Sarong Aking Lalaki na Naglingkod sa Diyos

GUWAPITO an aking ini ano? Siya si Samuel. An lalaking nakakapot sa payo niya iyo si Eli, an halangkaw na saserdote nin Israel. An mga magurang ni Samuel na si Elkana asin Hana an nagdara saiya ki Eli.

Mga kuwatro o singko anyos pa sana si Samuel. Pero digdi na siya maistar sa tabernakulo ni Jehova kaiba ni Eli asin kan iba pang mga saserdote. Ta’no daw ta dinara ni Elkana asin Hana an akion pang si Samuel para maglingkod ki Jehova sa tabernakulo? Aramon ta.

Pirang taon pa sana bago kaini, munduon si Hana. Gustuhon pa’no niyang magkaaki pero dai siya nagbabados. Sarong aldaw, kan yaon si Hana sa tabernakulo ni Jehova, namibi siya: ‘Diyos na Jehova, dai mo po ako paglingawan! Kun tatawan mo ako nin aking lalaki, ipinapangako ko na itatao ko siya para paglingkudan ka sa bilog niyang buhay.’

Sinimbag ni Jehova an pamibing iyan, asin pakalihis nin pirang bulan, namundag si Samuel. Padabaon ni Hana si nonoy niya, asin tinukduan niya ini manungod ki Jehova puon sa pagkaumboy. Sinabi ni Hana sa agom niya: ‘Pagkabutas ni Samuel sa pagsuso, dadarahon ko siya sa tabernakulo para maglingkod ki Jehova.’

Ini an mahihiling mong piggigibo ni Hana asin Elkana sa ritrato. Dahil natukduan na marhay si Samuel kan mga magurang niya, ugmahon siyang maglingkod digdi sa harong ni Jehova. Kada taon, si Hana asin Elkana nagdidigdi para sumamba asin bisitahon an aki ninda. Nagdadara si Hana nin bagong bado na daing manggas, na ginibo niya para ki Samuel.

Sa pag-agi nin mga taon, padagos na naglingkod si Samuel sa tabernakulo. Nauugma saiya si Jehova pati an mga tawo. Pero an mga aki ni Eli na si Hofni asin Finehas bakong maray an ugali. Sige sindang gibo nin maraot, asin pig-iimpluwensiyahan pa ninda an iba na dai magsunod ki Jehova. Dapat kutang hinali sinda ni Eli sa pagkasaserdote, pero dai niya iyan ginibo.

Dawa nahihiling kan hoben na si Samuel an maraot na mga nangyayari sa tabernakulo, dai siya nagpundo sa paglilingkod ki Jehova. Pero, dahil pipira na sana kaidto an talagang namumuot ki Jehova, haloy nang dai nakikipag-ulay si Jehova sa si’say man na tawo. Kan durudakula na si Samuel, ini an nangyari:

Mantang turog siya sa tabernakulo, pinukaw siya nin sarong boses. Nagsimbag siya: ‘Uni po ako.’ Nagbuhat siya asin nagdalagan ki Eli, saka nagsabi: ‘Inapod po nindo ako?’

‘Dai,’ an sabi ni Eli. ‘Magbalik ka sa higdaan.’ Kaya nagbalik si Samuel sa higdaan.

May nag-apod giraray: ‘Samuel!’ Nagbuhat liwat si Samuel asin nagdalagan ki Eli. ‘Inapod po nindo ako?’ an hapot ni Samuel. Sinabi ni Eli: ‘Dai, aki ko. Balik na sa higdaan.’ Kaya naghigda giraray si Samuel.

‘Samuel!’ an pag-apod saiya kan boses sa ikatulong beses. Kaya nagdalagan si Samuel ki Eli. ‘Uni po ako. Sigurado akong inapod nindo ako,’ an sabi niya. Aram na ngunyan ni Eli na si Jehova an nag-aapod. Kaya sinabi niya ki Samuel: ‘Maghigda ka giraray, tapos pag nag-apod siya utro, sabihon mo: “Magtaram po kamo, Diyos na Jehova, nagdadangog an saindong lingkod.”’

Iyan an isinimbag ni Samuel kan mag-apod giraray si Jehova. Sinabi Niya ki Samuel na papadusahan Niya si Eli asin an mga aki kaini. Paghaloy-haloy, nagadan si Hofni asin Finehas sa pakikilaban sa mga Filisteo. Kan mabaretaan ini ni Eli, natumba siya, nabari an liog asin nagadan. Nagkatotoo an sabi ni Jehova.

Pagdakula ni Samuel, siya an nagin huring hukom nin Israel. Kan gurang na siya, sinabi saiya kan banwaan: ‘Magpili ka nin hadi na mamamahala samo.’ Habo ining gibuhon ni Samuel ta si Jehova talaga an hadi ninda. Pero sinabi ni Jehova na magdangog siya sa banwaan.