“Maringis an Paggawi Ko”

Nagdakula ako sa bakong mayaman na komunidad sa duongan na siyudad nin Turku. Kampeon sa boksing an ama ko, asin aktibo man kami sa boksing kan nguhod kong tugang na lalaki. Sa eskuwelahan, pirmi akong inaangat na makipagsuntukan; dai ko lamang iyan inaatrasan. Kan tin-edyer na ako, naglaog ako sa sarong maringis na gang, kaya naimbuwelto ako sa mas madadahas pang iriwal. Nagustuhan ko man an musikang heavy-metal asin nangarap na magin rock star.

Nagbakal ako nin drums, nagbilog nin banda, asin dai nahaloy nagin panginot na parakanta sa banda. Gusto kong nagwawala sa entablado. An banda mi agresibo asin iba an itsura, kaya luway-luway kaming nagin sikat. Nagpuon kaming magtugtog sa atubangan nin dakul na tawo, asin naggibo nin nagkapirang rekording, na an ultimo kaiyan nagustuhan nin dakul. Kan huring mga taon nin 1980, nagpa-Estados Unidos kami tanganing ipamidbid an banda mi. Pirang beses kaming nagtugtog sa New York saka Los Angeles, asin nagkaigwa kami nin kontak sa mga propesyonal sa industriya nin musika bago kami magbalik sa Finland.

Dawa ngani maugma ako sa banda, mawot kong magin mas makahulugan an buhay ko. Nadisganar ako sa grabeng kompetisyon sa industriya nin musika asin sa buhay ko na mayo nin direksiyon. Pagmati ko maraot akong tawo, asin takot akong masulo sa nagkakalayong impiyerno. Naghanap ako nin simbag sa gabos na klase nin libro sa relihiyon. Udok man akong namibi para sa tabang nin Diyos, dawa ngani pagmati ko nungka ko siyang mapapaugma.

Nagtrabaho ako sa post office sa lugar mi para masuportaran an sadiri ko. Sarong aldaw, naaraman kong Saksi ni Jehova an katrabaho ko. Pinauranan ko siya nin hapot. Napukaw an interes ko sa mga simbag niyang lohikal asin basado sa Bibliya, kaya nag-uyon akong tukduan niya ako sa Bibliya. Kan mga pirang semana na kaming nag-aadal, inalok an banda mi nin magayon na kontrata sa rekording, asin posibleng magkaigwa kami nin album sa Estados Unidos. Naisip kong saro ining pambihirang pagkakataon.

Sinabi ko sa Saksi na nagtutukdo sa sako na gusto ko talagang makagibo nin saro pang album dangan, seryoso ko nang iaaplikar an mga prinsipyo sa Bibliya. Dai niya sinabi an opinyon niya; ipinabasa niya sana sako an mga tataramon ni Jesus sa Mateo 6:24. Sabi diyan: ‘Dai nin siisay man na makakapaglingkod sa duwang kagurangnan.’ Nabigla ako kan marealisar ko an kahulugan kan mga tataramon ni Jesus. Pero paglihis nin pirang aldaw, an nagtutukdo naman sako sa Bibliya an nabigla! Sinabi ko sa saiya na huling gusto kong sunudon si Jesus, binayaan ko an banda!

An Bibliya garo salming na naghayag sa sako kan mga depekto ko. (Santiago 1:22-25) Narealisar ko na maringis an paggawi ko: Orgulyoso ako asin grabe an ambisyon. Paramuda ako, parapakiiwal, parasigarilyo, asin parainom. Kan marealisar ko na kontrang marhay sa mga prinsipyo sa Bibliya an pamumuhay ko, nauyam ako sa sadiri ko. Pero, andam akong gumibo nin mga pagbabago.—Efeso 4:22-24.

Kan inot, grabe an pagmundo asin pagbasol ko huli sa mga nagin kasalan ko. Pero dakulaon an nagin tabang kan Saksi na nagtukdo sa sako. Ipinahiling niya sa sako an sinasabi kan Bibliya sa Isaias 1:18: ‘Maski arog kapula sa dugo an saimong mga kasalan magigin maputi iyan siring sa niyebe.’ (An Marahay na Bareta Biblia) Nakumbinsir ako kaini asin kan iba pang mga bersikulo sa Bibliya na mahihirakon an satong Ama sa langit, asin gusto niyang tabangan an mga tunay na nagsusulsol sa mga pagkakasala ninda.

Kan mamidbid asin mamutan ko na si Jehova bilang sarong Persona, gusto ko nang idedikar sa saiya an sakong buhay. (Salmo 40:8) Nabawtismuhan ako kan 1992 sa internasyonal na kumbensiyon kan Mga Saksi ni Jehova sa St. Petersburg, Russia.

Dakul akong nagin marahay na amigo na nagsasamba ki Jehova. Kun minsan, nagtitiripon-tipon kami para magtugtog nin disenteng musika asin ikaugma an regalong ini nin Diyos. (Santiago 1:17) Espesyal na bendisyon sa sako an namumutan kong agom na si Kristina. Magkadamay kami sa gabos na bagay—sa kaugmahan asin kadipisilan, saka nasasabi ko sa saiya an kairairarumi kong sabuot.

Kun dai ako nagin Saksi ni Jehova, siguro gadan na ako ngunyan. Kaidto, pirmi akong nagkakaproblema nin grabe. Ngunyan, may tunay na katuyuhan asin direksiyon an buhay ko.