Kapitulo 29

Pag-awit kan Bagong Awit sa Kapangganahan

Bisyon 9—Kapahayagan 14:1-20

Tema: An 144,000 kaiba kan Kordero sa Bukid nin Sion; an mga kapahayagan nin mga anghel nadadangog sa bilog na daga; inani an mga anihon

Panahon nin kaotoban: 1914 sagkod sa dakulang kahorasaan

 1. Ano an nanodan na niato mapadapit sa Kapahayagan kapitulo 7, 12, asin 13, asin ano ngonyan an manonodan niato?

ABAA kanakakaginhawa na dumanan an sunod na bisyon ni Juan! Kabaliktaran sa mangiri, agid sa hayop na mga organisasyon kan dragon, naheheling niato ngonyan an maimbod na mga lingkod ni Jehova asin an saindang mga aktibidad sa aldaw kan Kagurangnan. (Kapahayagan 1:10) Sinabi na sato kan Kapahayagan 7:1, 3 na an apat na doros nin kalaglagan pinupugolan sagkod na matatakan gabos ining 144,000 na linahidan na oripon. Sinabi kan Kapahayagan 12:17 na ining ‘mga natatada sa banhi’ kan babae nagigin an espesyal na punteriya ni Satanas, an dragon, sa panahon na iyan. Asin buhay na buhay na ilinadawan kan Kapahayagan kapitulo 13 an politikal na mga organisasyon na inestablisar ni Satanas digdi sa daga tanganing magtao nin makuring pangigipit asin maringis na persekusyon sa maimbod na mga lingkod ni Jehova. Alagad ta dai kayang olangon kan pangenot na kaiwal na iyan an katuyohan nin Dios! Maaaraman niato ngonyan na sa ibong kan may maraot na intension na aktibidad ni Satanas, an gabos na 144,000 mapangganang natipon.

 2. Anong preliminaryong paheling kan maogmang katapusan an itinatao sato ni Juan sa Kapahayagan 14:1, asin siisay an Kordero?

² Si Juan, asin kaiba nia an grupong Juan ngonyan, tinawan nin preliminaryong paheling kan maogmang resultang iyan: “Asin uya! naheling ko an Kordero na nagtitindog sa Bukid nin Sion, asin kaiba nia an siento kuarenta y kuatro mil na sa saindang angog nakasurat an saiyang ngaran asin an ngaran kan saiyang Ama.” (Kapahayagan 14:1) Arog kan nasabotan na niato, an Korderong ini iyo man sana si Miguel na lininigan an kalangitan paagi sa pagpalayas sa Diablo asin sa saiyang mga demonyo. Sia an Miguel na sinasabi ni Daniel na ‘nagtitindog para sa mga aki kan banwaan’ nin Dios mantang sia nag-aandam na ‘tumindog’ sa pag-implementar kan matanos na mga paghokom ni Jehova. (Daniel 12:1; Kapahayagan 12:7, 9) Poon kan 1914 an mapagsakripisyong Kordero nin Dios na ini nagtitindog na sa Bukid nin Sion bilang an Mesiyanikong Hade.

 3. Ano an “Bukid nin Sion” na duman “nagtitindog” an Kordero asin an 144,000?

³ Siring nanggad iyan sa ihinula ni Jehova: “Ako, ako ngani, an nagpatukaw kan sakuyang hade sa Sion, an sakong banal na bukid.” (Salmo 2:6; 110:2) Ini dai na nanonongod sa daganon na Bukid nin Sion, an namumugtakan kan daganon na Jerusalem, an siudad na duman dating nagrereynar an mga tawong hade sa dinastiya ni David. (1 Cronica 11:4-7; 2 Cronica 5:2) Dai, ta si Jesus, pagkagadan asin pagkabuhay nia liwat kan 33 C.E., ibinugtak bilang pundasyon na gapong pangeskina sa langitnon na Bukid nin Sion, an langitnon na lugar na duman dineterminaran ni Jehova na ibugtak an “siudad kan Dios na buhay, an langitnon na Jerusalem.” Huli kaini, an “Bukid nin Sion” digdi nagrerepresentar sa mamuraway na kamugtakan ni Jesus asin kan saiyang kairibang paramana, na minakompuesto sa langitnon na Jerusalem, na iyo an Kahadean. (Hebreo 12:22, 28; Efeso 3:6) Iyan an mamuraway, sa hadeng situwasyon na duman sinda ilinalangkaw ni Jehova sa aldaw kan Kagurangnan. Sa nag-aging mga siglo, an linahidan na mga Kristiano, bilang “mga gapong buhay,” galagang naghalat na tumindog sa langitnon na Bukid nin Sion na iyan, na kasaro kan pinamuraway na Kagurangnan na Jesu-Cristo sa saiyang mamuraway na Kahadean.—1 Pedro 2:4-6; Lucas 22:28-30; Juan 14:2, 3.

 4. Paano nangyari na an gabos na 144,000 nagtitindog sa Bukid nin Sion?

⁴ An naheling ni Juan bako sanang si Jesus kundi an kompletong grupo kan 144,000 na kapwa mga paramana kan langitnon na Kahadean na nagtitindog sa Bukid nin Sion. Sa panahon na irinerepresentar kan bisyon, an dakol, pero bakong gabos, sa 144,000 yaon na sa langit. Sa huring kabtang kan iyo man sanang bisyon, naaraman ni Juan na an iba sa mga banal kaipuhan pang magtagal asin magadan na maimbod. (Kapahayagan 14:12, 13) Kun siring, malinaw na an iba sa 144,000 yaon pa sa daga. Kaya paano nangyari na sinda gabos naheling ni Juan na nagtitindog sa Bukid nin Sion kaiba ni Jesus?a Huli ta, bilang mga miembro kan kongregasyon nin linahidan na mga Kristiano, sinda ngonyan “nagdolok sa sarong Bukid nin Sion asin sa siudad kan Dios na buhay, an langitnon na Jerusalem.” (Hebreo 12:22) Kapareho ni Pablo kan sia yaon pa sa daga, sinda ibinangon na—sa espirituwal na sentido—tanganing makasaro ni Cristo Jesus sa langitnon na mga lugar. (Efeso 2:5, 6) Saro pa, kan 1919 nagkuyog sinda sa pangagda na, “Sakat kamo digdi,” asin sa piguratibong paagi “sinda nagsakat sa langit sa panganoron.” (Kapahayagan 11:12) Huli kan mga tekstong ini, maheheling niato na—sa espirituwal na pagtaram—an gabos na 144,000 yaon sa Bukid nin Sion kaiba ni Jesu-Cristo.

 5. Kiisay na mga ngaran an nasusurat sa angog kan 144,000, asin ano an kahulogan kan lambang ngaran?

⁵ An 144,000 mayo nin pakikikabtang sa mga parasamba sa mabangis na hayop, na markado kan simbolikong numero na 666. (Kapahayagan 13:15-18) Sa kabaliktaran, an mga maimbod na ini nasusuratan kan ngaran nin Dios asin kan Kordero sa saindang angog. Daing duwa-duwa na naheling ni Juan, na sarong Judio, an ngaran nin Dios sa mga letrang Hebreo, יהוה.b Sa simbolikong pagkasurat sa saindang angog kan ngaran kan Ama ni Jesus, ipinapamidbid kan mga natatakan na ini sa gabos na sinda mga saksi ni Jehova, mga oripon Nia. (Kapahayagan 3:12) An pagkaigwa man kan ngaran ni Jesus sa saindang angog nagpaparisa na rinerekonoser ninda na sinda rogaring nia. Sia an katipan na “agom” ninda, asin sinda an magigin “nobya” nia, an “bagong linalang” na naglilingkod sa Dios na may paglaom sa langitnon na buhay. (Efeso 5:22-24; Kapahayagan 21:2, 9; 2 Corinto 5:17) An saindang haraning marhay na relasyon ki Jehova asin ki Jesu-Cristo nakakaapektar sa gabos nindang kaisipan asin hiro-hiro.

Nag-aawit nin Garo Baga Bagong Awit

 6. Anong pag-awit an nadadangog ni Juan, asin paano nia iyan ilinaladawan?

⁶ Kaoyon digdi, si Juan nagbabareta: “Asin nadangog ko an sarong tanog hale sa langit na siring sa burak-busak nin dakol na katubigan asin siring sa urog-udog nin makosog na dagulgol; asin an tanog na nadangog ko siring kan sa mga paraawit na inaakompanyaran an saindang sadiri sa arpa na nagtutugtog kan saindang arpa. Asin sinda nag-aarawit nin garo baga bagong awit sa atubangan kan trono asin sa atubangan kan apat na buhay na linalang asin kan kamagurangan; asin mayo nin siisay man na biyong nakanood kan awit na iyan kundi an siento kuarenta y kuatro mil, na binakal hale sa daga.” (Kapahayagan 14:2, 3) Bakong makangangalas na, kan madangog an 144,000 na tingog na durungan sa sarong magayon pagdangogon na koro, an nagsabong sa isip ni Juan nagraragubrob na busay asin sunod-sunod na daguldol. Magayonon nanggad na pagdangogon an lataw na akompanimento na agid sa arpa! (Salmo 81:2) Arin na koro sa daga an makakapantay sa kahangahangang korong iyan?

 7. (a) Ano an bagong awit sa Kapahayagan 14:3? (b) Paano na an awit kan Salmo 149:1 bago sa satong aldaw?

⁷ Asin ano ining “bagong awit”? Arog kan nasabi na sa pagtokar kan Kapahayagan 5:9, 10, an awit may koneksion sa mga katuyohan ni Jehova mapadapit sa Kahadean asin sa saiyang makangangalas na probisyon, paagi ki Jesu-Cristo, sa paggibo sa espirituwal na Israel na “sarong kahadean asin mga saserdote para sa satong Dios.” Iyan awit nin pag-omaw ki Jehova na nagbabalangibog kan bagong mga bagay na saiyang ginigibo paagi sa asin para sa Israel nin Dios. (Galacia 6:16) An mga miembro kan espirituwal na Israel na ini naghihimate sa pangagda kan salmista: “Omawa nindo si Jah! Mag-awit kamo ki Jehova nin bagong awit, nin pag-omaw sa saiya sa kongregasyon nin mga maimbod. Logod na maggayagaya an Israel sa saiyang Kaharohalangkaweng Kaggibo, an mga aki nin Sion—logod na maggayagaya sinda sa saindang Hade.” (Salmo 149:1, 2) Totoo, an mga tataramon na iyan isinurat dakol nang siglo an nakaagi, alagad sa satong aldaw, iyan inawit na may bagong pakasabot. Kan 1914 namundag an Mesiyanikong Kahadean. (Kapahayagan 12:10) Kan 1919 an banwaan ni Jehova digdi sa daga nagpoon na ipaisi an “tataramon kan kahadean” na may bagong kaigotan. (Mateo 13:19) Mantang napahiro kan teksto kan taon 1919 (Isaias 54:17) asin naparigon an boot kan saindang pakabalik sa espirituwal na paraiso, pinonan nindang ‘umawit ki Jehova na may musika sa saindang puso’ kan taon na idto.—Efeso 5:19.

 8. Taano ta an 144,000 sana an nakakanood kan bagong awit sa Kapahayagan 14:3?

⁸ Pero taano ta an 144,000 sana an nakanood kan awit na sinasabi sa Kapahayagan 14:3? Huli ta iyan may koneksion sa saindang mga eksperyensia bilang piniling mga paramana kan Kahadean nin Dios. Sinda sana an inampon bilang mga aki nin Dios asin linahidan kan banal na espiritu. Sinda sana an binakal sa daga tanganing magin kabtang kan langitnon na Kahadean na iyan, asin sinda sana an “magigin mga saserdote . . . patin mamamahala bilang mga hade” kaiba ni Jesu-Cristo sa laog nin sangribong taon tanganing darahon sa pagkasangkap an katawohan. Sinda sana an naheling na “nag-aarawit nin garo baga bagong awit” sa mismong atubangan ni Jehova.c An daing kaagid na mga eksperyensia asin paglaom na ini nagtatao sainda nin pambihirang pag-apresyar sa Kahadean asin nagigin dahelan na sinda nakakaawit manongod dian sa paagi na dai kaya nin siisay pa man.—Kapahayagan 20:6; Colosas 1:13; 1 Tesalonica 2:11, 12.

 9. Paano naghimate an dakulang kadaklan sa pag-awit kan mga linahidan, asin, sa siring, anong sadol an inotob ninda?

⁹ Minsan siring, may ibang naghihinanyog asin naghihimate sa saindang pag-awit. Poon kan 1935 an nagdadakol na dakulang kadaklan nin ibang mga karnero nakadangog sa saindang mapangganang awit asin napahirong umiba sa sainda sa pagbalangibog kan Kahadean nin Dios. (Juan 10:16; Kapahayagan 7:9) Totoo, an mga bagohan na ini dai makakanood na umawit kan eksaktong bagong awit na inaawit kan mga mamamahala sa Kahadean nin Dios. Alagad nag-aawit man sinda nin magayon pagdangogon na koro nin pag-omaw ki Jehova huli sa bagong mga bagay na saiyang ginigibo. Sa siring, inootob ninda an sadol kan salmista: “Awit kamo nin bagong awit ki Jehova. Awit kamo ki Jehova, kamo gabos na yaon sa daga. Awit kamo ki Jehova, omawa nindo an saiyang ngaran. Sa aroaldaw ibalangibog nindo an maogmang bareta kan saiyang pagliligtas. Ipahayag nindo sa mga nasyon an saiyang kamurawayan, sa gabos na banwaan an saiyang makangangalas na mga gibo. Iatribwir nindo ki Jehova, O kamong mga pamilya kan mga banwaan, iatribwir nindo ki Jehova an kamurawayan asin kakosogan. Sabihon nindo sa tahaw kan mga nasyon: ‘Si Jehova mismo nagin hade.’”—Salmo 96:1-3, 7, 10; 98:1-9.

10. Paano nagigin posible para sa 144,000 na mag-awit “sa atubangan” kan simbolikong 24 kamagurangan?

¹⁰ Paano an 144,000 makakaawit “sa atubangan” kan kamagurangan, mantang an 24 kamagurangan iyo an 144,000 sa saindang mamuraway na kamugtakan sa langit? Sa pagpopoon kan aldaw kan Kagurangnan, an “mga nagadan na kasaro ni Cristo” binuhay liwat bilang espiritung mga linalang. Sa siring, an nakadaog, maimbod na linahidan na mga Kristiano yaon na ngonyan sa langit, na simbolikong nag-ootob kan mga trabaho na kaagid kan sa 24 dibisyon nin kamagurangan na saserdote. Kaiba sinda sa bisyon kan langitnon na organisasyon ni Jehova. (1 Tesalonica 4:15, 16; 1 Cronica 24:1-18; Kapahayagan 4:4; 6:11) Kun siring, an natatada sa 144,000 na yaon pa digdi sa daga nag-aawit kan bagong awit sa atubangan kan saindang binuhay liwat na mga tugang sa langit.

11. Taano ta an apod sa linahidan na mga nakadaog 24 kamagurangan saka 144,000?

¹¹ Sa puntong ini puede man niatong ihapot: Taano ta an apod sa linahidan na mga nakadaog na ini simbolikong 24 kamagurangan saka 144,000? Huli ta pinagheheling kan Kapahayagan an sarong grupong ini sa duwang magkalaen na punto de vista. An 24 kamagurangan pirmeng ipinapaheling na yaon sa saindang pangultimong kamugtakan sa palibot kan trono ni Jehova, na natutukaw bilang mga hade asin saserdote sa kalangitan. Isinisimbolisar ninda an bilog na grupo kan 144,000 sa saindang kamugtakan sa langit, minsan ngani sa presente yaon pa sa daga an kadikit na natatada sa sainda. (Kapahayagan 4:4, 10; 5:5-14; 7:11-13; 11:16-18) Minsan siring, an Kapahayagan kapitulo 7 nagkokonsentrar sa 144,000 bilang kinua sa katawohan, asin idinodoon kaiyan an marahayon na katuyohan ni Jehova na tatakan an kompletong kabilangan nin indibiduwal na espirituwal na mga Israelita asin tawan nin kaligtasan an daing kabilangan na dakulang kadaklan. An Kapahayagan kapitulo 14 nagtatao nin ladawan na nagpapatunay na an kompletong pang-Kahadean na grupo nin 144,000 na indibiduwal na mga nakadaog magkakatiripon sa Bukid nin Sion kaiba kan Kordero. Sinasabi man an mga kualipikasyon na dapat na maabot tanganing makabilang sa 144,000, arog kan maheheling niato ngonyan.d

Mga Parasunod kan Kordero

12. (a) Paano ipinagpapadagos ni Juan an paglaladawan nia sa 144,000? (b) Sa anong sentido na an 144,000 inaapod na mga birhen?

¹² Sa pagpapadagos kan saiyang paglaladawan sa 144,000 na “binakal hale sa daga,” sinasabi sato ni Juan: “An mga ini iyo an dai nagpadigta sa mga babae; sa katunayan, sinda mga birhen. An mga ini iyo an padagos na nagsusunod sa Kordero saen man sia magduman. An mga ini binakal hale sa katawohan bilang enot na mga bunga sa Dios asin sa Kordero, asin mayong kaputikan na nakua sa saindang ngoso; mayo sinda nin kanawayan.” (Kapahayagan 14:4, 5) An bagay na an 144,000 “mga birhen” dai nangangahulogan na an mga kabilang sa grupong ini talagang daing agom sa laman. Si apostol Pablo nagsurat sa mga Kristiano na may langitnon na pag-apod na, mantang may mga bentaha an pagigin Kristianong daing agom, an pag-agom mas marahay sa nagkapirang kamugtakan. (1 Corinto 7:1, 2, 36, 37) An nagpapamidbid sa grupong ini iyo an espirituwal na pagkabirhen. Linikayan ninda an espirituwal na pakikisambay sa kinabanon na politika asin sa falsong relihion. (Santiago 4:4; Kapahayagan 17:5) Bilang an katipan na nobya ni Cristo, pinapagdanay nindang dalisay an saindang sadiri, “daing kanawayan sa tahaw nin biko asin biribid na kapag-arakian.”—Filipos 2:15.

13. Taano an 144,000 ta angay na nobya para ki Jesu-Cristo, asin paano sinda “padagos na nagsusunod sa Kordero saen man sia magduman”?

¹³ Dugang pa, “mayong kaputikan na nakua sa saindang ngoso.” Digdi, kapareho sinda kan saindang Hade, si Jesu-Cristo. Bilang sangkap na tawo, “dai sia nakaginibo nin kasalan, ni nakua man sa saiyang ngoso an kadayaan.” (1 Pedro 2:21, 22) Sa pagigin dungan na daing kanawayan asin sadiosan, an 144,000 inandam bilang mabining nobya para sa dakulang Halangkaw na Saserdote ni Jehova. Kan si Jesus yaon digdi sa daga, inagda nia an mga tama an kamugtakan nin puso na sumunod sa saiya. (Marcos 8:34; 10:21; Juan 1:43) An mga naghimate nag-arog sa saiyang pamumuhay asin nagkuyog sa saiyang mga katokdoan. Sa siring, sa saindang buhay digdi sa daga, sinda “padagos na nagsusunod sa Kordero saen man sia magduman” mantang ginigiyahan nia sinda sa paglakaw sa kinaban ni Satanas.

14. (a) Paano na an 144,000 “enot na mga bunga sa Dios asin sa Kordero”? (b) Sa anong sentido na enot na mga bunga man an dakulang kadaklan?

¹⁴ An 144,000 “binakal hale sa daga,” “binakal hale sa katawohan.” Sinda inampon bilang mga aki nin Dios, asin pagkabuhay ninda liwat, bako na sindang mga tawo na may laman asin dugo. Arog kan sinasabi sa bersikulo 4, sinda nagigin “enot na mga bunga sa Dios asin sa Kordero.” Totoo, kaidtong enot na siglo, si Jesus iyo “an enot na bunga kan mga natorog sa kagadanan.” (1 Corinto 15:20, 23) Alagad an 144,000 iyo an “sarong klase nin enot na mga bunga” kan bakong sangkap na katawohan, na binakal paagi sa atang ni Jesus. (Santiago 1:18) Minsan siring, an pagsaray kan bunga kan katawohan dai natatapos sa sainda. An libro nin Kapahayagan may sinabi nang pagtipon sa daing kabilangan na dakulang kadaklan na nagkukurahaw sa makosog na tingog: “Utang niamo an kaligtasan sa satong Dios, na nakatukaw sa trono, asin sa Kordero.” An dakulang kadaklan na ini makakaligtas sa dakulang kahorasaan, asin mantang padagos sindang narerepreskohan sa “mga burabod kan tubig nin buhay,” sinda dadarahon sa pagkasangkap nin tawo digdi sa daga. Sa dai sinabing panahon pagkatapos kan dakulang kahorasaan, an Hades hahalean nin laog, asin an daing kabilangan na minilyon na ibang tawo bubuhayon liwat asin magkakaigwa kan oportunidad na uminom man sa tubig nin buhay na iyan. Nasa isip ini, tamang apodon an dakulang kadaklan na enot na mga bunga kan ibang mga karnero—sinda an enot na ‘naglaba kan saindang haralabang gubing asin pinaputi iyan sa dugo kan Kordero’ na may paglaom na mabuhay sagkod lamang digdi sa daga.—Kapahayagan 7:9, 10, 14, 17; 20:12, 13.

15. Ano an mga pagkakapareho kan tolong laen-laen na enot na mga bunga asin kan mga kapiestahan na sineselebrar kaidto sa irarom kan Ley ni Moises?

¹⁵ An tolong enot na mga bungang ini (si Jesu-Cristo, an 144,000, asin an dakulang kadaklan) may interesanteng mga pagkakapareho sa mga kapiestahan na sineselebrar kaidto segun sa suanoy na Ley ni Moises. Sa Nisan 16, sa Kapiestahan kan Tinapay na Mayo nin Lebadura, an sarong goygoy kan enot na mga bunga kan inaning sebada idinodolot ki Jehova. (Levitico 23:6-14) Nisan 16 an aldaw na si Jesus binuhay liwat hale sa mga gadan. Sa ika-50 aldaw poon Nisan 16, sa ikatolong bulan, sineselebrar kan mga Israelita an kapiestahan nin pag-ani kan enot na hinog na mga bunga kan trigo. (Exodo 23:16; Levitico 23:15, 16) An kapiestahan na ini inapod na Pentecostes (hale sa sarong termino sa Griego na nangangahulogan “ikasingkuenta”), asin kan Pentecostes 33 C.E. na an enot na mga miembro kan 144,000 linahidan nin banal na espiritu. Ultimo, sa ikapitong bulan na nasaray na an gabos na inani, nagkakaigwa kan Kapiestahan nin mga Payag-Payag, na panahon nin magayagayang pagpasalamat asin sa laog nin sarong semana an mga Israelita nag-eerok sa mga payag-payag na gibo sa mga sanga nin palma, kaiba nin iba pang bagay. (Levitico 23:33-43) Kapareho kaiyan, an dakulang kadaklan, na kabtang kan dakulang pagsaray, nagpapasalamat sa atubangan kan trono na “igwa nin mga sanga nin palma sa saindang mga kamot.”—Kapahayagan 7:9.

Pagpapahayag kan Daing Katapusan na Maogmang Bareta

16, 17. (a) Saen naheling ni Juan na naglalayog an sarong anghel, asin ano an ipinapahayag kan anghel? (b) Sairisay an kalabot sa paghuhulit kan Kahadean, asin anong mga eksperyensia an nagpaparisa kaini?

¹⁶ Ini an sunod na isinurat ni Juan: “Asin nakaheling ako nin saro pang anghel na naglalayog sa kaitaasan, asin igwa sia nin daing katapusan na maogmang bareta na ipapahayag bilang nakakaogmang notisya sa mga nag-eerok sa daga, asin sa lambang nasyon asin tribo asin lenguahe patin banwaan, na nagsasabi sa makosog na tingog: ‘Matakot kamo sa Dios asin pamurawayon nindo sia, huli ta nag-abot na an oras kan saiyang paghokom, kaya sambahon nindo an Saro na naggibo kan langit asin daga asin dagat patin mga burabod nin tubig.’” (Kapahayagan 14:6, 7) An anghel naglalayog sa “kaitaasan,” na duman naglalayog an mga gamgam. (Ikomparar an Kapahayagan 19:17.) Huli kaini, dangog sa bilog na daga an saiyang tingog. An lakop sa kinaban na proklamasyon kan anghel na ini mas mahiwas an nalalakopan kisa arin man na bareta sa telebisyon!

¹⁷ An gabos sinasadol na matakot, bakong sa mabangis na hayop asin sa imahen kaiyan, kundi ki Jehova, na mas makapangyarihan nanggad kisa arin man na simbolikong hayop na kontrolado ni Satanas. Tara, si Jehova an naglalang sa langit asin daga, asin ngonyan nag-abot na an panahon kan paghokom nia sa daga! (Ikomparar an Genesis 1:1; Kapahayagan 11:18.) Kan nasa daga, si Jesus nagpropesiya may labot sa satong aldaw: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) An sugong ini inootob kan kongregasyon nin linahidan na mga Kristiano. (1 Corinto 9:16; Efeso 6:15) Ihinahayag digdi kan Kapahayagan na an dai naheheling na mga anghel kalabot man sa paghuhulit na ini. Abaa kaparate na risang-risa na mga anghel an naggiya sa saro sa mga Saksi ni Jehova pasiring sa harong na duman an sarong napupurisaw na kalag naghihimuyawot, namimibi pa ngani, na mag-ako nin espirituwal na tabang!

18. Segun sa anghel na naglalayog sa kaitaasan, nag-abot na an oras para sa ano, asin sairisay pa an matao nin dagdag na mga paisi?

¹⁸ Arog kan sabi kan anghel na naglalayog sa kaitaasan, nag-abot na an oras nin paghokom. Ano ngonyan an itataong paghokom nin Dios? Makukubhanan an gabos sa mga ipapaisi ngonyan nin ikaduwa, ikatolo, ikaapat, asin ikalimang anghel.—Jeremias 19:3.

[Mga Nota sa Ibaba]

[Mga ritrato sa pahina 202, 203]

144,000

24 kamagurangan

Kairibang paramana kan Kordero, si Cristo Jesus, na pinagheheling sa duwang magkalaen na punto de vista