An Presenteng Pan-akit nin mga “Santo”

“Nagigirumdoman daw nindo kan panahon na garo baga sumo na kita kun nasasambitan an mga eroe? Garo baga dai iyan nakaapektar sa 4.2 milyones na Amerikanong nagdalan kan lobong ni Mother Teresa kan Set. 13. Poon kan sia magadan kan Set. 5, daing ontok na hinahagad kan mga tawo sa Batikano na opisyal siang ideklarar na santa. Pira sana an nagdududa na mangyayari iyan.”—Sun-sentinel, Estados Unidos, Oktubre 3, 1997.

AN HUMANITARYO asin pag-abuloy sa mga nangangaipo kan Katolikong misyonera na si Mother Teresa an ibinibilang nin dakol na iyo an kahulogan nin pagigin totoong santo. Igwa nin mga personaheng eroe sa iba pang relihion. Minsan siring, tibaad mayo nin opisyal na rinekonoser arog kan mga idineklarar bilang santo kan Iglesia Katolika Romana.

Si Papa Juan Paulo II nagdeklarar nin labing 450 katawo bilang santo durante kan saiyang pamamahala bilang papa, na labi pa sa pinagsarong kabilangan nin mga idineklarar na santo kan gabos na iba pang papa sa ika-20 siglo.a Taano ta nagdadanay an arog kaiyan na debosyon sa “mga santo,” na an dakol sa mga iyan daing gayo midbid sa tahaw nin mga Katoliko sa pankagabsan?

An teologo sa Unibersidad nin Notre Dame na si Lawrence Cunningham nagpapaliwanag: “An mga tawo interesado sa konsepto nin kabanalan sa kinaban. Ipinaheheling kan mga santo na posible an buhay bilang sarong eroe, dawa ngonyan.” Dugang pa, pinaniniwalaan na an “mga santo” igwa nin espesyal na paagi nin pagdolok sa Dios, na ginigibo sindang epektibong mga parapangoltanan para sa mga buhay. Kun nakakanompong nin mga relikya o bangkay nin sarong “santo,” iginagalang iyan na marhay sa paniwala na may kapangyarihan iyan.

An Katesismo kan Konsilyo nin Trent, na ipinublikar kan ika-16 na siglo tanganing patunayan liwat an opisyal na doktrinang Katoliko, nagdekreto: “May katanosan kami sa pagkonklusyon, na an pagtao nin onra sa mga santo ‘na nagtorog sa Kagurangnan,’ an pag-arang para sa saindang pangongoltanan, asin an dakulang paggalang sa saindang sagradong mga relikya asin abo, imbes na makaina, nakakokontribwir nin dakula na madugangan an kamurawayan nin Dios, kun paanong an Kristianong paglaom sa siring nagigin buhay asin masarig, asin sia mismo ogmahon na arogon an saindang mga birtud.” (The Catechism of the Council of Trent, 1905) An tunay na mga Kristiano gusto nanggad na mamuhay nin birtuoso, dumolok sa Dios sa tamang paagi, asin mag-ako nin tabang nin Dios. (Santiago 4:​7, 8) Kun siring, oyon sa Tataramon nin Dios, siisay an kualipikado bilang tunay na mga santo? Asin anong kabtang an ginigibo ninda?

[Nota sa Ibaba]