Kapitulo 10

Namamahala Na an Kahadean nin Dios

 1, 2. Paano napatunayan na kulang sa kakayahan an mga gobyerno nin tawo?

POSIBLENG naeksperyensiahan na nindong bumakal nin sarong kasangkapan, tangani sanang manompongan na dai iyan nagpupunsionar. Sabihon niato na nag-apod kamo nin parahirahay. Minsan siring, dai nahaloy pakatapos na “mahirahay” nia an kasangkapan, iyan naraot. Abaa kanakadidisganar iyan!

² Kapareho iyan kan mga gobyerno nin tawo. An katawohan kaidto pa nagmawot na nin gobyerno na magarantiya nin katoninongan asin kaogmahan. Pero, an maigot na mga paghihingoa na hirahayon an pagkaraot kan sosyedad dai nagin tunay na mapanggana. Dakolon na tratado sa katoninongan an ginibo​—dangan binalga. Saro pa, anong gobyerno an nakahimong haleon an kadukhaan, pagpalaenlaen, krimen, helang, asin paglaglag sa ekolohiya? An pamamahala nin tawo dai na puedeng hirahayon. Maski an madonong na si Hadeng Salomon kan Israel naghapot: “Kun manongod sa daganon na tawo, paano nia mamamansayan an saiyang dalan?”​—Talinhaga 20:24.

 3. (a) Ano an tema kan paghuhulit ni Jesus? (b) Paano ilinaladawan nin ibang tawo an Kahadean nin Dios?

³ Dai madesesperar! An sarong marigon na pankinaban na gobyerno bako sanang pangatorogan. Iyan an tema kan paghuhulit ni Jesus. Inaapod nia iyan na “kahadean nin Dios,” asin tinokdoan nia an saiyang mga parasunod na ipamibi iyan. (Lucas 11:2; 21:31) Siempre, an Kahadean nin Dios kun beses nasasambitan sa relihiosong mga grupo. Sa katunayan, aroaldaw na ipinamimibi iyan nin minilyon kun inoorootro ninda an Pamibi kan Kagurangnan (na inaapod man na Ama Niamo o modelong pamibi). Alagad manlaenlaen an simbag nin mga tawo kun hinahapot na, “Ano an Kahadean nin Dios?” An iba nagsasabi, “Nasa saindong puso iyan.” An iba inaapod iyan na langit. An Biblia nagtatao nin malinaw na simbag, siring kan satong maheheling.

SARONG KAHADEAN NA MAY KATUYOHAN

4, 5. Taano ta pinagmarahay ni Jehova na magpangyari nin sarong bagong kapahayagan kan saiyang soberaniya, asin ano an gigibohon kaiyan?

⁴ Si Jehova Dios poon kaidto perming Hade, o Soberanong Poon, kan uniberso. An katunayan na sia an naglalang kan gabos na bagay iiniitaas sia sa halangkaw na kamugtakan na iyan. (1 Cronica 29:11; Salmo 103:19; Gibo 4:24) Alagad an Kahadean na ihinulit ni Jesus segunda, o sekondaryo, sa unibersal na soberaniya nin Dios. An Mesiyanikong Kahadean na iyan igwa nin espisipikong katuyohan, alagad ano daw iyan?

⁵ Siring sa ipinaliwanag sa Kapitulo 6, an enot na tawong mag-agom nagrebelde tumang sa autoridad nin Dios. Huli sa pinalataw na mga isyu, pinagmarahay ni Jehova na magpangyari nin sarong bagong kapahayagan kan saiyang soberaniya. Ipinaisi nin Dios an saiyang katuyohan na magpaluwas nin sarong “banhi” na maronot sa Halas, si Satanas, asin mahale kan mga epekto kan minanang kasalan nin katawohan. An pangenot na “banhi” iyo si Jesu-Cristo, asin “an kahadean nin Dios” iyo an instrumento na biyong madaog ki Satanas. Paagi sa Kahadean na ini, ibabalik ni Jesu-Cristo an kapamahalaan sa ibabaw nin daga sa ngaran ni Jehova asin ibibindikar an may katanosan na soberaniya nin Dios sa gabos na panahon.​—Genesis 3:15; Salmo 2:​2-9.

6, 7. (a) Yaon saen an Kahadean, asin siisay an Hade asin an saiyang kairibang hade? (b) Sairisay an mga sakop kan Kahadean?

⁶ Sono sa sarong traduksion kan mga tataramon ni Jesus sa maraot na mga Fariseo, sia nagsabi: “An kahadean nin Dios nasa laog nindo.” (Lucas 17:​21, King James Version) Boot daw sabihon ni Jesus na an Kahadean nasa maraot na mga puso kan maraot na mga tawong idto? Dai. An mas eksaktong traduksion kan orihinal na Griego nagsasabi: “An kahadean nin Dios nasa tanga nindo.” (New World Translation) Si Jesus, na nasa tanga ninda, sa siring nagsabi na sia an maabot na Hade. Imbes na sarong bagay na nasa puso nin saro, an Kahadean nin Dios sarong tunay, nagpupunsionar na gobyerno na igwa nin hade asin mga sakop. Iyan langitnon na gobyerno, huli ta iyan pareho inaapod na “kahadean nin mga langit” asin “kahadean nin Dios.” (Mateo 13:11; Lucas 8:10) Sa bisyon, naheling ni propeta Daniel an Hade kaiyan na “saro na kaagid sa aki nin tawo” na dinara sa atubangan kan Dios na Makakamhan sa gabos asin tinawan nin daing katapusan na “paghade asin kamahalan patin kahadean, tanganing an mga banwaan, mga nasyon asin mga tataramon gabos maglingkod sa saiya.” (Daniel 7:​13, 14) Siisay an Hadeng ini? Bueno, si Jesu-Cristo inaapod kan Biblia na “Aki nin tawo.” (Mateo 12:40; Lucas 17:26) Iyo, dinesignaran ni Jehova an saiyang Aki, si Jesu-Cristo, na magin Hade.

⁷ Si Jesus dai nagsosolo sa paghade. Kaiba nia an 144,000 na “binakal hale sa daga” tanganing magin kairiba niang hade asin saserdote. (Kapahayagan 5:​9, 10; 14:​1, 3; Lucas 22:​28-30) An mga sakop kan Kahadean nin Dios magigin sarong panglobong pamilya nin mga tawo na nagpapasakop sa pangengenot ni Cristo. (Salmo 72:​7, 8) Pero, paano kita makaseseguro na talagang ibibindikar kan Kahadean an soberaniya nin Dios asin ibabalik an paraisong mga kamugtakan sa satong daga?

AN KATUNAYAN KAN KAHADEAN NIN DIOS

8, 9. (a) Paano niato ikaiilustrar an pagkamasasarigan kan mga panuga dapit sa Kahadean nin Dios? (b) Taano ta makaseseguro kita sa katunayan kan Kahadean?

⁸ Imahinara na nasolo an saindong harong. Ngonyan sarong katood na may kaya an nanunuga na matabang na itogdok giraray an saindong harong asin matao nin kakanon para sa saindong pamilya. Kun an katood na iyan permi nang nagsasabi sa saindo nin totoo, dai daw kamo matubod sa saiya? Ipamugtak na kan sunod na aldaw uminabot kamo sa harong hale sa trabaho asin nanompongan nindo na may mga trabahador na nagpopoon nang linigon an mga nagkararaot sa pagkasolo asin igwang dinarang kakanon para sa saindong pamilya. Daing duwa-duwa na kamo magigin lubos na kompiado na pag-abot nin panahon, an mga bagay bako sanang ikababalik kundi magigin pa nganing orog karahay kisa kan dati.

⁹ Kaagid kaiyan, si Jehova nagtatao sato nin pag-asegurar dapit sa katunayan kan Kahadean. Siring kan ipinaheheling sa libro kan Biblia na Hebreo, an dakol na kabtang kan Pagboot nanganino sa areglo kan Kahadean. (Hebreo 10:1) An mga patanaw sa Kahadean nin Dios malinaw man na naheling sa daganon na kahadean nin Israel. Bako idtong ordinaryong gobyerno, huli ta an mga hade nagtukaw sa “trono ni Jehova.” (1 Cronica 29:23) Saro pa, may ihinula: “An setro dai mahale ki Juda, ni an sogkod nin pagkapoon hale sa tahaw kan saiyang mga bitis, sagkod na dumatong si Silo; asin mapapasaiya an pagkuyog kan mga banwaan.” (Genesis 49:10)a Iyo, sa linaheng ini nin mga hade kan Juda na si Jesus, an permanenteng Hade sa gobyerno nin Dios, mamumundag.​—Lucas 1:​32, 33.

10. (a) Kasuarin inestablisar an pundasyon kan Mesiyanikong Kahadean nin Dios? (b) Anong mahalagang gibohon an pangengenotan sa daga kan magigin kairibang hade ni Jesus?

¹⁰ An pundasyon kan Mesiyanikong Kahadean nin Dios inestablisar paagi sa pagpili kan mga apostol ni Jesus. (Efeso 2:​19, 20; Kapahayagan 21:14) An mga ini an enot sa 144,000 na mamamahala sa langit bilang kairibang hade ni Jesu-Cristo. Mantang uya pa sa daga, pangengenotan kan magigin kairibang hadeng ini an kampanya nin pagpapatotoo, kaoyon sa pagboot ni Jesus: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu.”​—Mateo 28:19.

11. Paano ginigibo an paghuhulit kan Kahadean ngonyan, asin ano an nagigibo kaiyan?

¹¹ An pagboot na gumibo nin mga disipulo kinukuyog na ngonyan sa dai pang kaagid na sokol. An Mga Saksi ni Jehova nagbabalangibog kan maogmang bareta kan Kahadean sa bilog na globo, kaoyon sa makahulang mga tataramon ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Bilang sarong kabtang kan paghuhulit kan Kahadean, ginigibo an sarong dakulang programa nin pagtotokdo. An mga nagpapasakop sa mga ley asin prinsipyo kan Kahadean nin Dios nakakaeksperyensia na nin katoninongan asin pagkasararo na dai kayang gibohon kan mga gobyerno nin tawo. Ini gabos nagtatao nin malinaw na ebidensia na tunay an Kahadean nin Dios!

12. (a) Taano ta angay na apodon na Mga Saksi ni Jehova an mga parabalangibog kan Kahadean? (b) Paano an Kahadean nin Dios napapalaen sa mga gobyerno nin tawo?

¹² Sinabihan ni Jehova an mga Israelita: “Kamo an sakong mga saksi, . . . an sakong lingkod na sakong pinili.” (Isaias 43:​10-12) Si Jesus, “an Maimbod na Saksi,” maigot na nagpahayag kan maogmang bareta kan Kahadean. (Kapahayagan 1:5; Mateo 4:17) Kaya angay na an mga parabalangibog kan Kahadean sa presenteng aldaw apodon sa nombrado nin Dios na ngaran na Mga Saksi ni Jehova. Alagad taano an mga Saksi ta inuubos an dakolon na panahon asin paghihingoa sa pakikipag-olay sa iba manongod sa Kahadean nin Dios? Ginigibo ninda ini huli ta an Kahadean an solamenteng paglaom kan katawohan. An mga gobyerno nin tawo natatapos pag-abot nin panahon, alagad an Kahadean nin Dios dai noarin man matatapos. An Isaias 9:​6, 7 inaapod an Hade kaiyan, si Jesus, na “Prinsipe nin Katoninongan” asin idinadagdag: “An kadakolan kan sa-prinsipeng pamamahala asin katoninongan magigin daing kasagkodan.” An Kahadean nin Dios bakong arog sa mga gobyerno nin tawo​—yaon ngonyan asin bagsak na sa aga. Tunay nanggad, an Daniel 2:44 nagsasabi: “An Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa ibang banwaan. . . . Iyan magdadanay sagkod sa mga panahon na daing katapusan.”

13. (a) Ano an nagkapirang problema na mapangganang aasikasohon kan Kahadean nin Dios? (b) Taano ta makaseseguro kita na maootob an mga panuga nin Dios?

¹³ Siisay na tawong hade an makapapangyari kan paghale sa guerra, krimen, helang, gutom, asin kawaran nin harong? Dugang pa, siisay na daganon na poon an makabubuhay sa mga nagadan? An mga bagay na ini aasikasohon kan Kahadean nin Dios asin kan Hade kaiyan. An Kahadean dai magigin raot, arog sa nagraraotraot na kasangkapan na perming nagkakaipong hirahayon. Imbes, an Kahadean nin Dios magigin mapanggana, huli ta nanunuga si Jehova: “An sakong tataramon na magluwas sa sakong ngoso . . . dai . . . mabalik sako na daing laog, kundi siertong gigibohon kaiyan an sakong boot, asin iyan siertong magigin mapanggana sa sakuyang sinobolan kaiyan.” (Isaias 55:11) An katuyohan nin Dios dai masusudya, alagad noarin mapoon an pamamahala kan Kahadean?

AN PAMAMAHALA KAN KAHADEAN​—NOARIN?

14. Ano an salang pakasabot kan mga disipulo ni Jesus mapadapit sa Kahadean, alagad ano an aram ni Jesus manongod sa saiyang paghade?

¹⁴ “Kagurangnan, ibabalik mo ngonyan an kahadean sa Israel?” An hapot na ini kan mga disipulo ni Jesus naghayag na dai pa ninda aram an katuyohan kan Kahadean nin Dios asin an itinalaan na panahon na iyan mapoon na mamahala. Pinatatanidan sinda na dai magbanabana manongod sa bagay, si Jesus nagsabi: “Mayo sa saindo an pakaaram kan mga aldaw o panahon na ibinugtak kan Ama sa saiyang sadiring kapangyarihan.” Aram ni Jesus na an saiyang paghade sa daga sa ngapit pa, haloy pa pakalihis kan saiyang pagkabuhay liwat asin pagsakat sa langit. (Gibo 1:6-11; Lucas 19:​11, 12, 15) Ihinula ini kan Kasuratan. Paano?

15. Paano nagtatao nin liwanag an Salmo 110:1 dapit sa kun noarin an paghade ni Jesus?

¹⁵ Makahulang inaapod si Jesus na “Kagurangnan,” si Hadeng David nagsabi: “An sabi ni Jehova sa sakong Kagurangnan: ‘Tumukaw ka sa sakong too sagkod na ibugtak ko an saimong mga kaiwal na tongtongan kan saimong mga bitis.’” (Salmo 110:1; ikomparar an Gibo 2:​34-36.) Ipinaririsa kan hulang ini na an paghade ni Jesus dai tolos mapoon pagkasakat nia sa langit. Imbes, maghahalat sia sa too nin Dios. (Hebreo 10:​12, 13) Gurano kahaloy na magpapadagos an paghalat na ini? Noarin mapoon an saiyang paghade? Tinatabangan kita kan Biblia na makua an mga simbag.

16. Ano an nangyari kan 607 B.C.E., asin paano ini konektado sa Kahadean nin Dios?

¹⁶ An solamenteng siudad sa bilog na daga na dian ibinugtak ni Jehova an saiyang ngaran iyo an Jerusalem. (1 Hade 11:36) Iyan man an kabisera kan inoyonan nin Dios na daganon na kahadean na iyo an tipo kan langitnon na Kahadean nin Dios. Kun siring, an paglaglag kan mga Babilonyo sa Jerusalem kan 607 B.C.E. makahulogan na marhay. An pangyayaring ini nagtanda sa pagpoon nin halawig na pagpondo kan direktang paghade nin Dios sa saiyang banwaan digdi sa daga. Pakalihis nin mga anom na siglo, ipinarisa ni Jesus na an peryodong ini nin napondong paghade nagpapadagos pa, huli ta sia nagsabi: “An Jerusalem babatayan kan mga nasyon, sagkod na maotob an itinalaan na mga panahon kan mga nasyon.”​—Lucas 21:24.

17. (a) Ano “an itinalaan na mga panahon kan mga nasyon,” asin magigin gurano iyan kahalawig? (b) Kasuarin nagpoon asin natapos “an itinalaan na mga panahon kan mga nasyon”?

¹⁷ Durante kan “itinalaan na mga panahon kan mga nasyon,” an mga gobyerno sa kinaban totogotan na pondohon an paghade na inoyonan nin Dios. An peryodong iyan nagpoon sa pagkalaglag kan Jerusalem kan 607 B.C.E., asin sinabi ni Daniel na iyan magpapadagos sa laog nin “pitong panahon.” (Daniel 4:​23-25) Gurano iyan kahalawig? Ipinaheheling kan Biblia na an tolo may kabangang “panahon” bale 1,260 aldaw. (Kapahayagan 12:​6, 14) An doble kan peryodong iyan, o pitong panahon, magigin 2,520 aldaw. Alagad mayong mahalagang nangyari sa katapusan kan halipot na peryodong iyan nin panahon. Minsan siring, paagi sa paggamit kan “sarong aldaw para sa sarong taon” sa hula ni Daniel asin pagbilang nin 2,520 taon poon kan 607 B.C.E., minaabot kita sa taon na 1914 C.E.​—Bilang 14:34; Ezequiel 4:6.

18. Ano an ginibo ni Jesus pakaakoa tolos kan kapangyarihan sa Kahadean, asin paano ini nakaapektar sa daga?

¹⁸ Nagpoon na daw na maghade si Jesus sa langit kan panahon na idto? An Makakasuratan na mga dahelan sa pagsabing iyo ipaliliwanag sa sunod na kapitulo. Siempre, an kapinonan kan paghade ni Jesus dai tatandaan nin tolos-tolos na katoninongan digdi sa daga. An Kapahayagan 12:​7-12 nagpapaheling na pakaakoa tolos kan Kahadean, palalayason ni Jesus sa langit si Satanas asin an demonyong mga anghel. Ini mangangahulogan nin kasakitan para sa daga, alagad nakaoogma sa puso na mabasa na an Diablo igwa na sana nin natatadang ‘halipot na panahon.’ Sa dai na mahahaloy, kita makapaggagayagaya bako sanang huli ta an Kahadean nin Dios namamahala na kundi huli man ta iyan magdadara nin mga bendisyon sa daga asin sa makinuyog na katawohan. (Salmo 72:​7, 8) Paano niato naaaraman na ini mangyayari sa dai na mahahaloy?

[Nota sa Ibaba]

BALOON AN SAINDONG KAARAMAN

Ano an Kahadean nin Dios, asin hale saen iyan namamahala?

Siisay an naghahade sa Kahadean, asin sairisay an sakop kaiyan?

Paano kita inasegurar ni Jehova na tunay an saiyang Kahadean?

Kasuarin nagpoon asin natapos “an itinalaan na mga panahon kan mga nasyon”?

[Kahon sa pahina 94]

NAGKAPIRANG MAHALAGANG PANGYAYARI NA KONEKTADO SA KAHADEAN NIN DIOS

• Ipinaisi ni Jehova an saiyang katuyohan na magpaluwas nin sarong “banhi” na maronot sa payo kan Halas, si Satanas na Diablo.​—Genesis 3:15.

• Kan 1943 B.C.E., isinabi ni Jehova na an “banhing” ini magigin tawong gikan ni Abraham.​—Genesis 12:​1-3, 7; 22:18.

• An tipan nin Pagboot na itinao sa Israel kan 1513 B.C.E. nagtatao nin “anino kan marahay na mga bagay na madatong.”​—Exodo 24:​6-8; Hebreo 10:1.

• An daganon na kahadean nin Israel nagpoon kan 1117 B.C.E., asin iyan nagpadagos kan huri sa linya ni David.​—1 Samuel 11:15; 2 Samuel 7:​8, 16.

• An Jerusalem linaglag kan 607 B.C.E., asin nagpoon “an itinalaan na mga panahon kan mga nasyon.”​—2 Hade 25:​8-10, 25, 26; Lucas 21:24.

• Kan 29 C.E., linahidan si Jesus bilang Designadong Hade asin ginibo an saiyang ministeryo sa daga.​—Mateo 3:​16, 17; 4:17; 21:​9-11.

• Kan 33 C.E., suminakat si Jesus sa langit, tanganing duman maghalat sa too nin Dios sagkod na magpoon an saiyang paghade.​—Gibo 5:​30, 31; Hebreo 10:​12, 13.

• Si Jesus pinatukaw sa trono kan langitnon na Kahadean kan 1914 C.E. kan matapos “an itinalaan na mga panahon kan mga nasyon.”​—Kapahayagan 11:15.

• Si Satanas asin an saiyang mga demonyo ihinolog sa palibot kan daga asin nagdara nin orog na kasakitan sa katawohan.​—Kapahayagan 12:​9-12.

• Pinangangatamanan ni Jesus an pambilog na kinaban na paghuhulit kan maogmang bareta kan Kahadean nin Dios.​—Mateo 24:14; 28:​19, 20.