Kun an AIDS Dai Nagtatao nin Peligro

Kan banggi nin Oktubre 3, 1984, an omboy na si Kyle Bork namundag na kulang pa nin pitong semana. An sadit-sadit niang pulmon kulang pa sa edad tanganing magpunsionar nin tama, kaya ibinalyo sia sa distansiang 56 kilometros sa Children’s Hospital of Orange County, na duman may kasangkapan sa pag-ataman sa siring na mga omboy na kritikal an kamugtakan.

Ipinaliwanag kan doktor na an dugo ni Kyle kaipuhan na dagdagan paagi sa pagsasalin nin dugo; ta kun dai sia posible nanggad na magadan. Minsan ngani masakit na marhay para sa mga magurang, marigon sindang nanindogan sa saindang desisyon na basado sa Biblia na dai tumugot na pasalinan an saindang omboy. (Genesis 9:4, 5; Levitico 17:10-14; Gibo 15:28, 29) Mapagsabot asin nakikooperar an doktor. Pero, sabi nia, kun magin kritikal nanggad an situwasyon, makua sia nin orden kan husgado asin sasalinan nia nin dugo an aki.

Makangangalas, si Kyle luway-luway na nagrahay, asin kan ikasiyam na aldaw, hinale sia sa respirator. Pakalihis nin duwang aldaw ipinuli sia kan saiyang mga magurang, asin sia nagin maogma, mabagsik na aki, arog kan maheheling nindo sa retrato. Alagad ta bako iyan an katapusan kan estorya.

Kan sarong taon ibinareta sa telebisyon sa Los Angeles na an nagkapirang aki na yaon sa Children’s Hospital of Orange County kaidtong panahon na yaon duman si Kyle nagka-AIDS hale sa pagsasalin nin may helang na dugo. Hinihingoa kan ospital na hanapon an pamilya nin mga 3,000 na aki tanganing maeksamen sinda para sa AIDS virus.

Tolos-tolos, inapodan an ospital kan mga magurang ni Kyle tanganing maseguro na dai sia sinalinan na dai ninda aram. Dai nahaloy, sinimbag sinda kan ospital tanganing siertohon sa sainda na dai sia nag-ako nin dugo asin kun siring dai nin peligrong magka-AIDS. “Talagang napaluhod kami asin nagpasalamat kami ki Jehova,” an paliwanag kan mga magurang, “para sa pagtao samo kan saiyang matanos na mga pagboot asin kan kosog na mapagdanay an samong integridad sa atubangan nin siring na pagbalo.”