Bareta kan mga Parabalangibog kan Kahadean

“Gusto Kong Paglingkodan an Dios”

“LUMUWAS kamo sa saiya, banwaan ko.” Pangapodan iyan kan anghel na nadangog ni apostol Juan kan enot na siglo C.E. Sa satong kaaldawan minilyon na sadiosan an puso an naghimate asin nagdulag hale sa “Dakulang Babilonya,” an pambilog na kinaban na imperyo nin falsong relihion. (Kapahayagan 18:1-4) Kabilang sa sainda si Wilner na taga Haiti, na nagsasaysay kan saiyang eksperyensia.

“Namundag ako kan 1956 sa sarong pamilya na debotong Katoliko sa sarong sadit na banwaan nin St. Marc, Haiti. Imahinara an kagayagayahan kan sakong pamilya kan mapili ako, kaiba nin duwa pa na hale sa samong banwaan, na maglaog sa seminaryo sa St. Michel de l’Atalaye, Haiti. Dangan, kan 1980, ipinadara kami sa Stavelot, Belhika, para sa dugang pang pagsasanay. Duman nag-eskuela man kami sa sarong unibersidad na Katoliko.

“Kan primero entusiastiko ako na magin padi. Sarong aldaw sa kakanan nin pangodtohan, an padi na namamahala sa samong grupo sinabihan akong magpawalat nin pirang minuto huli ta may sasabihon sia sa sako. Imahinara an pagkabigla ko kan prangkang sabihon nia na may gusto sia sako! Sinayumahan ko an saiyang mga pagdolok alagad biyo akong nadesganar. Nagsurat ako sa sakong pamilya manongod sa pangyayaring iyan asin naghale sa seminaryo pakalihis nin pirang bulan, sa ibong kan saindang pagkaanggot. Nakakua ako nin dagosan sa baryo asin nagpadagos sa pag-adal sa ibang propesyon.

“Kan ako magbalik sa St. Marc, mayo na ako ni kadikit na kompiansa sa Iglesia Katolika. Minsan siring, gusto kong paglingkodan an Dios, alagad dai ko aram kun ano an dapat kong gibohon. Nagduman ako sa iglesiang Adventista, sa iglesiang Ebenezer, asin sa iglesiang Mormon. Inaanod-anod ako sa espirituwal.

“Dangan nagirumdoman ko na kan ako nasa seminaryo sa Belhika, pirme kong binabasa kaidto an Biblia na trinadusir ni Crampon. Dian ko naaraman na may ngaran an Dios. Kaya ginagamit an saiyang ngaran namibi ako nin odok sa Dios na tabangan ako na manompongan an tunay na relihion.

“Dai nahaloy pakatapos kaiyan, may duwang Saksi ni Jehova na nagbalyo harani sa sakong istaran. Sinda toninong, magalang, asin may dignidad. Naghanga ako sa saindang pamumuhay. Sarong aldaw, an saro sa duwang Saksi, inimbitaran akong umatender sa taonan na Memorial kan kagadanan ni Cristo. Naogma ako nin biyo sa pagtiripon asin uminoyon na magkaigwa nin regular na pag-adal sa Biblia kaiba kan mga Saksi. Sa laog nin mga anom na bulan, ako nakombensir na nanompongan ko na an tamang paagi na paglingkodan an Dios. Idinusay ko an sakong buhay ki Jehova asin nabautismohan kan Nobyembre 20, 1988.”

Pag-abot nin panahon, si Wilner naglaog sa pambilog na panahon na paglilingkod. Ngonyan, sia naglilingkod bilang sarong magurang sa kongregasyon. Sia asin an saiyang agom, kaiba an saindang duwang aki, maogmang naglilingkod sa kongregasyon.

[Ritrato sa pahina 9]

Paagi sa pagbasa kan Biblia, nadiskobre ni Wilner na Jehova an ngaran nin Dios