Bareta kan mga Parabalangibog kan Kahadean

Pagbaribi sa mga Banhi nin Katotoohan sa Chile

SA DESIERTO kan amihanan na Chile, mga taon an tibaad lumihis bago umoran. Alagad, kun umoran na, an mara, magapong daga nagigin totoong alpombra nin mga burak na laen-laen an kolor. An pambihirang paheling na ini nakaaakit sa mga turista hale sa bilog na nasyon.

Minsan siring, may mas interesanteng nangyayari sa tahaw kan mga taga Chile. An mga tubig nin katotoohan sa Biblia nagbobolos sa gabos na lugar kan nasyon, asin dakol na sinserong tawo an “nagbubukad” sa pagigin mga disipulo ni Jesu-Cristo. An sarong paagi na ginagamit tanganing palakopon an mga tubig na ini nin katotoohan iyo an telepono. Ipinaheheling kan minasunod na mga eksperyensia an marahay na mga resulta na nagigibo kan paaging ini nin paghuhulit.

• An sarong bilog na panahon na paraebanghelyo na an ngaran Karina hinagadan na idemonstrar sa sarong programa sa pansirkitong asamblea kun paano maghulit paagi sa telepono. Minsan siring, si Karina nungka pa kaidtong nakikabtang sa kabtang na iyan kan paghuhulit. Tanganing parigonon an boot nia na makikabtang sa programa kan asamblea, rinepaso nin sarong magurang sa kongregasyon saka kan saiyang agom kaiba ni Karina an nagkapirang punto kun paano maghulit paagi sa telepono. Sinadol man sia ninda na arangon an paggiya ni Jehova sa bagay na iyan. Ginibo nia iyan asin sa katapustapusi nagdesisyon sia na probaran na mag-apod.

Pinili ni Karina an sarong numero nin telepono sa kaharaning baryo. Nagsimbag an sarong teleponista, asin ipinaliwanag ni Karina an katuyohan kan pag-apod. Paborable an nagin simbag kan teleponista, asin ginibo an mga areglo na mag-olay liwat pakalihis nin tolong aldaw. An pagdalaw liwat paagi sa telepono nagresulta sa sarong pag-adal sa Biblia, na ginagamit an brosyur na Ano an Kahagadan sa Sato nin Dios? Poon kaidto, nagkaigwa sinda nin interesante asin buhay na mga pag-adal, asin si Karina nagpadara nin mga babasahon tanganing simbagon an mga hapot kan babae.

• Si Bernarda nagkaigwang inisyatiba na maghulit sa sarong lalaki na napasalang idayal an numero kan saiyang telepono. Imbes na magpaheling nin pagkauyam, ipinamidbid ni Bernarda an saiyang sadiri na saro sa Mga Saksi ni Jehova asin nag-alok nin tabang. Nabuksan an orolay, asin an lalaki naghinanyog mantang ipinaliliwanag nia kun paano hahaleon kan Kahadean nin Dios sa dai na mahahaloy an inhustisya. Itinao kan lalaki ki Bernarda an saiyang numero nin telepono, asin si Bernarda naggibo nin mga pagdalaw liwat paagi sa telepono. Durante kan saro sa saindang mga pag-orolay, binasa ni Bernarda sa saiya an sarong kabtang kan librong Kaaraman na Minagiya Pasiring sa Buhay na Daing Katapusan. Naghapot sia kun paano sia magkakaigwa nin kopya, asin pinadarahan sia ni Bernarda nin sarong kopya kaiba nin sarong Biblia. Ginibo an mga areglo na dalawon sia nin sarong lokal na tugang na lalaki, na nagpapadagos ngonyan na “baribian” an matubang na “tinanom” na ini.

Iyo, sa marang espirituwal na daga kan kinaban na ini, an natatagong mga banhi naghahalat na tumubo pag inabot kan nagtatao nin buhay na mga tubig nin katotoohan. Rinibong napapaha an padagos na ‘nagtutubo’ asin “nagbubukad” sa pagigin fiel na mga lingkod ni Jehova Dios.—Isaias 44:3, 4.