Ikaduwang Cronica

13 Kan ika-18 taon ni Hading Jeroboam, nagin hadi sa Juda si Abias.+ 2 Tulong taon siyang naghadi sa Jerusalem. An saiyang ina iyo si Micaias*+ na aki ni Uriel na taga Gibeah.+ Asin nagkaigwa nin giyera sa pag-ultanan ni Abias asin Jeroboam.+

3 Kaya nakigiyera si Abias kaiba an hukbo nin 400,000 na matitibay saka sinanay* na parapakilaban.+ Puminormada man sa ralaban si Jeroboam kaiba an 800,000 na sinanay* saka matitibay na parapakilaban tanganing makipaglaban sa saiya. 4 Nagtindog si Abias sa Bukid nin Zemaraim, na nasa kabukidan nin Efraim, asin nagsabi: “Magdangog kamo sako, O Jeroboam asin bilog na Israel. 5 Dai kamo nakakaisi na si Jehova na Diyos kan Israel nagtao ki David nin sarong kahadian sa Israel sagkod lamang,+ sa saiya asin sa saiyang mga aki,+ paagi sa sarong tipan nin asin?*+ 6 Pero nagrebelde sa saiyang kagurangnan si Jeroboam+ na aki ni Nebat, na lingkod ni Solomon na aki ni David.+ 7 Padagos na nag-iba sa saiya an mga hugakon saka daing serbing mga lalaki. Asin nagin mas makusog sinda kisa ki Rehoboam na aki ni Solomon kan si Rehoboam hoben pa saka maluya an buot, asin dai niya sinda kayang labanan.

8 “Asin ngunyan, pighuhuna nindo na kaya nindong labanan an kahadian ni Jehova na nasa kamot kan mga aki ni David miling dakulon kamo asin yaon sa saindo an mga bulawan na ugbon na baka na ginibo ni Jeroboam para magin saindong mga diyos.+ 9 Bakong pinalayas nindo an mga saserdote ni Jehova,+ na mga gikan ni Aaron, saka an mga Levita, asin bakong nagnombra kamo nin sadiri nindong mga saserdote arog kan mga tawo kan ibang mga nasyon?+ An siisay man na mag-abot na may darang* sarong torilyong baka asin pitong lalaking karnero puwedeng magin saserdote kan bako man mga diyos. 10 Pero para sa samo, si Jehova an samong Diyos,+ asin dai mi siya binayaan; naglilingkod ki Jehova an samong mga saserdote na mga gikan ni Aaron, asin tinatabangan sinda kan mga Levita sa mga gibuhon. 11 Nagpapaaso sinda nin mga dulot na pigtututong para ki Jehova kada aga asin kada banggi+ kaiba an mahamot na insenso,+ asin ilinalaag ninda sa purong bulawan na lamesa an patong-patong na tinapay,*+ asin sinusuluan ninda kada banggi an mga ilawan+ sa bulawan na kandelero,+ huling ginigibo mi an mga responsabilidad mi ki Jehova na samong Diyos; pero kamo, binayaan nindo siya. 12 Ngunyan hilingon nindo! Nasa kaibanan mi an tunay na Diyos asin siya an nanginginot sa samo. Kaiba mi an saiyang mga saserdote na igwa kan mga trumpeta tanganing iyo an magpatanog kan senyal nin pakikipaglaban sa saindo. O mga lalaki kan Israel, dai kamo makipaglaban ki Jehova na Diyos kan saindong mga apuon, ta dai kamo manggagana.”+

13 Alagad nagsugo si Jeroboam nin mga matambang sa likod, kaya an saiyang hukbo yaon sa atubangan kan Juda asin an mga matambang yaon sa likod kan mga ini. 14 Kan magsalingoy an mga lalaki kan Juda, nahiling nindang kaipuhan nindang makipaglaban sa atubangan asin sa likudan. Kaya nag-arapod sinda ki Jehova,+ mantang makusog na pinapatanog kan mga saserdote an mga trumpeta. 15 Dangan nagkururahaw an mga lalaki kan Juda nin kurahaw nin pakikipaglaban, asin pagkakurahaw ninda nin kurahaw nin pakikipaglaban, dinaog kan tunay na Diyos si Jeroboam saka an bilog na Israel sa atubangan ni Abias asin kan Juda. 16 Nagdurulag an mga Israelita sa atubangan kan Juda, asin itinao sinda nin Diyos sa saindang kamot. 17 Dakul an ginaradan sa sainda ni Abias saka kan saiyang mga tawuhan; 500,000 na sinanay* na parapakilaban kan Israel an nagkagaradan. 18 Kaya kan panahon na iyan, napasupog huli sa pagkadaog an mga lalaki kan Israel, pero nagin mas makusog an mga lalaki kan Juda huling nagsarig* sinda ki Jehova na Diyos kan saindang mga apuon.+ 19 Padagos na linapag ni Abias si Jeroboam asin may nasakop siyang mga siyudad kaini, an Bethel+ saka an nakapalibot na mga banwa diyan,* an Jesana saka an nakapalibot na mga banwa diyan, asin an Efrain+ saka an nakapalibot na mga banwa diyan. 20 Asin dai na nabawi ni Jeroboam an saiyang kapangyarihan kan panahon ni Abias; dangan pinadusahan siya ni Jehova asin nagadan.+

21 Pero lalo pang nagkusog si Abias. Pag-abot nin panahon, nagkua siya nin 14 agom,+ asin nagkaigwa siya nin 22 na aking lalaki asin 16 na aking babayi. 22 Asin an iba pang nangyari sa buhay ni Abias, an saiyang mga ginibo asin mga sinabi, nakasurat sa mga isinurat* kan propetang si Iddo.+