Paghihingoa na Mataros an Puso

APUERA sa pagpatotoo sa mga tawo, kaipuhan na hingoahon nindo na mataros an saindang puso. Sa Biblia, an puso parateng ilinalaen sa kun ano an tawo sa luwas. An piguratibong puso nagrerepresentar sa kun ano an tawo sa laog​—kun ano an saboot nia, an gabos na iniisip nia, kun taano ta iniisip nia iyan, asin kun paano naiimpluwensiahan kan mga kaisipan na iyan an saiyang gawe-gawe. Sa piguratibong puso na ini na isinasabwag an banhi kan katotoohan. (Mat. 13:19) Asin sa puso dapat gumikan an pagkuyog sa Dios.​—Tal. 3:1; Roma 6:17.

Tangani na arog kaiyan kararom an maabot kan saindong pagtotokdo, magkonsentrar sa mga obhetong ini: (1) Mansayan kun ano na an nakaimpluwensia sa puso kan naghihinanyog sa saindo. (2) Pakosogon an positibong mga kualidad, arog kan pagkamoot asin diosnon na takot. (3) Enkaminaron an naghihinanyog sa saindo na analisaron an nasa laog na mga motibo nia tangani na lubos siang makapaogma ki Jehova.

Paggamit nin Pakamansay. Laen-laen an dahelan kun taano ta dai pa inaako nin mga tawo an katotoohan. Kun pinamamayohan an pag-adal sa Biblia, tibaad kaipuhan na haleon nindo an prehuwisyo asin magtao kamo nin mga impormasyon tanganing makontra an salang mga ideya kan inaadalan, o tibaad kaipuhan na magtao sana kamo nin prueba. Ihapot sa sadiri: ‘Aram daw kan indibiduwal na ini na bilang tawo sia may espirituwal na mga pangangaipo? Ano na an tinutubod nia? Ano an dai nia tinutubod? Taano ta iyan an nagin konklusyon nia? Kaipuhan daw nia an tabang na mapaglabanan an mga kamawotan na puedeng makaolang sa saiya sa pag-ako kan mga paninimbagan na kaiba kan pakaaram sa katotoohan?’

Bakong pirmeng pasil na maaraman kun taano ta siring an paniniwala nin mga tawo. “An planong gibohon sa puso nin tawo siring sa hararom na katubigan,” sabi kan Talinhaga 20:5, “alagad an tawong may pakamansay iyo an masakdo kaiyan.” An pakamansay iyo an abilidad na masabotan an bakong risang-risa. Kaipuhan kaini an alistong pagmamasid asin pagigin mapagmakolog.

Bakong gabos na komunikasyon berbal. An sarong topiko tibaad makapabago sa panlauog o tono nin boses kan inaadalan. Kun kamo magurang, daing duwa-duwa na aram nindo na an pagbago sa gawe-gawe kan saindong aki puedeng magparisa na nagkakaepekto sa saiya an bagong impluwensia sa buhay. Dai pagpalimanlimanan an mga senyal na ini. An mga iyan nagpaparisa kan nasa puso nin sarong tawo.

An piling mga hapot makatatabang sa saindo na mapaluwas an nasa puso nin saro. Puede nindong ihapot: “Ano an saboot nindo manongod sa . . . ?” “Ano an nakakombensir sa saindo na . . . ?” “Ano an magigin reaksion nindo kun . . . ?” Pero, magmaan na dai paoranan nin hapot an mga tawo. Puede na mataktika nindong ponan an hapot nindo nin, “Puede daw tabing ihapot ko kun . . . ?” An pagdiskobre kan nasa puso maingat na gayong trabaho na dai mahihidali. Sa kadaklan na kaso dapat na makultibar nguna an tiwala sa halawig na panahon bago magusto an tawo na ihayag an kairairaromi niang saboot. Dawa pa siring, dapat na magmaan na dai magsaboot an tawo na inuusisa nindo an mga bagay na dian mayo kamo nin labot.​—1 Ped. 4:15.

Nagkakaipo man nin pakamansay kun paano an magigin reaksion nindo sa saindong nadadangog. Girumdoma na an obheto nindo masabotan an mga tawo tangani na madeterminaran nindo kun anong impormasyon na basado sa Biblia an tibaad makamotibar sa sainda. Pogolan tolos an ano man na tendensia na ibuyagyag an pagigin sala kan saindang punto de vista. Imbes, magin listong mansayan an mga saboot sa likod kan mga tataramon. Sa siring, maaaraman nindo kun paano masimbag; asin an inaadalan nindo, sa pakamate na sia nasasabotan nindo, mas posibleng marhay na isip-isipon nin odok an saindong sinasabi.​—Tal. 16:23.

Sa sarong kabtang, puede nindong motibaron an mga indibiduwal dawa kun kamo nagpapahayag sa dakulang grupo. Kun marahay an kontak nindo sa mga nagdadangog, marigmat kamo sa mga panlauog, asin naghahapot kamo nin retorikong mga hapot na nakapupukaw nin isip, posibleng marhay na magkakaideya kamo sa saboot kan mga naghihinanyog sa saindo manongod sa sinasabi nindo. Kun midbid nindong marhay an mga nagdadangog sa saindo, magpaheling nin konsiderasyon sa kamugtakan ninda. Konsideraron an pankagabsan na aktitud kan kongregasyon mantang nakikipagrasonan kamo sa sainda hale sa Tataramon nin Dios.​—Gal. 6:18.

Pagpukaw sa Kapakipakinabang na mga Saboot. Pakatapos na masabotan nindo an tinutubod nin sarong tawo, an dai nia tinutubod, asin kun taano, iyan magagamit na nindong basehan. Pagkabuhay nia liwat, nataros ni Jesus an puso kan saiyang mga disipulo paagi sa ‘lubos niang pagbukas sa sainda kan Kasuratan’ nin huli kan bago pa sanang mga nangyari. (Luc. 24:32) Maninigo na pagmaigotan man nindong ikonektar an naeksperyensiahan nin sarong tawo, an hinihimuyawot nia, sa naheheling nia sa Tataramon nin Dios. An puso nin sarong inaadalan mapahihiro sa kapakipakinabang na paagi kun malinaw niang narerealisar: “Ini AN KATOTOOHAN!”

Kun idinodoon nindo an karahayan ni Jehova, an saiyang pagkamoot, an saiyang dai na kutana maninigong kabootan, asin an pagigin tama kan saiyang mga dalan, tinatabangan nindo an mga tinotokdoan nindo na parigonon an saindang pagkamoot sa Dios. Kun tinatawan nindo nin panahon an pagpaliwanag sa mga naghihinanyog sa saindo kan marahay na mga kualidad na naheheling nin Dios sa sainda bilang mga indibiduwal, tinatawan nindo sinda nin dahelan na maniwala na posible na magkaigwa nin personal na relasyon sa saiya. Magigibo ini paagi sa pagpensar sa mga teksto na arog kan Salmo 139:1-3, Lucas 21:1-4, asin Juan 6:44 asin sa pagtabang sa mga naghihinanyog sa saindo na masabotan an rarom kan mamomoton na pagkamuya ni Jehova sa fiel niang mga lingkod. (Roma 8:38, 39) Ieksplikar na an hineheling ni Jehova bako sanang an satong mga sala kundi an bilog niatong pamumuhay, an satong kaigotan para sa dalisay na pagsamba, an satong pagkamoot sa saiyang ngaran. (2 Cron. 19:2, 3; Heb. 6:10) Nagigirumdoman nia dawa an kasaditsaditing detalye kan pagkagibo sa sato, asin, sa pambihirang paagi, ibabalik nia sa pagigin buhay “an gabos na nasa mga lolobngan na girumdoman.” (Juan 5:28, 29; Luc. 12:6, 7) Mantang an mga tawo ginibo na kaladawan asin kaagid nin Dios, an pagtokar sa saiyang mga kualidad parate na mapukaw nin paborableng reaksion sa puso kan tawo.​​—Gen. 1:27.

Mapahihiro man an puso kun an saro nakakanood nang helingon an ibang tawo kapareho kan pagheling ni Jehova. Rasonable sana na kun an satong Dios nagpapaheling nin mapagpadangat na pagpahalaga sa sato bilang mga indibiduwal, nagpapaheling man sia kan kaparehong konsiderasyon sa iba, ano man an saindang pinaghalean, nasyonalidad, o rasa. (Gibo 10:34, 35) Oras na magkaigwa na nin siring na pakasabot an sarong tawo, may marigon nang basehan sono sa Kasuratan na haleon nia an pagkaongis asin prehuwisyo sa saiyang puso. Ini magpapangyari sa saiya na magkaigwa nin matoninong na relasyon sa iba mantang nakakanood siang otobon an kabotan nin Dios.

An diosnon na takot saro pang saboot na maninigo nindong tabangan an iba na makultibar. (Sal. 111:10; Kap. 14:6, 7) An siring na hararom na reberensia, o takot sa Dios, puedeng makamotibar sa saro na magibo an tibaad dai puede sa sadiri niang kosog. Paagi sa pagtokar kan makangingirhat na mga aktibidad ni Jehova asin kan saiyang pambihirang mamomoton na kabootan, matatabangan nindo an iba na magkaigwa nin nakararahay na grabeng takot na ikaanggot nia.​—Sal. 66:5; Jer. 32:40.

Seguradohon na nasasabotan kan mga naghihinanyog sa saindo na importante ki Jehova an saindang gawe-gawe. May pagmate sia, asin sa reaksion niato sa saiyang pagdirehir, magsalang pinamomondo o pinagagayagaya niato sia. (Sal. 78:40-42) Ipaliwanag sa mga tawo kun taano an personal nindang gawe-gawe ta puedeng magkaepekto sa pagsimbag kan angat ni Satanas sa Dios.​—Tal. 27:11.

Tabangan an mga nagdadangog sa saindo na masabotan na an pag-otob sa mga kahagadan nin Dios kapakipakinabang para sa sainda. (Isa. 48:17) An sarong paagi na magibo ini iyo an pagtokdo sa pisikal asin emosyonal na mga bunga nin paghabo sa kadonongan nin Dios, dawa sa kadikit sanang panahon. Ieksplikar kun paano na an kasalan irinarayo kita sa Dios, hinahalean an iba kan oportunidad na makanood kan katotoohan sa sato, asin sa ibang bagay naglalapas sa saindang mga deretso. (1 Tes. 4:6) Tabangan an mga nagdadangog sa saindo na pakamahalon an mga bendisyon na nakakamtan na ninda bilang resulta kan pag-otob ninda sa mga ley nin Dios. Pakosogon an pagpasalamat ninda sa bagay na iliniligtas kita kan paglakaw sa matanos na mga dalan ni Jehova sa dakol na kasakitan. Oras na an saro may pagtubod na sa kadonongan kan mga dalan nin Dios, hahaboan na nia an lambang dalan na kontra dian. (Sal. 119:104) An magigin pagheling nia sa pagkuyog, bakong pagabat, kundi paagi na ikapahayag an mamomoton na debosyon ki Jehova bilang persona.

Pagtabang sa Iba na Magsiyasat. Tangani na padagos na magtalubo sa espirituwal, kaipuhan na magin sensitibo an mga tawo sa nasa saindang puso. Ieksplikar kun paano sinda matatabangan kan Biblia na magibo ini.

Tabangan an mga naghihinanyog sa saindo na marealisar na an Biblia bako sanang rekord nin mga togon, hatol, mga pangyayari sa kasaysayan, asin hula. Ihinahayag man kaiyan an kaisipan nin Dios. Sa Santiago 1:22-​25, an Tataramon nin Dios ikinokomparar sa salming. Paagi sa reaksion niato sa sinasabi kaiyan asin sa pag-otob ni Jehova sa saiyang katuyohan, ihinahayag kan mensahe kan Biblia kun ano an nasa satong puso. Sa siring, ihinahayag kaiyan kun ano an pagheling sa sato nin Dios, na iyo “an parasiyasat sa puso.” (Tal. 17:3) Enkaminaron an mga naghihinanyog sa saindo na girumdomon ini. Sadolon sinda na pensaron an iningatan nin Dios para sa sato sa rekord kan Biblia asin kun anong mga pagbago an tibaad kaipuhan na gibohon ninda sa saindang buhay tangani na mas makapaogma sa saiya. Tabangan sindang ibilang an pagbasa kan Biblia na paagi na maaraman an ebalwasyon ni Jehova sa “mga kaisipan asin intension kan puso” tangani na makakooperar sinda sa Dios sa paggibo kan ano man na kinakaipuhan na pagbago.​—Heb. 4:12; Roma 15:4.

An nagkapirang inaadalan sa Biblia tibaad gustong aksionan an nanonodan ninda; pero nahahadit sinda sa iisipon nin ibang tawo. Tibaad pinaglalabanan ninda an makosog na mga kamawotan sa laman. O tibaad nangangatanosan sinda tanganing makahanap nin paagi na maglingkod sa Dios mantang nangangapot sa mga gibo kan kinaban. Isabi an mga peligro nin siring na dai pakadesisyon. (1 Ha. 18:21) Sadolon sindang mamibi sa Dios na siyasaton asin dalisayon an saindang puso.​—Sal. 26:2; 139:23, 24.

Ipaliwanag sa sainda na nasasabotan ni Jehova an pakipagtusayan ninda asin na iineeksplikar kan Biblia kun ano an nangyayari. (Roma 7:22, 23) Tabangan sindang magmaan tangani na dai pabayaan na mangibabaw an mga tendensia nin pusong bakong sangkap.​—Tal. 3:5, 6; 28:26; Jer. 17:9, 10.

Enkaminaron an balang saro na analisaron an saiyang mga motibo sa paggibo nin mga bagay. Tokdoan sia na ihapot sa sadiri: ‘Taano ta gusto kong gibohon ini? Ipaheheling daw kaiyan ki Jehova na inaapresyar ko talaga an gabos na ginibo nia para sa sako?’ Magmaigot na maparigon an kombiksion na an inooyonan na relasyon ki Jehova iyo an pinakamahalagang kayamanan na puedeng kamtan nin siisay man.

Tabangan an mga nagdadangog sa saindo na masabotan an kahulogan kan paglilingkod ki Jehova sa ‘bilog nindang puso.’ (Luc. 10:27) Ini nangangahulogan na an gabos nindang saboot, kamawotan, asin motibo dapat na ioyon sa mga dalan ni Jehova. Kaya tokdoan an mga naghihinanyog sa saindo na analisaron bako sanang an ginigibo ninda kundi siring man an saboot ninda manongod sa mga kahagadan nin Dios asin kun ano an motibo ninda sa paglilingkod sa saiya. (Sal. 37:4) Mantang namamansayan kan mga inaadalan nindo kun saen kaipuhan an pagrahay, enkaminaron sindang mamibi ki Jehova: “Gibohang saro an sakong puso na matakot sa saimong ngaran.”​—Sal. 86:11.

Kun an inaadalan magkaigwa na nin personal na relasyon ki Jehova, makuyog sia sa Dios bilang resulta nin pagtubod asin bako sanang huli sa mga sadol nindo. Sa siring, sia na mismo an ‘padagos na sesegurohon kun ano an inaako kan Kagurangnan.’ (Efe. 5:10; Fil. 2:12) Ikinaoogmang marhay ni Jehova an siring na odok sa pusong pagkuyog.​—Tal. 23:15.

Girumdoma na si Jehova iyo an nagsisiyasat sa puso asin nandadagka sa mga tawo na magkaigwa nin relasyon sa saiya. (Tal. 21:2; Juan 6:44) An kabtang niato makikooperar. (1 Cor. 3:9) ‘Garo baga an Dios nakikimaherak paagi sa sato.’ (2 Cor. 5:20; Gibo 16:14) Dai pinipirit ni Jehova an siisay man na akoon an katotoohan, alagad mantang ginagamit niato an Kasuratan, tibaad papangyarihon nia na marealisar kan mga naghihinanyog sa sato na an nadadangog ninda iyo an simbag sa saindang mga hapot​​—o sa saindang mga pamibi. Ini an girumdomon kada magkaoportunidad kamong magtokdo, asin odok na arangon ki Jehova an saiyang paggiya asin tabang.​—1 Cron. 29:18, 19; Efe. 1:16-18.