Entusiasmo

AN ENTUSIASMO nakatatabang na matawan nin buhay an pahayag. Minsan ngani importante na magkaigwa nin malaman na materyales, an buhay, entusiastikong pagpahayag an makatatabang na makua an atension kan mga nagdadangog. Ano man an saindong pinaghalean na kultura o personalidad, makukultibar nindo an entusiasmo.

Magtaram na May Pagsaboot. Kan kinakaolay an sarong babaeng taga Samaria, sinabi ni Jesus na an mga nagsasamba ki Jehova dapat na gibohon iyan “sa espiritu asin katotoohan.” (Juan 4:24) An saindang pagsamba dapat na minomotibar nin pusong may pag-apresyar asin kaoyon kan katotoohan na yaon sa Tataramon nin Dios. Kun an saro igwa kan rarom na iyan nin pag-apresyar, mababanaag iyan sa saiyang pagtaram. Sia magigin galagang makipag-olay sa iba manongod sa mamomoton na mga probisyon ni Jehova. An saiyang panlauog, an saiyang mga aksion, asin an saiyang boses magpapabanaag kan talagang nasa boot nia.

Kun siring, taano an nagpapahayag na namomoot ki Jehova asin nagtutubod sa saiyang sinasabi ta puedeng mawaran nin entusiasmo kun nagpapahayag? Bakong igo na andamon sana nia an saiyang sasabihon. Dapat na gustong-gusto nia an tema nia, isinasaboot nia iyan. Halimbawa naasignaran siang magpahayag manongod sa pantubos na atang ni Jesu-Cristo. Kun itinatao na kan nagpapahayag an saiyang pahayag, an isip nia dapat na pano, bako sanang nin mga detalye, kundi nin pag-apresyar sa kahulogan kan atang ni Jesus para sa mismong nagpapahayag sagkod sa mga nagdadangog sa saiya. Kaipuhan na girumdomon nia an saiyang pagpasalamat ki Jehova Dios asin ki Cristo Jesus para sa makangangalas na probisyon na ini. Kaipuhan na isipon nia an marahayon na oportunidad sa buhay na binubukasan kaiyan para sa katawohan—daing sagkod na kaogmahan na may sangkap na salud sa sarong ibinalik na paraiso digdi sa daga! Sa siring, kaipuhan na ilabot nia an saiyang puso.

May labot sa eskribang si Esdras, sarong paratokdo sa Israel, sinasabi kan Biblia na ‘inandam nia an saiyang puso na konsultahon an ley ni Jehova asin gibohon iyan patin magtokdo sa Israel.’ (Esd. 7:10) Kun arog man kaiyan an gigibohon niato—na inaandam bako sanang an impormasyon kundi pati an satong puso—kita mataram gikan sa puso. An siring na odok sa pusong pagpahayag kan katotoohan dakula an ikatatabang sa mga kinakaolay niato na makapatalubo nin tunay na pagkamoot sa katotoohan.

Isipon an Magdadangog sa Saindo. An saro pang importanteng bagay sa pagpaheling nin entusiasmo iyo an pagkaigwa kan kombiksion na kaipuhan na madangog kan mga nagdadangog sa saindo an sasabihon nindo. Ini nangangahulogan na sa pag-andam kan saindong pag-atubang, maninigo na kamo bako sanang magtipon nin kapakipakinabang na materyales kundi mamibi man ki Jehova sa pag-arang kan saiyang paggiya sa paggamit kaiyan tangani na makinabang an mga kakaolayon nindo. (Sal. 32:8; Mat. 7:7, 8) Analisaron kun taano ta kaipuhan na madangog kan mga nagdadangog sa saindo an impormasyon, kun paano iyan pakikinabangan ninda, asin kun paano nindo iyan ikatatao sa paagi na maaapresyar ninda an halaga kaiyan.

Hingoahon na mapaoswag an saindong materyales sagkod na may dahelan na kamong ganahan. Iyan dai man kaipuhan na bago, alagad puedeng magin orihinal an pamamaagi nindo sa tema. Kun may inandam kamo na talagang makatatabang sa mga nagdadangog sa saindo na mapakosog an relasyon ninda ki Jehova, apresyaron an saiyang mga probisyon, makaya an mga sakit sa buhay sa daan na sistemang ini, o magin epektibo sa saindang ministeryo, kun siring nasa saindo an gabos na dahelan na magin entusiastiko manongod sa saindong pahayag.

Ano kun an asignasyon nindo magbasa sa publiko? Tangani na magibo iyan nin entusiastiko, an kaipuhan bako sanang tamang pakasabi kan mga tataramon asin angay na pagkagrupogrupo kan mga iyan. Adalan an materyales. Kun an babasahon nindo sarong kabtang kan Biblia, magsiyasat dian. Seguradohon na nasasabotan nindo an pundamental na kahulogan kaiyan. Estudyaran kun paano iyan kapakipakinabang para sa saindo asin sa mga nagdadangog sa saindo, asin magbasa na may kamawotan na ikapaabot iyan sa mga naghihinanyog sa saindo.

Nag-aandam daw kamo para sa ministeryo sa langtad? Repasohon an temang ipakikipag-olay nindo asin an mga tekstong plano nindong gamiton. Konsideraron man kun ano an nasa isip kan mga tawo. Ano an bareta? Anong mga problema an inaatubang ninda? Kun andam kamong ipaheling sa mga tawo na nasa Tataramon nin Dios an solusyon sa mismong mga problema na ikinahahadit ninda, nakakamate kamo nin pagkagalaga na gibohon iyan, asin an entusiasmo natural na minaluwas.

Ipaheling an Entusiasmo Paagi sa Bibong Pagpahayag. An entusiasmo pinakamalinaw na ikinapaheheling paagi sa pagigin bibo sa saindong pagpahayag. Ini maninigong magin risang-risa sa saindong panlauog. Dapat na an impresyon sa saindo kombensido, bakong dogmatiko.

Kaipuhan an pagkatimbang. An nagkapira tibaad may tendensia na magin ganado manongod sa gabos na bagay. Tibaad kaipuhan na tabangan sindang marealisar na kun an saro nagigin mahawhaw o sobra kaemosyonal, sia na an nasa isip kan mga nagdadangog sa saiya imbes na an mensahe. Sa ibong na lado, an mga masusopgon kaipuhan na parigonon an boot na magin pano nin ekspresyon.

Nakaoolakit an entusiasmo. Kun marahay an saindong kontak sa mga nagdadangog asin entusiastiko kamo manongod sa saindong pahayag, mamamatean kan mga nagdadangog sa saindo an entusiasmong iyan. Si Apolos nagpaheling nin pagigin bibo sa saiyang pagtaram, asin sia inapod na matibay magtaram. Kun kamo malaad sa espiritu nin Dios, an bibo nindong pagpahayag mapahiro sa mga naghihinanyog sa saindo.—Gibo 18:24, 25; Roma 12:11.

Entusiasmo na Angay sa Materyales. Magmaan na dai pakasobrahan an entusiasmo nindo sa bilog nindong pahayag kaya pagal-pagal na logod an mga nagdadangog sa saindo. Kapoy na an talinga ninda kaya dai na logod hihinanyogon an ano man na sadol nindo na isagibo an pinag-oolayan. Idinodoon kaini an pangangaipo na mag-andam nin materyales na puedeng magkaigwa nin pagkalaenlaen sa saindong pagpahayag. Pagmaigotan na dai maholog sa estilo na nagpapabanaag nin pagkaindiperente. Kun maingat nindong pipilion an saindong materyales, kamo magigin interesadong marhay dian. Alagad an nagkapirang punto natural sanang naghahagad nin orog na entusiasmo sa pagpahayag kisa iba, asin an mga ini maninigo na ekspertong isalak sa bilog nindong pahayag.

Partikularmente an prinsipal na mga punto maninigong iatubang nin entusiastiko. An saindong pahayag dapat na may mga pinakalataw na punto, mga kulminasyon na gradwal nindong bibilogon. Mantang an mga ini an pinakakulminasyon kan saindong pahayag, parate na iyan an mga punto na an intension motibaron an mga nagdadangog sa saindo. Mantang nakombensir na nindo an mga nagdadangog sa saindo, kaipuhan na sinda pukawon nindo, ipaheling sa sainda an mga pakinabang sa pag-aplikar kan pinag-olayan. An entusiasmo nindo matabang sa saindo na mataros an puso kan mga naghihinanyog sa saindo. An bibong pagpahayag maninigo na nungkang puersado. Maninigo na iyan may dahelan, asin an materyales nindo an matao sa saindo kan dahelan na iyan.