Talaga daw na Hale sa Dios an Maogmang Bareta?

An maogmang bareta na an mga tawo mabubuhay sagkod lamang sa daga nakasurat sa Biblia. (Salmo 37:29) An Biblia kompuesto nin 66 na saradit na libro. Naggamit an Dios nin mga 40 maimbod na lalaki tanganing isurat iyan. An enot na limang libro isinurat ni Moises mga 3,500 na taon na an nakaagi. An huring libro isinurat ni apostol Juan labing 1,900 na taon na an nakaagi. Kiisay na mga ideya an isinurat kan mga kagsurat sa Biblia? An Dios nakikomunikar sa mga kagsurat paagi sa banal na espiritu nia. (2 Samuel 23:2) Isinurat ninda an kaisipan nin Dios, bakong an saindang kaisipan. Kaya, si Jehova an Autor kan Biblia.​—Basahon an 2 Timoteo 3:16; 2 Pedro 1:20, 21.

Hilingon an video na Siisay an Awtor kan Bibliya?

Aram niato na an Biblia hale sa Dios huli ta eksaktong ihinula kaiyan nin detalyado an mangyayari sa maabot. Mayo nin tawo na makakagibo kaiyan. (Josue 23:14) Solamenteng an Dios na Makakamhan sa Gabos an may kakayahan na mahiling nin eksakto kun ano an puturo nin katawohan.​—Basahon an Isaias 42:9; 46:10.

Aasahan niato na talagang daing kaagid an sarong libro na hale sa Dios. Binilyon na kopya kan Biblia an ikinadistribwir na sa ginatos na lenguahe. Dawa ngani suanoy na, an Biblia kaoyon kan probadong siensia. Siring man, an 40 kagsurat kaiyan mayong kontradiksion sa lambang saro.a Apuera kaiyan, an sinasabi kan Biblia dapit sa pagkamoot malinaw na nagpapahiling na iyan hale nanggad sa Dios, asin sagkod ngonyan may puersa iyan na bagohon an buhay nin mga tawo para sa ikakarahay. An mga katunayan na ini nakakakombensir sa minilyon na an Biblia Tataramon nin Dios.​—Basahon an 1 Tesalonica 2:13.

Hilingon an video na Paano Kita Nakakasigurado na Totoo an Bibliya?

Iyan nakasentro sa maogmang bareta na an Dios may mamomoton na katuyohan para sa katawohan. Ipinapaliwanag kaiyan kun paano nawara an pribilehio nin tawo na mabuhay sa paraisong daga sa kapoonpooni kan kasaysayan asin kun paano iyan ibabalik sa katapustapusi.​—Basahon an Kapahayagan 21:4, 5.

An Tataramon nin Dios igwa man nin mga ley, prinsipyo, asin sadol. Dugang pa, nakasurat dian an kasaysayan dapit sa pagtratar nin Dios sa katawohan—kasaysayan na naghahayag kan personalidad nia. Huli kaini, matatabangan ka kan Biblia na mamidbid an Dios. Ipinapaliwanag kaiyan kun paano ka magigin katood nia.​—Basahon an Salmo 19:7, 11; Santiago 2:23; 4:8.

Matatabangan ka kan brosyur na ini na masabotan iyan paagi sa paggamit kan pamamaagi ni Jesus. Naggamit sia nin mga teksto asin ipinaliwanag an kahulogan kan ‘mga Kasuratan.’​—Basahon an Lucas 24:27, 45.

An maogmang bareta hale sa Dios mas kawiliwili kisa sa ibang mga bagay. Pero, may mga dai interesado dian, asin ikinakauyam pa ngani iyan nin iba. Alagad, dai ka dapat pangluyahan nin boot. An saimong paglaom na mabuhay nin daing katapusan nakadepende sa pakamidbid mo sa Dios.​—Basahon an Juan 17:3.