‘Kaipuhan Niato an Sadiosan na mga Tawo’

AN PAGKASADIOSAN bihira sa presenteng kinaban. Pero, iyan sarong pundamental na kahagadan sa mga Kristiano. Si Pablo nagsurat: “Minamawot niamo na gumawe nin sadiosan sa gabos na bagay.” (Hebreo 13:18) Ini an boot na gibohon ni Wilma, saro sa Mga Saksi ni Jehova sa Faenza, Italia.

An peryodikong Il Resto del Carlino nagsasaysay na kan makapurot sia nin pitaka na may laog na dakulang kantidad nin kuarta sa luwas nin sarong supermarket sa saiyang siudad, itinao nia iyan sa mga pulis na “mayo nin pag-alangan” tanganing ikabalik iyan sa kagsadiri kaiyan.

Kan mabaretaan ini kan alkalde, tolos-tolos na nagpadara sia nin halipot na surat nin pasasalamat ki Wilma. “Sa ngaran kan Siudad,” an isinurat nia, “bilog na puso na pinasasalamatan taka huli sa saimong marahay na gibo. An satong nobleng siudad nin Faenza nangangaipo nin marahay asin sadiosan na mga tawo.”

Baga man mahayag o dai an marahay na mga gibo, maninigo na permi kitang magmaigot na magin sadiosan. Siring sa isinasadol kan Banal na Kasuratan, “kami nagmamaigot na gibohon an tama bako sanang sa pagheling nin Dios kundi sa pagheling man nin mga tawo.”​—2 Corinto 8:​21, The Jerusalem Bible.