Nagigirumdoman daw Nindo?

Napahalagahan daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Sa anong paagi puede kamong payamanon nin Dios?

Kan nakaagi, an nagkapira na arog baga ni Abraham asin Salomon binendisyonan ni Jehova nin materyal na mga kayamanan. Alagad kaiba sa mga kayamanan na kaipuhan na marhay nin mga Kristiano asin na puedeng matabangan nin Dios an sarong tawo na makua iyo an pagtubod, katoninongan, pagkakontento, asin kaogmahan.—9/1-E, pahina 3-7.

• Ano an manonodan niato sa pagligtas ni Jesus ki Pedro kan sia nag-iirarom na sa dagat? (Mat. 14:28-31)

Kun maheling niato an garo baga kakulangan nin pagtubod nin sarong tugang, puede niatong piguratibong iunat an satong kamot asin tabangan sia na magkaigwa nin orog pang pagtubod.—9/15, pahina 8.

• Ano an isinakripisyo ni Jehova sa pagligtas sa sato?

Tinagalan ni Jehova an pagpasakit asin pag-olog-olog sa saiyang Aki. Asin, arog kan ilinadawan kan pagigin andam ni Abraham na idolot an saiyang aki, tinagalan ni Jehova an paggadan sa saiyang Aki na garo kriminal.—9/15, pahina 28-29.

• Taano ta sarong kayamanan an Vatican Codex?

Iyan sarong Griegong manuskrito na may petsang mayo pang 300 na taon pagkatapos na makompleto an Biblia. Igwa iyan kan haros kompletong teksto kan Hebreong Kasuratan asin kan Kristianong Griegong Kasuratan. Saro iyan na kasangkapan na ginagamit kan mga iskolar sa pagdeterminar kan yaon sa orihinal na teksto kan Biblia.—10/1, pahina 18-20.

• Ano an itinotokdo sa sato kan Talinhaga 24:27 manongod sa ‘pagtogdok nin pamilya’?

An sarong lalaki na gustong mag-agom maninigong mag-andam para sa paninimbagan na iyan. Kaiba digdi an pagigin andam na magsustento sa pamilya asin na magin espirituwal na payo nin pamilya.—10/15, pahina 12.

• Taano ta salang sabihon na an Mga Saksi ni Jehova sarong Protestanteng relihion?

An Protestantismo nagpoon kan ika-16 na siglo sa Europa sa paghihingoa na repormaron an Iglesia Katolika Romana. An “Protestantismo” nanonongod sa mga nagsusuportar sa mga pasohan kan Reporma. An Mga Saksi ni Jehova dai minimidbid an unibersal na autoridad kan papa asin bilog na puso nindang sinusuportaran an pagigin mahalagang marhay kan Biblia, pero isinisikwal ninda an dakol na bakong sono sa Kasuratan na mga katokdoan asin kaugalean na parateng yaon sa mga relihion na Protestante.—11/1-E, pahina 19.

• Kaipuhan daw na makanood an saro nin Hebreo asin Griego tanganing masabotan an Biblia?

Dai. An pagkaigwa nin kaaraman sa mga lenguaheng iyan dai man nangangahulogan na mas posibleng marhay na masasabotan nin saro an mensahe kan Biblia. An saro na nag-adal kan mga lenguaheng iyan nagsasarig pa man giraray sa mga diksionaryo asin libro dapit sa gramatika. An katunayan na iningatan nin Dios na nakatradusir an mga tataramon kan saiyang pinakadakulang Lingkod nagpapaheling na puedeng gamiton asin manodan nin saro an katotoohan hale sa mga traduksion kan Biblia na nasa presenteng mga lenguahe.—11/1-E, pahina 20-23.

• Paanong si Jehova asin si Jesus nagin mga halimbawa nin marahay na ugale?

Sa ibong kan halangkaw na posisyon ni Jehova, an mga tawo tinatratar nia na may kabootan asin paggalang. Kinaolay nia si Abraham asin si Moises na naggagamit nin termino sa Hebreo na parateng tinatradusir na “tabi.” (Genesis 13:14; Exodo 4:6) An Dios naghihinanyog man sa mga tawo. (Genesis 18:23-32) Si Jesus iyo man, andam siang tumabang sa mga kaibaiba nia, na sa parate ginagamit pa ngani an saindang ngaran.—11/15, pahina 24-25.

• Taano ta dai isineselebrar kan tunay na mga Kristiano an Lunar na Bagong Taon?

An Lunar na Bagong Taon sarong importanteng selebrasyon na nasa mga kalendaryong ginagamit sa Asia. Parateng kalabot sa selebrasyon na iyan an pagmamaigot na masegurado an suerte asin ikapaheling an paggalang sa mga espiritu. An mga Kristiano nagtataong onra asin paggalang sa saindang mga magurang, alagad dai sinda nakikiayon sa mga bangkete na nakasentro sa pakikiasosyar sa nagadan nang mga apoon para sa proteksion o paghagad nin pabor sa mga dios nin pamilya.—12/1-E, pahina 20-23.