Inot na Cronica

17 Kan nag-iistar na si David sa sadiri niyang harong,* sinabi niya ki Natan+ na propeta: “Nag-iistar ako sa harong na gibo sa kahoy na sedro+ pero an kaban kan tipan ni Jehova nakabugtak sa sarong tolda.”+ 2 Nagsimbag si Natan ki David: “Gibuha an ano man na nasa puso mo, ta nasa kaibanan mo an tunay na Diyos.”

3 Kan mismong bangging idto, uminabot ki Natan an tataramon nin Diyos, na an sabi: 4 “Magduman ka sa lingkod kong si David asin sabihon mo saiya, ‘Ini an sabi ni Jehova: “Bako ika an matugdok kan harong na magigin sakong irukan.+ 5 Dai pa ako nag-irok sa sarong harong puon kan aldaw na iluwas ko an Israel sagkod sa aldaw na ini, kundi padagos akong nagpaburubalyo nin tolda asin tabernakulo.*+ 6 Sa bilog na panahon na iyan na nagpaburubalyo ako kaiba kan bilog na Israel, nagsabi daw ako sa saro sa mga hukom kan Israel na ninombrahan kong magpastor sa sakong banwaan, ‘Taano ta dai nindo ako itinutugdok nin harong na gibo sa sedro?’”’

7 “Sabihon mo ngunyan sa lingkod kong si David, ‘Ini an sabi ni Jehova na pamayo nin mga hukbo: “Kinua taka hali sa mga lugar na pasabsaban, dai taka na pinapag-ataman nin aripumpon, tanganing gibuhon kang lider kan banwaan kong Israel.+ 8 Aantabayanan taka sain ka man magduman,+ saka gagaradanon* ko sa atubangan mo an gabos mong kalaban;+ asin papabantugon ko an saimong pangaran kapareho kan pangaran kan mga bantog na tawo sa daga.+ 9 Matalaga ako nin lugar para sa banwaan kong Israel asin papaistaron ko sinda diyan. Maistar sinda diyan asin dai na madidisturbo; asin dai na sinda aapihon* kan mararaot na tawo arog kan ginibo ninda kan nakaagi,+ 10 puon kan aldaw na magnombra ako nin mga hukom para sa banwaan kong Israel.+ Asin dadaugon ko an gabos mong kalaban.+ Sinabi ko man sa saimo, ‘Magibo si Jehova para sa saimo nin sarong dinastiya nin mga hadi.’*

11 “‘“Kun ika magadan asin ilubong sa kaibanan kan saimong mga apuon, gigibuhon kong hadi na kasalida mo an saimong gikan,* an saro sa saimong mga aking lalaki,+ asin eestablisaron ko nin marigon an saiyang pagkahadi.+ 12 Siya an matugdok nin harong para sa sako,+ asin eestablisaron ko nin marigon an saiyang trono sagkod lamang.+ 13 Ako magigin saiyang ama, asin siya magigin sakuyang aki.+ Dai ko hahalion sa saiya an sakong maimbod na pagkamuot,+ kun paanong hinali ko iyan sa saro na nainot sa saimo.+ 14 Nonombrahan ko siya sa sakong harong asin sa sakong kahadian sagkod lamang,+ asin magdadanay sagkod lamang an saiyang trono.”’”+

15 Isinabi ni Natan ki David an gabos na tataramon na ini asin an bilog na bisyon na nahiling niya.

16 Huli kaini, naglaog si Hading David asin nagtukaw sa atubangan ni Jehova asin nagsabi: “Siisay man ako, O Diyos na Jehova? Asin siisay man an sakong pamilya* ta ginibo mo ini gabos para sa sako?+ 17 Asin garo baga kulang pa an mga ginibo mong ini, O Diyos, ta may sinambit ka pa manungod sa mangyayari sa dinastiya kan saimong lingkod sagkod sa haloy pang maabot na panahon;+ asin hiniling mo ako bilang sarong tawo na dapat pang ilangkaw,* O Diyos na Jehova. 18 Ano pa an masasabi sa saimo kan lingkod mong si David manungod sa onrang itinao sa sako, huling midbid mo nang marhay an saimong lingkod?+ 19 O Jehova, alang-alang sa saimong lingkod asin kauyon kan saimong kabutan* kun kaya ginibo mo an gabos na makangangalas na bagay na ini asin ihinayag mo an saimong kadakulaan.+ 20 O Jehova, mayo nin arog sa saimo,+ asin mayo nin ibang Diyos kundi ika sana;+ pinapatunayan ini kan gabos na nadangog mi. 21 Asin may ibang nasyon pa daw sa daga an arog sa banwaan mong Israel?+ Tinubos sinda kan tunay na Diyos bilang saiyang banwaan.+ Ibinantog mo an saimong pangaran paagi kan saimong darakula asin makangangalas na mga gibo.+ Pinalayas mo an mga nasyon sa atubangan kan saimong banwaan+ na tinubos mo sa Ehipto. 22 Ginibo mo an saimong banwaan na Israel na magin saimong banwaan sa gabos na panahon;+ asin ika, O Jehova, an nagin Diyos ninda.+ 23 O Jehova, magin totoo lugod sa gabos na panahon an ipinanuga mo manungod sa saimong lingkod saka sa saiyang pamilya, asin gibuhon mo lugod an siring sa saimong ipinanuga.+ 24 Magdanay* lugod an saimong pangaran asin pamurawayon iyan+ sagkod lamang, tanganing magsarabi an mga tawo, ‘Si Jehova na pamayo nin mga hukbo, an Diyos kan Israel, iyo an Diyos para sa Israel,’ asin lugod na marigon na maestablisar sa atubangan mo an dinastiya kan saimong lingkod na si David.+ 25 Huli ta ihinayag mo sa saimong lingkod, O sakuyang Diyos, an saimong katuyuhan na igibo siya nin sarong dinastiya nin mga hadi.* Iyan an dahilan kun taano ta may kumpiyansa an saimong lingkod na ipamibi sa saimo an pamibing ini. 26 O Jehova, ika an tunay na Diyos, asin ipinanuga mo an marahay na mga bagay na ini manungod sa saimong lingkod. 27 Kaya pagmarhayon mo lugod na bendisyunan an pamilya kan saimong lingkod, asin magdanay lugod iyan sa saimong atubangan sagkod lamang; huling ika, O Jehova, an nagbendisyon kaini, asin bebendisyunan iyan sagkod lamang.”