Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Ano an nagpapasil na akoon an Navidad sa Korea?

May suanoy na paniniwala sa Korea asin sa nagkapirang iba pang kadagaan manongod sa sarong dios na namamahala sa kusina na pinaniniwalaan na minaagi sa tsimenea asin nagreregalo kun Disyembre. Siring man, pakatapos kan Guerra Mundial II, an mga soldados kan E.U. nanao nin mga regalo asin ayuda sa lokal na mga simbahan.​​—12/15, pahina 4, 5.

• Bilang kaotoban kan Isaias 21:​8, anong “bantay” igwa an Dios sa satong panahon?

An linahidan nin espiritung mga Kristiano, na naglilingkod bilang grupong bantay, inaabisohan an mga tawo manongod sa kahulogan kan mga pangyayari sa kinaban na minaotob sa hula kan Biblia. Tinabangan man ninda an mga estudyante sa Biblia na mamidbid asin likayan an bakong sono sa Kasuratan na mga doktrina asin kaugalean.​​—1/1, pahina 8, 9.

• Sairisay an “Magturugang na Polaco”?

Sinda sarong sadit na grupong relihioso kan ika-16 asin ika-17 siglo sa Polandia na nag-enkaminar nin fiel na pagsuportar sa Biblia asin kun siring hinaboan an lakop na mga doktrina kan iglesia, siring baga kan Trinidad, pagbautismo sa omboy, asin kalayo sa impierno. Pag-abot nin panahon, sinda linamag nin grabe asin napiritan na magsuruwaysuway pasiring sa ibang kadagaan.​​—1/1, pahina 21-3.

• Taano ta dapat na pagtiwalaan an mga hula sa Biblia imbes na an mga prediksion nin mga futurologo o astrologo?

An naghihingakong mga propetang tawo napatunayan na dai masasarigan huli ta iniignoro ninda si Jehova asin an Biblia. Solamente an mga hula sa Biblia an makatatabang sa saindo na maaraman kun paano an mga pangyayari nagkakaigwa nin kabtang sa katuyohan nin Dios, na pinakikinabang kamo asin an saindong pamilya sagkod lamang.​​—1/15, pahina 3.

• Ano an nagkapirang ebidensia na nagpapatunay na kita nabubuhay sa huring mga aldaw?

Naheheling niato an mga epekto kan pagpalayas ki Satanas sa langit. (Kapahayagan 12:9) Nabubuhay kita sa panahon kan pangultimong “hade” na nasambitan sa Kapahayagan 17:​9-​11. Nagkakadikit an bilang kan tunay na linahidan na mga Kristiano, pero minalataw na an nagkapira sa sainda yaon pa sa daga sa pagpoon kan dakulang kahorasaan.​​—1/15, pahina 12, 13.

• Kasuarin isinurat an librong Habacuc, asin taano ta maninigo kitang magin interesado dian?

An librong ini sa Biblia isinurat kan mga 628 B.C.E. Iyan igwa kan paghokom ni Jehova tumang sa suanoy na Juda asin tumang sa Babilonya. Tinatratar man kaiyan an paghokom nin Dios na madali nang umabot sa presenteng maraot na sistema.​​—2/1, pahina 8.

• Saen sa Biblia makukua niato an madonong na hatol nin sarong ina para sa may kakayahan na mga agom na babae?

An ultimong kapitulo kan librong Talinhaga, kapitulo 31, ekselenteng gikanan nin siring na hatol.​—2/1, pahina 30, 31.

• Taano ta makapasasalamat kita na ihinayag ni Jehova sa sato an “isip ni Cristo”? (1 Corinto 2:16)

Paagi sa rekord kan Ebanghelyo, pinangyari ni Jehova na maaraman niato an kaisipan, saboot, mga aktibidad, asin ipinaoorog ni Jesus. Makakatabang ini sa sato na magin arog nanggad ki Jesus, nangorogna sa pagdodoon na itinatao niato sa nagliligtas-buhay na paghuhulit.​​—2/15, pahina 25.

• Sinisimbag daw nin Dios an mga pamibi ngonyan?

Iyo. Minsan ngani ipinaheheling kan Biblia na dai nin Dios sinisimbag an gabos na pamibi, pinatutunayan kan mga eksperyensia sa presenteng aldaw na parate niang sinisimbag an mga tawo na namibi para sa karangahan asin tabang sa mga bagay na siring baga kan pagresolber sa mga problema nin mag-agom.​​—3/1, pahina 3-7.

• Ano an magigibo niato tangani na makakua nin kosog nin Dios?

Puede niato iyan na hagadon sa pamibi, kumua nin espirituwal na kosog sa Biblia, asin mapakosog paagi sa Kristianong asosasyon.​​—3/1, pahina 15, 16.

• Paano matatabangan nin mga magurang an saindang mga aki na makinabang nin orog sa Kristianong mga pagtiripon?

Matatabangan ninda an saindang mga aki na magdanay na mata, tibaad paagi sa pagpatorog sainda nin kadikit bago pa kaiyan. Puedeng enkaminaron an mga aki na kumua nin “nota,” siring baga nin pagmarka sa sarong papel kun ginagamit an pamilyar na mga termino o ngaran.​​—3/15, pahina 17, 18.

• Ano an nagkapirang bagay na manonodan niato sa halimbawa ni Job?

Inenot ni Job an saiyang relasyon sa Dios, mayong ipinaorog sa pagtratar sa kapwa tawo, nagmaigot na magin maimbod sa saiyang agom, nagpaheling nin pagmalasakit sa espirituwalidad kan saiyang pamilya, asin fiel na nagtagal sa irarom nin pagbalo.​​—3/15, pahina 25-​7.

• Igwa daw an Biblia nin natatagong kodigo na nagtatao nin pakarorop sa pormang kodigo na mga mensahe?

Dai. An mga paghihingako manongod sa natatago daang kodigo puede man na gibohon manongod sa nagkapirang sekular na libro. An mga kodigo daa sa Biblia magigin daing kamanungdanan huli sa pagkakalaen sa pagdeletriya sa Hebreong mga manuskrito.​​—4/1, pahina 30, 31.