Rumani sa Dios

“An Saimong Kahadean Siertong Magigin Marigon”

2 SAMUEL 7:1-16

SA BILOG na kasaysayan, dakol na namamahalang tawo an hinale sa puesto. An nagkapira nadaog na sa suminunod na eleksion, mantang an iba puersahan na pinatalsik. Kumusta man si Jesu-Cristo, an Hade kan Kahadean nin Dios sa langit? Igwa daw nin ano man na makakaolang sa saiya sa pamamahala bilang Hadeng nombrado nin Dios? An simbag manonompongan sa sinabi ni Jehova ki Hadeng David kan suanoy na Israel, siring kan nakarekord sa 2 Samuel kapitulo 7.

Sa pagpopoon kan kapitulo, naaaraman niato na si David nasupog huling sia, na saro sanang tawong hade, nag-eerok sa sarong magayon na palasyo, mantang an kaban nin Dios nakabugtak sa sarong simple sanang tolda.a Si David nagpahayag kan saiyang pagmawot na magtogdok nin angay na harong, o templo, para ki Jehova. (Bersikulo 2) Alagad bako si David an matogdok kan harong. Paagi ki propeta Natan, sinabihan ni Jehova si David na sarong aki nia an matogdok kan templo.—Bersikulo 4, 5, 12, 13.

Napahiro si Jehova kan odok sa pusong pagmawot ni David. Huli sa debosyon ni David asin kaoyon nin hula, nakipagtipan an Dios ki David na may ibabangon Siang saro hale sa makahadeng linahe ni David na mamamahala sagkod lamang. Ipinaabot ni Natan ki David an solemneng panuga nin Dios: “An saimong kamag-anakan asin an saimong kahadean siertong magigin marigon sagkod sa panahon na daing talaan sa atubangan mo; an saimo mismong trono magigin masarig sagkod sa panahon na daing talaan.” (Bersikulo 16) Siisay an permanenteng Paramana kan tipan na ini—an Saro na mamamahala sagkod lamang?—Salmo 89:20, 29, 34-36.

Si Jesus na taga Nazaret naggikan ki David. Kan ibinabareta an pagkamundag ni Jesus, sarong anghel an nagsabi: “Itatao sa saiya ni Jehova Dios an trono ni David na saiyang ama, asin sia mamamahala bilang hade sa kamag-anakan ni Jacob sagkod lamang, asin dai magkakaigwa nin katapusan an saiyang kahadean.” (Lucas 1:32, 33) Kaya an tipan ki David nagkaigwa nin kaotoban ki Jesu-Cristo. Kun siring, sia namamahala, bakong huli sa pagpili nin tawo, kundi paagi sa solemneng panuga nin Dios na nagtatao sa saiya kan deretso na mamahala sagkod lamang. Girumdomon niato na an mga panuga nin Dios pirmeng naootob.—Isaias 55:10, 11.

May duwang mahalagang leksion na manonodan sa 2 Samuel kapitulo 7. Enot, makakapagtiwala kita na mayo nin ano man o siisay man na makakapugol ki Jesu-Cristo sa pamamahala. Huli kaini, makakasegurado kita na ootobon nia an ihinayag na katuyohan kan saiyang pamamahala, an boot sabihon, tanganing lubos na gibohon an kabotan nin Dios sa daga kun paano sa langit.—Mateo 6:9, 10.

Ikaduwa, an pagkasaysay na ini nagtotokdo sa sato nin nakakaogmang leksion manongod ki Jehova. Tandaan na naheling asin pinahalagahan ni Jehova an intension kan puso ni David. Nakakapakosog sa boot na maaraman na inaapresyar ni Jehova an satong debosyon sa pagsamba sa saiya. Sa nagkapirang kamugtakan, an mga bagay na dai niato kontrolado, siring kan nagluluyang salud o paggurang, tibaad makaolang sa sato sa pag-otob kan gabos na minamawot kan satong puso na gibohon sa paglilingkod sa Dios. Kun siring kaiyan, logod na maranga kita kan katotoohan na naheheling ni Jehova dawa an mga intension nin pusong pano nin debosyon sa pagsamba sa saiya.

[Nota sa Ibaba]