabos na lugar na parating dinudumanan ni David asin kan saiyang mga tawuhan.