Paggamit kan Biblia sa Pagsimbag

KUN hinahapot manongod sa satong mga tinutubod, sa satong pamumuhay, sa satong punto de vista mapadapit sa mga nangyayari sa presente, sa satong paglaom sa ngapit, hinihingoa niato na gamiton an Biblia sa pagsimbag. Taano? Huli ta iyan an Tataramon nin Dios. Sa Biblia niato kinukua an satong mga tinutubod. Ibinabasar niato an satong pamumuhay sa Biblia. Iyan an nakaiimpluwensia sa pagmansay niato sa mga nangyayari sa kinaban. An paglaom niato sa ngapit marigon na basado sa ipinasabong na mga panuga kan Biblia.​—2 Tim. 3:16, 17.

Aram tang marhay an paninimbagan na kakambal kan satong ngaran. Kita Mga Saksi ni Jehova. (Isa. 43:12) Kaya sinisimbag niato an mga hapot, bakong basado sa pilosopiya nin tawo, kundi basado sa sinasabi ni Jehova sa saiyang ipinasabong na Tataramon. Totoo, bilang mga indibiduwal, may mga opinyon kita sa mga bagay, alagad pinababayaan niato an Tataramon nin Dios na makaimpluwensia sa satong mga punto de vista huli ta marigon kitang kombensido na iyan an katotoohan. Siempre, tinatawan kita kan Biblia nin libertad sa personal na mga gusto sa dakol na bagay. Imbes na ipirit an mga gusto niato sa iba, boot niatong itokdo an mga prinsipyo na yaon sa Kasuratan, sa siring pinababayaan an mga naghihinanyog sa sato na magkaigwa man kan libertad sa pagpili na arog kan nasa sato. Kapareho ni apostol Pablo, hinihingoa niato na “palakopon an pagkuyog paagi sa pagtubod.”​—Roma 16:26.

Si Jesu-Cristo inaapod sa Kapahayagan 3:14 na “an fiel asin totoong saksi.” Paano nia sinimbag an mga hapot asin inatubang an mga situwasyon na napaatubang sa saiya? Kun beses paagi sa paggamit nin mga ilustrasyon na makapupukaw sa isip nin mga tawo. Sa ibang okasyon paagi sa paghapot man sa naghapot manongod sa saiyang pagsabot sa sarong teksto. Sa parate paagi sa pagkotar sa mga teksto, pagpakahulogan dian sa ibang pananaram, o pagsambit dian. (Mat. 4:3-10; 12:1-8; Luc. 10:25-28; 17:32) Kan enot na siglo, an mga balumbon kan Kasuratan parateng sinasaray sa mga sinagoga. Mayo nin ebidensia na si Jesus may personal na koleksion kan mga balumbon na idto, alagad aram niang marhay an Kasuratan asin parate nia iyan na sinasambit kun nagtotokdo sia sa iba. (Luc. 24:27, 44-47) Masasabi nia nin totoo na an saiyang itinokdo bakong hale sa saiya man sana. Itinaram nia an nadangog nia sa saiyang Ama.​—Juan 8:26.

An kamawotan niato arogon an halimbawa ni Jesus. Dai niato personal na nadangog an Dios na magtaram, arog ni Jesus. Alagad an Biblia Tataramon nin Dios. Kun iyan ginagamit niato bilang basehan kan satong mga simbag, linilikayan niato an pag-apod nin atension sa satong sadiri. Ipinaheheling niato na imbes na an sabihon niato opinyon nin bakong sangkap na tawo, determinado nanggad kita na pabayaan na an Dios an magtaram kun ano an katotoohan.​—Juan 7:18; Roma 3:4.

Siempre, an kamawotan niato bako sanang gamiton an Biblia kundi gamiton iyan sa paagi na pinakamapakikinabangan kan nagdadangog sa sato. Gusto niato na sia maghinanyog na bukas an isip. Depende sa aktitud kan tawo, puede nindong iintrodusir an mga ideya sa Biblia sa pagsabi: “Dai daw kamo minaoyon na an talagang mahalaga iyo an sinasabi nin Dios?” O puede nindong sabihon: “Aram daw nindo na ipinaliliwanag kan Biblia an mismong hapot na iyan?” Kun an kaolay nindo mayo nin paggalang sa Biblia, tibaad kaipuhan na gumamit kamo nin medyo laen na introduksion. Puede nindong sabihon: “Togoti tabi ako na basahon ko sa saindo an suanoy na hulang ini.” O puede man na sabihon nindo: “An libro na pinakamahiwas an sirkulasyon sa kasaysayan nin tawo nagsasabi kaini . . . ”

Sa nagkapirang kaso, tibaad gustohon nindo na tawan na sana nin pagpakahulogan sa ibang pananaram an sarong teksto. Minsan siring, kun posible, pinakamarahay na buksan mismo an Biblia asin basahon an sinasabi kaiyan. Ipaheling an teksto sa tawo sa sadiri niang kopya kan Biblia basta ini praktikal. An direktang paggamit na ini kan Biblia may mapuersang epekto sa mga tawo.​​—Heb. 4:12.

An Kristianong kamagurangan may espesyal na paninimbagan na gamiton an Biblia kun sinisimbag an mga hapot. An saro sa mga kualipikasyon sa paglingkod bilang magurang sa kongregasyon iyo na an tugang “marigon na nangangapot sa fiel na tataramon kun dapit sa saiyang teknika sa pagtokdo.” (Tito 1:9) An sarong miembro kan kongregasyon tibaad gumibo nin magabat na pagdedesisyon sa buhay pakatawe sa saiya nin hatol nin sarong magurang sa kongregasyon. Abaa kaimportante na an hatol na ini marigon na nakabasar sa Kasuratan! An halimbawa nin sarong magurang sa kongregasyon sa paggibo kaini puedeng makaimpluwensia sa dakol pang iba sa saindang paagi nin pagtotokdo.