Ikaduwang Cronica

25 An edad ni Amazias kan siya magin hadi 25 anyos, asin namahala siya sa Jerusalem sa laog nin 29 taon. An saiyang ina iyo si Jehoadan na taga Jerusalem.+ 2 Padagos niyang ginibo kun ano an tama sa paghiling ni Jehova, pero bako nin bilog na puso. 3 Kan kontrolado na niyang marhay an kahadian, ginaradan niya an mga lingkod niyang guminadan sa saiyang ama na hadi.+ 4 Pero dai niya ginaradan an mga aki ninda, huling huminiro siya kauyon kan nakasurat sa Katugunan, sa libro ni Moises, na diyan ipinagbuot ni Jehova: “Dai dapat magadan an mga ama huli sa pagkakasala kan saindang mga aki, asin dai dapat magadan an mga aki huli sa pagkakasala kan saindang mga ama; kundi an kada saro dapat magadan huli sa sadiri niyang pagkakasala.”+

5 Asin tinipon ni Amazias an Juda asin pinatirindog sinda sigun sa saindang mga angkan, sa pamamahala nin mga namamayo nin manangribo asin nin mga namamayo nin mananggatos sa bilog na Juda asin Benjamin.+ Irinehistro niya an mga 20 anyos pataas,+ asin naaraman niyang 300,000 sinda gabos na sinanay* na parapakilaban na maiba sa hukbo, asin kaya nindang gumamit nin garod saka dakulang kalasag. 6 May binayadan man siya na 100,000 na matitibay na parapakilaban hali sa Israel sa kantidad na 100 na talentong* pirak. 7 Alagad sarong lalaking lingkod kan tunay na Diyos an nagduman sa saiya, asin nagsabi: “O hadi, dai mo pagpaibanon saimo an hukbo kan Israel, ta si Jehova mayo sa kaibanan kan Israel,+ mayo sa kiisay man sa mga Efraimita. 8 Ika sana an maghali, humiro ka na, asin kusugi an buot mo sa pakikipaglaban. Ta kun dai, kaya kang patumbahon kan tunay na Diyos sa atubangan nin sarong kalaban, huling may kapangyarihan an Diyos na magtabang+ asin magpatumba.” 9 Huli kaini, sinabi ni Amazias sa lalaking lingkod kan tunay na Diyos: “Pero paano su 100 na talentong ibinayad ko sa mga suldados kan Israel?” Nagsimbag an lalaking lingkod kan tunay na Diyos: “Kaya kang tawan ni Jehova nin mas labi pa kaiyan.”+ 10 Kaya pinahali ni Amazias an mga suldados hali sa Efraim na nagduruman sa saiya, asin pinapuli sinda sa sadiri nindang lugar. Alagad, naanggot sindang marhay sa Juda, kaya nagpuruli sinda na grabe an kaanggutan.

11 Dangan kinusugan ni Amazias an saiyang buot asin pinanginutan an sadiri niyang mga suldados pasiring sa Kababan nin Asin,+ tapos ginaradan niya an 10,000 na lalaki kan Seir.+ 12 Asin 10,000 sa sainda an nadakop na buhay kan mga lalaki kan Juda. Kaya dinara ninda sinda sa alituktok nin sarong dakulang gapo asin ihinurulog sinda hali diyan, asin gabos sinda nagkapiridaso. 13 Pero su mga suldados na pinabaralik ni Amazias na dai niya pinaiba sa giyera,+ suminalakay sa mga siyudad kan Juda, puon sa Samaria+ sagkod sa Bet-horon;+ 3,000 katawo an ginaradan ninda duman asin kadakul nindang sinamsam.

14 Alagad pagbalik ni Amazias, pagkatapos niyang garadanon an mga Edomita, dinara niya an mga diyos kan mga lalaki kan Seir asin ipinuwesto niya an mga iyan para magin saiyang mga diyos.+ Nagpuon siyang magduko sa atubangan kan mga iyan asin magdulot sa mga iyan nin atang na aso. 15 Kaya naanggot na marhay si Jehova ki Amazias, asin nagsugo siya nin sarong propeta na nagsabi sa saiya: “Taano ta nagsusunod ka sa mga diyos na ini na dai nakapagligtas sa saimong kamot kan sadiri nindang banwaan?”+ 16 Mantang nagtataram pa siya, nagsabi an hadi: “Ninombrahan mi ika na magin parakonseho kan hadi?+ Pumundo ka!+ Gusto mong gadanon ka ninda?” Dangan dai na nagtaram an propeta, pero sinabi nguna niya: “Aram kong nagdesisyon na an Diyos na laglagon ka huling ginibo mo ini asin dai ka nagdangog sa konseho ko.”+

17 Pagkatapos niyang kumonsulta sa saiyang mga parakonseho, nagpadara si Hading Amazias kan Juda nin mensahe ki Jehoas na aki ni Jehoahaz na aki ni Jehu na hadi kan Israel, na an sabi: “Madya, maglaban* kita.”+ 18 Ini an ipinadarang mensahe ni Hading Jehoas na hadi kan Israel ki Hading Amazias kan Juda: “An matunok na duot* kan Lebanon nagpadara nin mensahe sa puon nin sedro sa Lebanon, ‘Ipaagom mo sa aki kong lalaki an aki mo.’ Alagad, sarong mabangis na hayop nin Lebanon an nag-agi asin tinimak-timakan an matunok na duot. 19 An sabi mo, ‘Hilinga! Napabagsak ko* an Edom.’+ Kaya dakula na an payo mo,* asin gusto mong pamurawayon ka. Pero magpirmi ka na lang ngunyan sa harong* mo. Taano ta nag-aagyat* ka nin kapahamakan na ikakabagsak mo man sana, tapos idadamay mo pa an Juda?”

20 Alagad dai nagdangog si Amazias,+ huling pinangyari ini kan tunay na Diyos tanganing itao sinda sa kamot kan kalaban;+ nagsurunod kaya sinda sa mga diyos kan Edom.+ 21 Kaya nagsalakay si Hading Jehoas kan Israel, asin naglaban sinda ni Hading Amazias kan Juda sa Bet-semes+ na sakop kan Juda. 22 Nadaog kan Israel an Juda, kaya nagdurulag an kada saro papuli sa kanya-kanya nindang harong.* 23 Nadakop sa Bet-semes ni Hading Jehoas kan Israel si Hading Amazias kan Juda na aki ni Jehoas na aki ni Jehoahaz.* Dangan dinara siya ni Jehoas sa Jerusalem, asin rinumpag niya an sarong parte kan pader kan Jerusalem, puon sa Trangkahan nin Efraim+ sagkod sa Kantong Trangkahan+ na 400 na maniko* an laba. 24 Kinua niya ki* Obed-edom an gabos na bulawan saka plata asin an gabos na kagamitan na yaon sa harong kan tunay na Diyos saka an yaon sa mga sarayan nin kayamanan sa harong* kan hadi,+ asin nagdara man siya nin mga bihag. Dangan nagbalik siya sa Samaria.

25 Nabuhay pa nin 15 taon si Amazias+ na aki ni Jehoas na hadi kan Juda pagkagadan ni Jehoas+ na aki ni Jehoahaz na hadi kan Israel.+ 26 Kun manungod sa iba pang nangyari sa buhay ni Amazias, puon sa kapinunan sagkod sa katapusan, bakong nakasurat iyan sa Libro kan mga Hadi kan Juda asin kan Israel? 27 Puon kan dai na magsunod ki Jehova si Amazias, nagkurumplutan sinda+ laban sa saiya sa Jerusalem, kaya nagdulag siya pasiring sa Lakis, pero pinasundan ninda siya sa Lakis asin ginadan siya duman. 28 Kaya dinara ninda siya pabalik sakay nin mga kabayo asin ilinubong sa siyudad kan Juda sa kaibanan kan saiyang mga apuon.