“Ako Makangangalas na Ginibo”

“SAEN ako hale?” Ihinahapot ini kan kadaklan na sadit na aki sa panapanahon. Kun nagdadakula an mga aki, an saindang hapot parateng nagigin mas hararom: “Saen naggikan an buhay?” An hapot na ini pinag-orolayan na sa laog nin rinibong taon, asin sa presente dakol na sientista an minamansay an ebolusyon bilang an pinakarasonableng simbag sa dakulang isipon manongod sa ginikanan nin buhay. Sa pundamental, an paliwanag kan ebolusyonista iyo na an buhay basta na sanang naglataw.

Mga 3,000 na taon na an nakaagi, nagsurat si Hadeng David: “Sa makangingirhat na paagi ako makangangalas na ginibo.” (Salmo 139:14) Mientras na mas dakol an nanonodan niato dapit sa buhay, dakol man na katotoohan an naheheling niato sa mga tataramon na iyan. Tunay nanggad, an pisikong si Fred Hoyle nagsurat: “Mantang padakol nang padakol an nadidiskobre kan mga biokemiko dapit sa makangingirhat na pagkakomplikado nin buhay, malinaw na an mga posibilidad na iyan nagpoon paagi sa pagkanorongod sana sadit na gayo kaya an mga iyan puwedeng biyong ignorohon. An buhay dai puwedeng basta na sanang naglataw.”

Kaya ano talaga an ginikanan nin buhay? An duwang pambukas na artikulo sa magasin na ini ipinapaliwanag an hapot na iyan. Kun gusto nindo nin dugang na impormasyon o gusto nindong songkoon kamo nin saro na makikipag-adal sa saindo sa Biblia nin daing bayad, tabi sumurat sa Watch Tower, P.O. Box 2044, 1099 Manila, o sa angay na direksion na nalilista sa pahina 2.