Ikaduwang Cronica

14 Dangan nagadan* si Abias asin ilinubong ninda siya sa Siyudad ni David;+ asin si Asa na saiyang aki an nagsalida sa saiya bilang hadi. Kan panahon niya, nagkaigwa nin kapahingaluan sa kadagaan sa laog nin sampulong taon.

2 Ginibo ni Asa kun ano an marahay asin tama sa paghiling ni Jehova na saiyang Diyos. 3 Hinali niya an mga altar para sa mga diyos kan ibang mga nasyon+ saka an mga halangkaw na lugar, pinasa an mga sagradong harigi,+ asin pinutol an mga sagradong poste.*+ 4 Sinabihan man niya an Juda na hanapon si Jehova na Diyos kan saindang mga apuon asin na sunudon an Katugunan asin an mga pagbuot. 5 Kaya hinali niya sa gabos na siyudad kan Juda an mga halangkaw na lugar saka an mga pigsusuluan nin insenso,+ asin sa pamamahala niya, padagos na nagin matuninong an kahadian. 6 Nagtugdok siya sa Juda nin mga siyudad na may matibay na depensa;+ matuninong kaya an kadagaan asin mayo nin giyera laban sa saiya kan mga taon na ini, huling tinawan siya ni Jehova nin kapahingaluan.+ 7 Sinabi niya sa Juda: “Itugdok ta an mga siyudad na ini tapos palibutan ta an mga ini nin pader asin mga tore,+ mga trangkahan* saka mga balagbag na pambarat. Huling kapot ta pa an kadagaan, dahil hinanap niyato si Jehova na satong Diyos. Hinanap ta siya, asin tinawan niya kita nin kapahingaluan sa enterong palibot.” Kaya nagin mapanggana an saindang pagtugdok.+

8 Igwa si Asa nin sarong hukbo nin 300,000 na suldados hali sa Juda, na armado nin darakulang kalasag saka mga garod. Asin an hali sa Benjamin, 280,000 na matitibay na parapakilaban na may mga pansagang* saka armado nin mga pana.*+

9 Kan huri, nag-abot laban sa sainda si Zera na Etiope kaiba an sarong hukbo nin 1,000,000 na suldados saka 300 na karwahe.+ Pag-abot niya sa Maresah,+ 10 nagluwas si Asa para labanan siya asin puminormada sinda sa Kababan nin Zefata sa Maresah para sa pakikipaglaban. 11 Dangan nag-apod si Asa ki Jehova na saiyang Diyos:+ “O Jehova, bakong problema saimo kun baga dakul o mayong kusog an mga tinatabangan mo.+ Tabangi kami, O Jehova na samuyang Diyos, huli ta sa saimo kami nananarig,*+ asin sa ngaran mo kami napadigdi tanganing labanan an dakulang hukbong ini.+ O Jehova, ika an samuyang Diyos. Dai mo tabi pagtugutan na manggana saimo an tawong mortal.”+

12 Kaya dinaog ni Jehova an mga Etiope sa atubangan ni Asa saka sa atubangan kan Juda, asin nagdurulag an mga Etiope.+ 13 Linapag sinda ni Asa asin kan saiyang mga tawuhan sagkod sa Gerar,+ asin padagos nindang ginaradan an mga Etiope sagkod sa mayo na nin natadang buhay sa sainda, huling rinunot sinda ni Jehova asin kan saiyang hukbo. Pagkatapos, dakulon na samsam an dinara kan mga lalaki kan Juda. 14 Pinabagsak man ninda an gabos na siyudad sa palibot kan Gerar, huling pinangyari ni Jehova na magkatarakot na marhay an mga ini; asin sinamsaman ninda an gabos na siyudad, huling kadakul nin masasamsam sa mga ini. 15 Sinalakay man ninda an mga tolda kan mga may ataman na mga hayop, asin kinurua ninda an dakulon na aripumpon saka kamelyo. Dangan nagbalik sinda sa Jerusalem.