Daing Kasalasala an Itinataram

TAANO daw ta puedeng makasabi nin bakong totoo an sarong Kristiano? Tibaad inootro sana nia an nadangog nia, na dai nagtatao nin panahon na berepikaron an mga detalye. O tibaad ikasabi nia nin masyadong mapuersa an sarong bagay ta, dai nia narealisar, napasala an pagbasa nia sa saiyang reperensia. Kun tinatawan niato nin maingat na atension an pagigin daing kasalasala dawa sa saradit na bagay, maheheling kan mga naghihinanyog sa sato na makapagkokompiar sinda sa pagigin totoo kan mas importanteng mga aspekto kan satong mensahe.

Sa Ministeryo sa Langtad. Sa pakarealisar na kadakol pa nindang dapat na manodan, dakol an ninenerbios na pumoon sa ministeryo sa langtad. Pero, madali nindang naheheling na nakatatao sinda nin epektibong patotoo, dawa pundamental sana an kaaraman ninda sa katotoohan. Paano? An nagdedeterminar na bagay iyo an pag-andam.

Bago lumuwas sa paglilingkod sa langtad, magin pamilyar sa temang gusto nindong tokaron. Hingoahon na antisiparon an mga hapot na tibaad palatawon kan mga naghihinanyog sa saindo. Humanap nin nakakokontentong mga simbag na basado sa Biblia. Aandamon kamo kaini na tumao nin mga simbag na daing kasalasala na relaks an kaisipan. May aadalan daw kamo sa Biblia? Maingat na repasohon an pag-aadalan. Seguradohon na nasasabotan nindo an sono sa Kasuratan na basehan kan simbag sa inimprentang mga hapot.

Ano kun may ihapot an kagharong o katrabaho na dai kamo andam na simbagon? Kun dai nindo segurado an mga detalye, paglabanan an sugot na magpatibasang. “An puso kan matanos naghohorophorop tanganing makasimbag.” (Tal. 15:28) Tibaad makua nindo an tabang na kaipuhan nindo sa librong Reasoning From the Scriptures o sa “Mga Topiko sa Biblia na Mapag-oolayan.” Kun mayo kamo kan duwang ini, mag-opresir na magsiyasat dangan bumalik. Kun sinsero an naghapot, dai sia mareklamo na maghalat kan tamang simbag. Sa katunayan, tibaad hangaan pa ngani nia an saindong kapakumbabaan.

An paglilingkod sa langtad kaiba nin eksperyensiadong mga parahayag makatatabang sa saindo na magkaabilidad sa tamang paggamit kan Tataramon nin Dios. Obserbaran kun arin na mga teksto an ginagamit ninda asin kun paano sinda nangangatanosan dian. Mapakumbabang akoon an ano man na suhestion o pagtatanos ninda. An maigot na disipulong si Apolos nakinabang sa tabang nin iba. Ilinadawan ni Lucas si Apolos bilang “matibay magtaram,” “tuodan na marhay,” asin “malaad sa espiritu,” sarong tawo na “nagtaram asin nagtokdo nin tama kan mga bagay manongod ki Jesus.” Pero, may kulang sa pakasabot nia. Kan ini marisa ni Priscila asin Aquila, “ipinag-iba sia ninda asin ipinaliwanag sa saiya nin mas tama an dalan nin Dios.”​—Gibo 18:24-28.

“Marigon na Nangangapot sa Fiel na Tataramon.” An satong mga pag-atubang sa mga pagtiripon maninigong magpabanaag nin halangkaw na pagpahalaga sa kabtang kan kongregasyon bilang “sarong harigi asin sulay kan katotoohan.” (1 Tim. 3:15) Tangani na masuportaran an katotoohan, importante na masabotan niato an kahulogan kan mga teksto na plano niatong gamiton sa mga pahayag. Konsideraron an konteksto asin katuyohan kaiyan.

Puedeng otrohon an sinasabi nindo sa pagtiripon kan kongregasyon. Siempre, “kita gabos nasisingkog nin dakol na beses.” (Sant. 3:2) Alagad makikinabang kamo sa pagpatalubo nin mga ugale na nakakokontribwir sa pagtaram na daing kasalasala. An dakol na tugang na lalaki na nasa Teokratikong Paadalan sa Pagmiministro pag-abot nin panahon magigin kamagurangan. “Orog kisa ordinaryo” an inaasahan sa mga pinaniwalaan nin siring na responsibilidad. (Luc. 12:48) Kun an magurang sa kongregasyon daing pagmamaan na nagtatao nin salang hatol na nagbubunga nin grabeng mga problema para sa mga miembro kan kongregasyon, puedeng maanggot an Dios sa magurang na iyan. (Mat. 12:36, 37) Sa siring, an tugang na nagigin kualipikado bilang magurang sa kongregasyon dapat na midbid na “marigon na nangangapot sa fiel na tataramon kun dapit sa saiyang teknika sa pagtotokdo.”​—Tito 1:9.

Mag-ingat na an saindong mga konklusyon kaoyon kan “arogan nin ikararahay na mga tataramon” na yaon sa kabilogan kan katotoohan sa Kasuratan. (2 Tim. 1:13) Dai kamo maninigong matakot digdi. Tibaad dai pa nindo natatapos na basahon an bilog na Biblia. Ipagpadagos na pagmaigotan iyan. Alagad mientras tanto, mangnoha kun paano kamo matatabangan kan minasunod na suhestion sa pag-analisar sa materyales na iniisip nindong gamiton sa saindong pagtotokdo.

Enot, ihapot sa sadiri: ‘An materyales daw na ini kaoyon kan nanodan ko na sa Biblia? Irarani daw kaiyan ki Jehova an mga naghihinanyog sa sako, o ibinubugtak daw kaiyan sa estimadong kamugtakan an kadonongan kan kinaban, na ineenkaminar an mga tawo na pagiya dian?’ Sinabi ni Jesus: “An saimong tataramon katotoohan.” (Juan 17:17; Deut. 13:1-5; 1 Cor. 1:19-21) Ikaduwa, gamiton nin tama an mga kasangkapan sa pag-adal na itinao kan grupong fiel asin may diskresion na oripon. An mga ini makatatabang sa saindo na bako sanang masabotan nin tama an mga teksto kundi ikaaplikar man an mga iyan nin timbang asin rasonable. Kun ibabasar nindo an mga pahayag nindo sa “arogan nin ikararahay na mga tataramon” asin mananarig kamo sa pinakapaagihan ni Jehova kun nag-eeksplikar saka nag-aaplikar kan mga teksto, magigin daing kasalasala an mga tataramon nindo.

Pagberepikar na Daing Kasalasala an Impormasyon. An mga nangyayari sa presente, kotasyon, asin eksperyensia puedeng makatabang kun iiniilustrar asin iinaaplikar nindo an nagkapirang punto. Paano nindo maseseguro na daing kasalasala an mga iyan? An sarong paagi iyo an pagkua kan siring na mga bagay sa masasarigan na mga reperensia. Dai paglingawan na berepikaron kun baga pinakabago an impormasyon. Nagigin laos na an mga estadistika; madaling nalalabihan an mga diskobremiento sa siensia; asin mantang nagtatalubo an pakasabot nin tawo sa kasaysayan asin suanoy na mga lenguahe, kaipuhan na rebisaron an mga konklusyon na basado sa dating kaaraman. Magmaan na marhay kun iniisip nindong gumamit nin impormasyon hale sa mga diaryo, telebisyon, radyo, elektronikong mensahe, o Internet. Ihinahatol kan Talinhaga 14:15: “An siisay man na daing kabatidan nagtutubod sa lambang tataramon, alagad an alisto an isip ineestudyaran an saiyang mga lakad.” Ihapot sa sadiri: ‘May reputasyon daw sa pagigin daing kasalasala an reperensia? Mabeberepikar daw sa iba pang paagi an impormasyon?’ Kun duda kamo kun baga totoo an sarong bagay, dai iyan paggamiton.

Apuera sa pagberepikar kun baga masasarigan an mga reperensia, maingat na estudyaran kun paano nindo planong gamiton an impormasyon. Seguradohon na an paggamit nindo nin mga kotasyon asin estadistika kaoyon kan konteksto na kinuanan kaiyan. Sa paghihingoa na ikadoon an saindong punto, magmaan na an “nagkapirang tawo” dai magin “kadaklan na tawo,” na an “dakol na tawo” dai magin “gabos,” asin na an “sa nagkapirang kamugtakan” dai magin “pirme.” An masyadong mapuersang pagkasabi sa mga bagay o pagpasobra sa mga report may labot sa numero, sokol, o pagigin grabe nagpapalataw nin mga kuestion sa pagkamapaniniwalaan.

Kun kamo pirmeng daing kasalasala sa saindong sinasabi, mamimidbid kamo bilang tawo na may paggalang sa katotoohan. Nagtatao ini nin marahay na impresyon manongod sa Mga Saksi ni Jehova bilang sarong grupo. Mas importante, iyan nagtatao nin onra ki “Jehova na Dios nin katotoohan.”​—Sal. 31:5.