Inot na Samuel

25 Pag-abot nin panahon, nagadan si Samuel.+ Nagtiripon an bilog na Israel tanganing ipagmundo an pagkagadan niya asin ilubong siya sa may harong niya sa Rama.+ Dangan naghali si David asin nagpasiring sa kaawagan nin Paran.

2 Igwa nin sarong lalaki sa Maon+ na an patrabaho yaon sa Carmel.*+ Mayamanon an lalaki; igwa siya nin 3,000 na karnero asin 1,000 kanding, asin nagpapagunting siya kaidto kan saiyang mga karnero sa Carmel. 3 An pangaran niya Nabal,+ asin an agom niya Abigail.+ Mapagmansay asin magayon na babayi si Abigail, pero an agom niya na hali sa pamilya ni Caleb,+ maisog saka maraot an ugali.+ 4 Mantang nasa kaawagan si David, nabaretaan niyang nagpapagunting si Nabal kan saiyang mga karnero. 5 Kaya nagsugo si David nin sampulong hoben na tawuhan tanganing magduman ki Nabal, asin sinabi niya sa sainda: “Magtukad kamo sa Carmel, asin pag-abot nindo ki Nabal, ikumusta nindo ako sa saiya. 6 Tapos sabihon nindo, ‘Magkaigwa ka lugod nin halawig na buhay asin magin marahay lugod an kamugtakan mo* asin lugod na magin marahay man an kamugtakan kan saimong pamilya saka kan gabos na yaon sa saimo. 7 Nabaretaan kong nagpapagunting ka kan saimong mga karnero. Kan makaibanan mi an saimong mga pastor, dai mi sinda inano,+ asin dai man sinda nawaran nin ano man sa bilog na panahon na yaon sinda sa Carmel. 8 Haputon mo sinda, ta sasabihon ninda sa saimo. Magin mabuot ka lugod sa mga tawuhan ko, huling sa maugmang panahon* kami nagdigdi. Tawan mo man tabi an saimong mga lingkod asin an aki mong si David nin ano man na maitatao mo.’”+

9 Kaya nagpasiring ki Nabal an mga hoben na tawuhan ni David asin sinabi ninda sa saiya an gabos na sinabi ni David. Pagkatapos nindang magtaram, 10 nagsimbag si Nabal sa mga lingkod ni David: “Siisay man si David, an aki na iyan ni Jesse? Kadakul na talaga ngunyan nin mga suruguon na minalayas sa saindang amo.+ 11 Kukuanon ko daw an sakong tinapay, tubig, pati an karne kan mga hayop na binuno ko para sa sakong mga paragunting, tapos itatao ko sa mga tawo na dai ko ngani aram kun sain harali?”

12 Kaya nagbalik an mga hoben na tawuhan ni David asin ipinaaram ninda sa saiya an gabos na sinabing ini ni Nabal. 13 Tulos-tulos na sinabihan ni David an mga tawuhan niya: “Kamo gabos, isukbit nindo an saindong espada!”+ Kaya isinukbit kan gabos an saindang espada asin isinukbit man ni David an espada niya. Mga 400 na tawuhan an nagtukad kaiba ni David, mantang 200 na tawuhan an nawalat para magbantay sa mga bagahe.

14 Saro sa mga suruguon an nagsumbong ki Abigail na agom ni Nabal: “Nagsugo si David nin mga mensahero hali sa kaawagan tanganing kumustahon an samong amo, pero sinilyakan niya sinda nin mga pang-iinsulto.+ 15 Marahay an pagtratar kan mga lalaking idto sa samo. Dai ninda kami ginibuhan nin maraot, saka sa bilog na panahon na kaibanan mi sinda sa kalangtadan mayo nin ano man na nawara sa samo.+ 16 Sa bilog na panahon na kaiba mi sinda, nagin sindang siring sa pader na nagpoprotektar sa palibot mi, aldaw-banggi, mantang pinapasturan mi an aripumpon. 17 Magdesisyon ka tabi kun ano an gigibuhon, huling siguradong maresulta ini sa kapahamakan sa samong amo, asin sa bilog niyang pamilya.*+ Saro pa, dai siyang kuwentang* tawo+ mala ta dai siya makaulay nin siisay man.”

18 Kaya dali-daling nagkua si Abigail+ nin 200 na tinapay, duwang dakulang dulay nin arak, limang binuno nang karnero, limang takad na seah* nin sinanlag na mga tipasi, 100 na tinapay na gibo sa pasas, saka 200 na tinapay na gibo sa pinilpig na igos,* asin ikinarga iyan gabos sa mga asno.+ 19 Dangan sinabi niya sa saiyang mga suruguon: “Mag-inot na kamo. Masunod ako saindo.” Alagad dai niya ini ipinaaram sa agom niyang si Nabal.

20 Mantang nakasakay siya sa asno asin pababa sa parteng nalilipudan kan bukid, pababa man pasiring sa saiya si David saka an mga tawuhan kaini, asin sinabat niya sinda. 21 Bago kaini, nagsabi si David: “Sayang lang su ginibo kong pagbantay sa mga pagsadiri kan tawong iyan duman sa kaawagan. Mayo ni saro an nawara sa pagsadiri niya,+ pero maraot an ibinalos niya sa mga marahay na ginibo ko sa saiya.+ 22 Padusahan lugod nin Diyos nin magabat an mga kalaban ni David* kun dai ko maubos magadan sagkod sa aga an gabos na lalaking* tawuhan niya.”

23 Kan mahiling ni Abigail si David, dali-dali siyang nagbaba sa asno asin nagluhod siya saka nagduko sa atubangan ni David. 24 Suminubsob siya sa may pamitisan ni David asin nagsabi: “Kagurangnan ko, ako na sana an basulon nindo; tugutan mo tabing magtaram an saimong suruguon na babayi, asin dangugon mo an sasabihon kan saimong suruguon na babayi. 25 Dai na lang tabi pag-intindihon kan kagurangnan ko an daing kuwentang tawong ini na si Nabal,+ huling bagay na bagay sa saiya an pangaran niya. Nabal* an saiyang pangaran, asin dai niya piggagamit an saiyang isip. Dai kaya nahiling kan saimong suruguon na babayi an mga isinugo mong tawuhan. 26 Kagurangnan ko, isinusumpa ko sa ngaran kan buhay na Diyos na si Jehova asin sa atubangan mo* na si Jehova an nagpugol sa saimo+ para dai ka manggadan*+ asin dai mangyaring ika mismo an gumibo nin pamamalos.* Magin arog man lugod ni Nabal an mga kalaban mo, kagurangnan ko, asin an gabos na gustong gumibo nin maraot saimo. 27 Ini tabing regalo*+ na dinara sa saimo kan saimong suruguon na babayi pakitao sa mga tawuhan mo, kagurangnan ko.+ 28 Patawada tabi an paglapas kan saimong suruguon na babayi huling sigurado nanggad na papangyarihon ni Jehova na magdanay sa saimong mga gikan an pamamahala bilang hadi,+ huli ta mga giyera ni Jehova an ipinapakipaglaban mo,+ kagurangnan ko, asin sa saimo, mayong manunumpungan na karatan sa bilog mong buhay.+ 29 Kun igwang malapag sa saimo asin gusto kang gadanon,* ilalaog ni Jehova na saimong Diyos sa bag nin buhay an saimong buhay,* kagurangnan ko, tanganing proteksiyunan iyan, pero an buhay* kan saimong mga kalaban ibabaribad niya siring sa mga gapong ilinalagpitaw.* 30 Asin kun magibo na ni Jehova para sa saimo, kagurangnan ko, an gabos na marahay na bagay na ipinanuga niya, asin kun nombrahan ka na niya na magin lider kan Israel,+ 31 mayo kang ikakamundo o pagbabasulan* dahil dai ka nagpabulos nin dugo na mayo man nin dahilan asin dai mo ibinugtak sa saimong mga kamot an pamamalos.*+ Kun bendisyunan ka na ni Jehova, kagurangnan ko, girumduma man tabi an saimong suruguon na babayi.”

32 Kaya sinabi ni David ki Abigail: “Umawon lugod si Jehova na Diyos kan Israel, na nagsugo sa saimo sa aldaw na ini tanganing sabaton ako! 33 Asin bendisyunan ka lugod huli sa marahay mong pagmansay! Bendisyunan ka lugod huling pinugulan mo ako sa aldaw na ini na manggadan,*+ kaya dai nangyaring ako mismo an gumibo nin pamamalos.* 34 Isinusumpa ko sa ngaran kan buhay na Diyos kan Israel na si Jehova, na nagpugol sa sako na gibuhan ka nin maraot,+ mayo kutanang matatadang buhay sa aga sa mga lalaking* tawuhan ni Nabal+ kun dai ka naghidaling sabaton ako.”+ 35 Dangan inako ni David an mga dara ni Abigail asin nagsabi sa saiya: “Sige na, magpuli ka sa harong mo nin may katuninungan. Dinangog ko an mga sinabi mo, asin gigibuhon ko an pakiulay mo.”

36 Pagkapuli ni Abigail, naabutan niyang naghanda si Nabal sa saiyang harong nin sarong bangkete na garo man sana bangkete nin sarong hadi. Maugmahon si Nabal* asin grabe an pagkaburat kaini. Kaya sagkod sa kinaagahan, dai siyang sinabi ki Nabal na ano man manungod sa mga nangyari. 37 Pagkaaga, kan bako nang burat si Nabal, sinabi kan saiyang agom an manungod sa bagay na ini. Asin an puso niya nagin siring sa puso nin gadan na tawo, asin naparalisado siya na siring sa gapo. 38 Pakalihis nin mga sampulong aldaw, hinampak ni Jehova si Nabal asin nagadan ini.

39 Kan mabaretaan ni David na nagadan si Nabal, sinabi niya: “Umawon si Jehova, na nagdepensa sa sako+ pagkatapos na tuya-tuyaon ako ni Nabal+ asin ilinikay niya an saiyang lingkod na makagibo nin maraot.+ Ibinalik ni Jehova ki Nabal an karatan kaini!” Dangan nagpadara si David nin mensahe ki Abigail na gusto niya siyang magin agom. 40 Kaya nagpasiring ki Abigail sa Carmel an mga lingkod ni David asin sinabi sa saiya: “Pinadigdi kami ni David tanganing iiba ka para magin agom niya.” 41 Nagtindog tulos siya, nagduko, asin nagsabi: “Uni an saimong uripon bilang suruguon na mahanaw kan mga bitis+ kan mga lingkod kan sakuyang kagurangnan.” 42 Dangan dali-daling nagpreparar si Abigail+ asin nagsakay sa saiyang asno; kaiba niya an lima niyang suruguon na babayi na naglakaw na kasunod niya. Nag-iba siya sa mga mensahero ni David asin nagin siyang agom niya.

43 Agom na kaidto ni David si Ahinoam+ na taga Jezreel,+ kaya nagin agom niya an duwang babayi.+

44 Pero an agom ni David na si Mical+ na aki ni Saul, ipinaagom ni Saul ki Palti+ na aki ni Lais, na taga Galim.