SIMBAG SA MGA HAPOT SA BIBLIYA
Paano makakanuod an mga aki na mamutan an Diyos?
Tabangan an saimong aki na mamidbid asin mamutan an Diyos paagi sa mga linalang
Makakanuod sana an saimong mga aki na mamutan an Diyos kun malinaw sa sainda na talagang may Diyos asin na namumutan niya sinda. Para mamutan ninda an Diyos, kaipuhan nindang mamidbid siya. (1 Juan 4:8) Halimbawa, kaipuhan nindang maaraman: Taano ta linalang nin Diyos an tawo? Taano ta tinutugutan nin Diyos an pagsakit? Ano an gigibuhon nin Diyos para sa katawuhan sa maabot na panahon?—Basahon an Filipos 1:9.
Para tabangan an saimong mga aki na mamutan an Diyos, dapat mahiling ninda na ika mismo namumuot sa Saiya. Pag nahiling ninda iyan, posibleng arugon ninda an saimong halimbawa.—Basahon an Deuteronomio 6:5-7; Talinhaga 22:6.
Paano mo maaabot an puso kan saimong mga aki?
An Tataramon nin Diyos mapuwersa. (Hebreo 4:12) Kaya tabangan an saimong mga aki na manudan an panginot na mga katukduan kaiyan. Para maabot an puso nin mga tawo, si Jesus naghapot, nagdangog, asin ipinaliwanag an Kasuratan. Para maabot an puso kan saimong mga aki, puwede mong arugon an paagi nin pagtutukdo ni Jesus.—Basahon an Lucas 24:15-19, 27, 32.
An mga salaysay sa Bibliya dapit sa pagtratar nin Diyos sa mga tawo makakatabang man sa mga aki na mamidbid asin mamutan an Diyos. Makukua sa www.jw.org an mga publikasyon na dinisenyo sa katuyuhan na ini.—Basahon an 2 Timoteo 3:16.