Makakayanan Nindo an Bagyo

SA DELIKADONG mga panahon na ini, dakol an nagtatagal sa garo bagyong mga kasakitan. Pero, para sa mga Kristiano, an pagkamoot sa Dios asin kaimbodan sa saiyang mga prinsipyo nakakatabang sa sainda na makatagal. Paano? An simbag makukua sa sarong ilustrasyon na sinabi ni Jesu-Cristo. Ikinomparar nia an saiyang makinuyog na mga disipulo sa “sarong tawong mapagmansay, na nagtogdok kan saiyang harong sa ibabaw kan dakulang gapo.” Sinabi ni Jesus: “Buminolos an oran asin nagdatong an baha asin nagdoros patin hinampak nin makuri an harong na idto, alagad ta iyan dai nagaba, huli ta iyan napapasikad sa dakulang gapo.”—Mateo 7:24, 25.

Mangnohon na dawa mapagmansay an tawo sa ilustrasyon, napapaatubang pa man giraray sia sa kasakitan—na irinerepresentar kan pagbolos nin oran, mga baha, asin mapanlaglag na doros. Kun siring, dai ipinaparisa ni Jesus na madudulagan kan saiyang mga disipulo an gabos na kasakitan asin mamumuhay na may dagos-dagos na katoninongan asin katrangkilohan. (Salmo 34:19; Santiago 4:13-15) Alagad sinabi nanggad nia na an maimbod na mga lingkod nin Dios makakapangandam sa asin makakayanan an siring na maunos na mga kasakitan asin krisis.

Pinonan ni Jesus an ilustrasyon paagi sa pagsabi: “An gabos na nagdadangog sa mga tataramon kong ini asin naggigibo kaiyan ibabaing sa sarong tawong mapagmansay, na nagtogdok kan saiyang harong sa ibabaw kan dakulang gapo.” Siempre, si Jesus nagtataram, bakong manongod sa pagtogdok nin literal na mga harong, kundi manongod sa pagpaoswag nin buhay. An mga naghihimate sa mga tataramon ni Cristo naggagamit nin pakamansay asin nagpapaheling nin marahay na paghusgar. Pinapaoswag ninda an saindang mga motibasyon asin gibo basado sa marigon na dakulang gapo kan mga katokdoan ni Cristo paagi sa pag-aplikar kan mga itinokdo sa sainda. Interesante nanggad, an piguratibong dakulang gapo na ini dai makukua sa ibabaw. An tawo sa ilustrasyon kaipuhan na magkalot nin ‘hararom’ tanganing maabot iyan. (Lucas 6:48) Kaagid kaiyan, an mga disipulo ni Jesus padagos na naghihingoa tanganing kultibaron an nagdadanay na mga kualidad na orog na nagpaparani sa sainda sa Dios.—Mateo 5:5-7; 6:33.

Ano an nangyayari kun mabalo kan garo bagyong mga kadepisilan an integridad kan Kristianong pundasyon kan mga parasunod ni Jesus? An saindang gikan sa boot na pagkuyog sa mga katokdoan ni Cristo asin an saindang Kristianong mga kualidad nagigin gikanan nin kosog durante kan siring na mga kasakitan asin, sa katapustapusi, durante kan nagdadangadang na bagyo nin Armagedon. (Mateo 5:10-12; Kapahayagan 16:15, 16) Iyo, paagi sa pagsunod sa mga katokdoan ni Cristo, mapangganang nakakayanan kan dakol an garo bagyong mga pagbalo. Iyo man kamo.—1 Pedro 2:21-23.