Pagkamoot sa mga “May Relasyon sa Sato sa Pagtubod”
AN TUNAY na mga Kristiano igwa nin garo sa pamilyang pagkaborogkos. Tunay nanggad, poon kan enot na siglo C.E., inapod ninda an lambang saro bilang “tugang na lalaki” asin “tugang na babae.” (Marcos 3:31-35; Filemon 1, 2) Bako sana ining mga tataramon; iyan paglaladawan kan namamatean kan mga parasamba sa Dios para sa lambang saro. (Ikomparar an 1 Juan 4:7, 8.) Si Jesus nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”—Juan 13:35.
An siring na pagkamoot risang-risa kan Hulyo 1997 kan an halawig na tigmara sinundan nin makosog na pag-oran asin pagbaha sa Chile. Bigla na sana, dakol an nangaipo nin kakanon, gubing, asin iba pang mga bagay. Sa mga panahon na may kalamidad, an Mga Saksi ni Jehova nagmamaigot na sunodon an konseho ni Pablo sa mga taga Galacia: “Tunay nanggad, kun siring, mantang igwa kita nin marahayrahay na panahon para kaiyan, gumibo kita kan marahay sa gabos, alagad orog na sa mga may relasyon sa sato sa pagtubod.”—Galacia 6:10.
Huli kaini, an Mga Saksi ni Jehova marikas na inorganisar an saindang sadiri tanganing rumesponde. An mga kakanon, gubing, asin kaagid na mga bagay tinipon, klinaseklase, pinatos, dangan ipinadara sa lugar na may kalamidad. An mga aki nagdonar pa ngani nin mga kawatan! An sarong tugang na babae nabiglang marhay kan maheling nia an Kingdom Hall na pano-pano nin mga ayuda. “Namungnan ako, na dai aram kun baga mangisi o mahibi,” an sabi nia. “Idto nanggad an mga kaipuhan niamo.”
Dangan, dai linalaoman, naglinog sa sarong parte kan lugar man sanang iyan na apektado kan pagbaha. Dakol na harong an nagaba. Tanganing maasikaso an pangangaipo, nag-organisar nin dugang pang mga komite sa pag-ayuda. An Rehional na mga Komite sa Pagtogdok, na iyo an normal na nag-aasikaso sa konstruksion nin mga pasilidad na pinagtitiriponan kan Mga Saksi ni Jehova, nagtabang asin nagtao kan saindang suporta. An resulta? An simple sanang mga harong—na dinisenyo asin itinogdok kan mga tugang—idinonar sa mga nawaran nin harong. Minsan ngani an mga harong na ini bakong magarbo, iyan laen na marhay sa mga harong na ipinautang nin sekular na mga programa sa ayuda asin na mayo nin mga salog asin bintana patin dai pinintahan.
An nagkapirang tugang hararayo an biniahe tanganing tumabang. An tsirman kan sarong Rehional na Komite sa Pagtogdok naglibot sa laog nin duwang magkasunod na aldaw—minsan ngani nasa silyang de rueda. An sarong tugang na lalaki na buta mahigos na nagtrabaho, na dinadara an mga panalgan sa karpintero na nagpuputol kaiyan sa kinakaipuhan na sokol. An sarong tugang na lalaki na bongog tinitipon an mga panalgan asin dinadara iyan kun saen kaipuhan.
Dakol na nagmamasid an naghanga sa itinaong tabang kan mga tugang. Sa sarong banwaan an sarong sasakyan nin mga pulis ipinarada harani sa harong nin sarong tugang na babae na hinihirahay. Nag-usyoso an mga pulis. An saro hinapot an tugang na lalaki: “Sairisay an mga trabahador na ini na garo maogmahon, asin gurano an bayad sa sainda?” Ipinaliwanag kan tugang na sinda gabos boluntaryo. An saro sa mga pulis nagpaliwanag na sia nagbayad nin bulanan na tinagba sa saiyang iglesia, pero dai lamang sia sinongko kan saiyang pastor poon kan maglinog! Kan sunod na aldaw an tugang na babae inapodan sa telepono nin sarong pulis. Naobserbaran man nia an mga trabahador. Sia nagsabi na naghanga siang marhay sa entusiastikong espiritu kan mga trabahador kaya garo gusto niang tumabang!
Totoo nanggad, an programa sa ayuda sa Chile sarong magayagayang eksperyensia para sa mga boluntaryo asin sarong marahayon na patotoo sa mga nagmamasid.