Ililigtas ni Jehova an Daga

AN SARONG aeropuerto na nasa sarong isla kan Maldives sinisirrahan sa laog nin nagkapirang oras kada aldaw. Taano? Huli ta kun taob nagbabaha sa landingan, na ginigibong peligroso para sa mga eroplano na maglanding. May mga sientista na natatakot na puwedeng lumangkaw nin kisuerra sarong metro an dagat sa mga isla kan Maldives sa masunod na siglo. Minsan ngani garo baga ini kadikit sana, an siring na paglangkaw puwedeng biyong paraon sa mapa an pitong islang nasyon. Iyo nanggad, sono sa UN Chronicle, an dos metros na paglangkaw puwedeng ilobong an haros bilog na grupo nin mga isla, mga 1,200 na isla!

Ano an dahelan kan paglangkaw kan dagat? Sono sa Programa kan NU sa Palibot, an polusyon sa atmospera kan daga gikan sa “mga alisngaw kan pag-init kan daga” nagpapangyari na dumakula an mga dagat sa mas mainit na mga rehiyon, matunaw an mga ice cap asin glacier, asin sa siring, lumangkaw an mga dagat. An Panos Institute sa Londres nagsasabi na an polusyon “puwedeng nagin dahelan nin luway-luway na panglobong kapahamakan na liniliwat an mismong mga linderos kan daga asin dagat.”

An pag-eksister kan panglobong pag-init pinagdedebatehan pa kan mga sientista. Minsan siring, makakasierto kita na dai oolangon kan mga problema sa palibot an katuyohan nin Dios. “Marigon na itinindog an mabungang daga,” nagsasabi an Biblia. “Nungka iyan na matatanyog.” (1 Cronica 16:30) Kontrolado ni Jehova an palibot kan daga, asin makapaggagayagaya kita na sa dai mahahaloy ililigtas nia sa pagkalaglag kapwa an daga asin katawohan.​—Salmo 24:​1, 2; 135:6; 2 Pedro 3:13.

[Pasasalamat para sa pinagkuanan kan retrato sa pahina 31]

Drowing basado sa retrato kan NASA