Aramon Kun Paano Kamo Dapat na Sumimbag

AN NAGKAPIRANG hapot garo darakulang tipak nin yelo na iinaanod. An pinakadakulang parte nasa irarom. An pundamental na isyu sa parate mas importante sa mismong hapot.

Dawa kun gustong-gusto nang madangog kan naghapot an simbag, tibaad kalabot sa pakaaram nindo kun paano kamo dapat na sumimbag an pakamansay kun gurano an dapat na sabihon asin kun sa anong anggulo nindo totokaron an tema. (Juan 16:12) Sa nagkapirang kaso, arog kan sinabi ni Jesus sa saiyang mga apostol, an saro tibaad maghagad nin impormasyon na mayo siang deretsong maaraman o dai talaga magtatao nin pakinabang sa saiya.—Gibo 1:6, 7.

Hinahatolan kita kan Kasuratan: “An saindo logod na pagtaram danay na igwa nin pagkamaugayon, na tinimplahan nin asin, tanganing maaraman nindo kun paano kamo dapat na sumimbag sa lambang saro.” (Col. 4:6) Sa siring, bago kita sumimbag, kaipuhan na estudyaran niato bako sanang an sasabihon niato kundi kun paano niato iyan sasabihon.

Prinobaran kan mga Saduceo na siodon si Jesus paagi sa sarong hapot manongod sa pagkabuhay liwat nin sarong babae na nagkapirang beses nang naagom. Minsan siring, aram ni Jesus na dai talaga sinda nagtutubod sa pagkabuhay liwat. Kaya sa simbag nia, saiyang sinimbag an hapot ninda sa paagi na matawan nia nin atension an salang punto de vista na iyong pundamental na basehan kan hapot na iyan. Ginagamit an ekspertong pangangatanosan asin pamilyar na salaysay sa Kasuratan, sinabi ni Jesus an sarong bagay na nungka nindang pinensar kaidto—an malinaw na ebidensia na talagang bubuhayon liwat nin Dios an mga gadan. Napangalas na marhay sa simbag nia an mga kontra sa saiya kaya natakot na sindang maghapot pa sa saiya.—Luc. 20:27-40.

Tanganing maaraman kun paano kamo dapat na sumimbag, dapat na mamansayan man nindo an mga punto de vista asin interes kan mga naghahapot sa saindo. Halimbawa, tibaad hapoton kamo nin sarong kaklase o katrabaho kun taano ta dai kamo nagseselebrar nin Navidad. Taano daw ta naghahapot sia? Talaga daw na gusto niang maaraman an dahelan, o iniisip-isip nia sana kun baga tinotogotan kamong maghapihapi? Tanganing maaraman, tibaad kaipuhan na ihapot nindo kun ano an dahelan kan hapot. Dangan sumimbag oyon dian. Puede man nindong gamiton an oportunidad na ipaliwanag kun paano kita pinoprotehiran kan pagsunod sa paggiya kan Biblia sa mga aspekto kan piesta na nakadedesganar asin nagigin pagabat sa mga tawo.

Halimbawa inimbitaran kamong magpahayag manongod sa Mga Saksi ni Jehova sa sarong grupo nin mga estudyante. Pakatapos kan pahayag nindo, tibaad maghapot sinda. Kun an mga hapot garo baga sinsero asin deretso sa punto, tibaad pinakamarahay an mga simbag na simple asin direkta. Kun an mga hapot nagpapabanaag nin daing binabasaran na mga pagkaanggot kan komunidad, tibaad mas marahay na enotan an simbag nindo nin haralipot na komento manongod sa puedeng makaimpluwensia sa popular na mga punto de vista sa siring na mga isyu asin kun taano ta pinipili nin Mga Saksi ni Jehova na pabayaan na an Biblia an magbugtak kan pamantayan para sa sainda. Parate na kapakipakinabang na mansayon an siring na mga hapot bilang mga tema na dian sinda interesado, bakong bilang mga angat—dawa iyan tibaad iinatubang sa siring na paagi. Kun siring, an simbag nindo nagtatao sa saindo nin oportunidad na pahiwason an punto de vista kan mga nagdadangog sa saindo, tawan sinda nin tamang impormasyon, asin ieksplikar an sono sa Kasuratan na basehan kan satong mga tinutubod.

Ano an magigin reaksion nindo sa among na habo kamong tawan nin bakasyon sa trabaho tanganing makaatender sa sarong kombension? Enot, konsideraron an mga bagay sa punto de vista nia. Makatatabang daw an pag-opresir nindo na mag-obertaim sa ibang panahon? Kun ieeksplikar nindo sa saiya na an pagtotokdong itinatao sa satong mga kombension nakatatabang sa sato na magin onesto, mapagtitiwalaan na mga trabahador, magkakaigwa daw iyan nin epekto? Kun ipaheling nindo na kinokonsiderar nindo an saiyang intereses, tibaad magtao man sia nin paborableng konsiderasyon sa narerealisar nia na importante sa saindong buhay. Alagad ano kun gusto nia na kamo gumibo nin bagay na madaya? An malinaw an pagkasabing paghabo kaiba an sarong punto hale sa Kasuratan magpapahayag kan saindong paninindogan. Alagad mas dakula daw na karahayan an magigibo kun mangatanosan nguna kamo sa saiya na an tawo na andam na magputik o maghabon para sa saiya puede man na magputik sa saiya o maghabon sa saiya?

Sa ibong na lado, tibaad saro kamong estudyante na habong makikabtang sa mga aktibidad sa eskuelahan na bakong sono sa Kasuratan. Girumdoma, bako gayod nindong kapareho sa punto de vista an maestro, asin responsibilidad nia na papagdanayon an disiplina sa klase. An mga angat na napapaatubang sa saindo (1) magpaheling nin pagpahalaga sa ikinapupurisaw nia, (2) magalang na ieksplikar an saindong paninindogan, asin (3) magin marigon sa aram nindo na ikaoogma ni Jehova. Para sa pinakamarahay na mga resulta, tibaad an kaipuhan bako sanang simple, direktang pagsabi kan tinutubod nindo. (Tal. 15:28) Kun kamo hoben pa, daing duwa-duwa na tatabangan kamo kan saindong ama o ina na mag-andam nin sasabihon.

Kun beses, tibaad hagadon sa saindo na pahimutikan an mga sahot tumang sa saindo nin saro na may autoridad. Tibaad hagadon nin sarong pulis, opisyal kan gobyerno, o huwes na simbagon nindo an mga hapot manongod sa pagkuyog sa sarong ley, paninindogan nindo sa Kristianong neutralidad, o aktitud nindo sa pakikikabtang sa mga seremonyang patriotiko. Paano kamo maninigong sumimbag? “Sa mahoyong boot asin hararom na paggalang,” an hatol kan Biblia. (1 Ped. 3:15) Siring man, ihapot sa sadiri kun taano ta ikinapupurisaw an mga isyung ini, asin magalang na rekonoseron an kapurisawan na iyan. Dangan ano na? Sinambit ni apostol Pablo an proteksion sa diretso na iginagarantiya kan ley nin Roma, kaya puede nindong itokdo an proteksion sa deretso na iginagarantiya kan ley na aplikado sa kaso nindo. (Gibo 22:25-29) Tibaad mapahiwas an punto de vista kan opisyal nin impormasyon manongod sa paninindogan nin enot na mga Kristiano asin kan Mga Saksi ni Jehova sa bilog na kinaban. O puede nindong sambiton kun paano na an pagrekonoser sa autoridad nin Dios sa katunayan nagmomotibar sa mga tawo na mas pirmeng magkuyog sa tamang mga ley nin tawo. (Roma 13:1-14) Nin huli sa impormasyon na iyan, tibaad paborable an magin pag-ako sa pagsabi nin sono sa Kasuratan na mga dahelan kan saindong paninindogan.

Kun nagdedesisyon kun paano masimbag, tibaad kaipuhan man na konsideraron nindo an punto de vista sa Banal na Kasuratan kan naghahapot sa saindo. Ginibo ini ni Jesus kan sinisimbag an hapot kan mga Saduceo manongod sa pagkabuhay liwat. Sa pakaaram na an rekonosido sana ninda iyo an mga isinurat ni Moises, si Jesus nangatanosan sa sarong salaysay na yaon sa Pentateuco, na iiniintrodusir an saiyang mga komento sa pagsabi: “Alagad na an gadan bubuhayon liwat dawa si Moises nagpahayag.” (Luc. 20:37) Tibaad maheling man nindong may bentaha an pagkotar sa mga kabtang kan Biblia na rekonosido kan naghihinanyog sa saindo asin pamilyar sa saiya.

Ano kun an Biblia dai minamansay na masasarigan kan naghihinanyog sa saindo? Mangnoha an ginibo ni apostol Pablo sa diskurso nia sa Areopago, na nasusurat sa Gibo 17:22-31. Isinabi nia an mga katotoohan sono sa Kasuratan na dai direktang kinokotar an Biblia. Saen man kaipuhan, magigibo nindo an arog kaiyan. Sa nagkapirang lugar tibaad kaipuhan na pirang beses nguna nindong kaolayon an sarong tawo bago nindo direktang masasambitan an Biblia. Kun iintrodusir na nanggad nindo an Biblia, tibaad madonong na sa primero magtao sana nin nagkapirang dahelan kun taano iyan ta maninigong konsideraron imbes na marigon na sabihon na iyan Tataramon nin Dios. Minsan siring, an katuyohan nindo maninigo na magtao nin malinaw na patotoo manongod sa katuyohan nin Dios asin, pag-abot nin panahon, pabayaan na maheling mismo kan naghihinanyog sa saindo kun ano an sinasabi kan Biblia. An Biblia mas nakabebensir nanggad kisa ano man na personal niatong masasabi.—Heb. 4:12.

Kanigoan katama na an mga lingkod ni Jehova, na maugayon mismo, sinasabihan na an sainda logod na pagtaram “danay na igwa nin pagkamaugayon, na tinimplahan nin asin”! (Col. 4:6; Ex. 34:6) Ini nangangahulogan na dapat kitang magtaram na may kabootan, dawa kun garo baga iyan dai maninigo. An pagtaram niato maninigo na kawiliwili, bakong barumbado o daing pagkamataktika.

Dakol an nag-aagi nin grabeng sakit, asin aroaldaw nagtitios sinda nin mga insulto. Kun sinosongko niato an siring na mga tawo, tibaad makolog sa talinga an pagtaram ninda. Paano kita maninigong sumimbag? Sinasabi kan Biblia: “An simbag, kun mahoyo, nakapararayo nin kaanggotan.” An siring na simbag puede man na makapalumoy sa boot nin saro na may kontrang punto de vista. (Tal. 15:1; 25:15) Para sa mga tawo na nakaeeksperyensia nin barumbadong gawe-gawe aroaldaw, an hiro-hiro asin boses na nagpapahayag nin kabootan puedeng makaakit na marhay na tibaad hinanyogon ninda an dara niatong maogmang bareta.

Dai kita interesadong makidiskutir sa mga mayo nin paggalang sa katotoohan. Imbes, an mawot niato makipangatanosan hale sa Kasuratan sa mga tawo na matogot sa sato na gibohon iyan. Ano man an situwasyon na masumpongan niato, isinasaisip niato na dapat kitang sumimbag na may kabootan asin kombiksion na masasarigan an mahalagang marhay na mga panuga nin Dios.—1 Tes. 1:5.

Kun maghapot an sarong inaadalan sa Biblia o kapagtubod kun ano an maninigo niang gibohon sa sarong espesipikong situwasyon, paano kamo maninigong sumimbag? Tibaad aram nindo kun ano an personal nindong gigibohon. Alagad an lambang tawo dapat na manimbag sa sadiri niang mga desisyon sa buhay. (Gal. 6:5) Ipinaliwanag ni apostol Pablo na inenkaminar nia an “pagkuyog paagi sa pagtubod” sa mga tawong hinulitan nia. (Roma 16:26) Iyan marahay na halimbawa na dapat niatong arogon. An tawo na nagdedesisyon prinsipalmente tanganing panigoan an nagtotokdo sa saiya sa Biblia o an ibang tawo naglilingkod sa mga tawo, dai nabubuhay paagi sa pagtubod. (Gal. 1:10) Kaya an simple, direktang simbag tibaad bakong sa ikararahay kan naghahapot.

Kun siring, paano kamo makasisimbag sa paagi na kabagay kan giyang itinatao kan Biblia? Puede nindong darahon an atension sa tamang mga prinsipyo sa Biblia asin halimbawa na yaon sa rekord kan Biblia. Sa nagkapirang kaso, puede nindong ipaheling sa saiya kun paano magsisiyasat tanganing sia mismo an makakua kan mga prinsipyo asin halimbawang iyan. Puede ngani nindong tokaron an mga prinsipyo asin an halaga kan mga halimbawa alagad dai iyan iinaaplikar sa yaon na situwasyon. Hapoton an tawo kun may naheheling sia dian na puedeng makatabang sa saiya sa pagdesisyon nin madonong. Parigonon an boot nia na estudyaran sa liwanag kan mga prinsipyo asin halimbawang ini kun anong igagawe an magpapaogma ki Jehova. Sa siring tinatabangan sia nindo na ‘patoodon an saiyang kakayahan nin pagmansay na mamidbid kun ano an tama asin sala.’—Heb. 5:14.

An mga pagtiripon kan Kristianong kongregasyon parateng nagtatao nin mga oportunidad na kita makapagpahayag sa publiko kan satong pagtubod. An sarong paagi na iyan ginigibo niato iyo an pagkomento bilang simbag sa mga hapot. Paano daw kita maninigong magkomento? May kamawotan na omawon si, o magtaram nin marahay manongod ki, Jehova. Iyan an ginibo kan salmistang si David kun sia nasa “tahaw kan nagkakasararong mga kadaklan.” (Sal. 26:12) Kita man maninigong magkomento sa paagi na nakaparirigon sa boot nin mga kapagtubod, na dinadagka sinda “sa pagkamoot asin sa marahay na mga gibo,” siring sa isinadol ni apostol Pablo. (Heb. 10:23-25) An pag-adal sa mga leksion antes pa makatatabang sa sato na magibo ini.

Kun inapodan na magkomento, papagdanayon na simple, malinaw, asin halipot an saindong komento. Dai pag-uboson an enterong parapo; saro sanang punto an trataron. Kun kabtang sana kan simbag an itatao nindo, matao iyan sa iba kan oportunidad na tumao nin dugang pang komento. Nangorognang kapakipakinabang na tawan nin pagdodoon an mga tekstong sinitar sa materyales. Kun ginigibo iyan, hingoahon na darahon an atension sa parte kan teksto na aplikado sa puntong pinag-oolayan. Pag-adalan na magkomento sa sadiri nindong tataramon imbes na direktang basahon an nasa parapo. Dai mapurisaw kun an komento nindo dai nindo ikinasabi nin tamang-tama. Iyan nangyayari kun minsan sa gabos na nagkokomento.

Malinaw na an kalabot sa pakaaram kun paano kita dapat na sumimbag bako sanang pakaaram kan mismong simbag. Iyan nagkakaipo nin pakamansay. Alagad nakakokontento nanggad kun kamo minatao nin simbag na gikan sa saindong puso asin nakapahihiro sa puso nin iba!—Tal. 15:23.