An Katawohan Nakaligtas sa Baha

MANTANG nagdadakol an katawohan, an kasalan asin karatan marikas na luminakop sa daga. An solong propeta kaidto na an ngaran Enoc nagpatanid na maabot an panahon na lalaglagon nin Dios an mga maraot. Pero, an karatan nangibabaw asin naggrabe pa ngani. May mga anghel na nagrebelde ki Jehova paagi sa pagbaya sa katongdan na iinasignar sa sainda sa langit, pagsulot nin pisikal na hawak digdi sa daga, asin may kahanaban na pagkua nin mga babae bilang mga agom. An bakong natural na pagsasarong iyan nagbunga nin mestisong mga aki​—higanteng mga paradaogdaog na inapod na Nefilim, na nagpagrabe sa kadahasan asin pagpabolos nin dugo sa kinaban. Nakolgan na gayo an boot nin Dios na maheling an pagkaraot kan mga linalang nia sa daga.

Pagkagadan ni Enoc, may sarong tawo na napapalaen sa maraot na kinaban na iyan. Noe an ngaran nia. Sia asin an saiyang pamilya nagmaigot na gibohon an tama sa pagheling nin Dios. Kan an Dios magdesisyon na laglagon an mga maraot sa kinaban na iyan, boot niang protehiran si Noe asin an mga hayop sa daga. Kaya sinabihan sia nin Dios na gumibo nin arka​—sarong dakulaon na sakayan na korteng rektanggulo. Sa laog kaiyan, iingatan na buhay si Noe asin an pamilya nia, kaiba an dakol na klase nin hayop, sa maabot na baha na lakop sa globo. Si Noe nagkuyog sa Dios. Durante kan mga dekada nin paggibo ni Noe kan arkang iyan, sia man “sarong parahulit nin katanosan.” (2 Pedro 2:5) Pinatanidan nia an mga tawo manongod sa maabot na Baha, alagad sia dai ninda inintindi. Nag-abot na an oras tanganing maglaog sa arka si Noe asin an pamilya nia kaiba an mga hayop. Isinera nin Dios an pinto kan arka. Buminagsak an oran.

Uminoran nin makosogon sa laog nin 40 aldaw asin 40 banggi sagkod na malantopan nin tubig an bilog na daga. Mayo na an mga maraot. Pakalihis nin mga bulan, mantang nagbababa an tubig, an arka namugtak sa sarong bukid. Kan panahon na an mga nakasakay sa arka puede nang lumuwas nin ligtas, sinda sarong bilog na taon nang nakasakay dian. Bilang pagpasalamat, si Noe nagdolot ki Jehova. An Dios nagsimbag paagi sa pagsierto ki Noe asin sa saiyang pamilya na Sia dai na noarin man mapaabot giraray nin baha tanganing pohoon an gabos na nabubuhay sa ibabaw kan daga. Itinao ni Jehova an hablon-dawani bilang naheheling na garantiya, sarong pagirumdom kan nakakarangang panugang ini.

Pakatapos kan Baha, an katawohan tinawan man nin Dios nin nagkapirang bagong pagboot. Tinogotan nia sinda na magkakan nin karne nin mga hayop. Minsan siring, ipinagbawal nia an pagkakan nin dugo. Pinagbotan man nia an mga naggikan ki Noe na lumakop sa daga, alagad dai nagkuyog an nagkapira sa sainda. An mga tawo nagkasararo sa pangengenot nin sarong lider na an ngaran Nimrod asin nagpoon na magtogdok nin dakulang tore sa siudad nin Babel, na paghaloyhaloy inapod na Babilonya. An katuyohan ninda iyo na suwayon an pagboot nin Dios na lumakop sinda sa bilog na daga. Alagad inolang nin Dios an mga rebelde paagi sa pagribaraw sa sarong lenguahe ninda asin pagpangyari sa sainda na magtaram nin manlaenlaen na lenguahe. Huling dai sinda magkasinarabotan, binayaan ninda an pagtogdok asin nagsuruwayan.

​—Basado sa Genesis kapitulo 6 sagkod 11; Judas 14, 15.