KAPITULO DISISIYETE
‘Uya! An Babaying Uripon ni Jehova’!
1, 2. (a) Paano pigbati si Maria nin sarong estranghero? (b) Taano ta napapaatubang si Maria sa mahalagang marhay na desisyon?
NAPAHILING si Maria asin nabigla kan maglaog an bisita sa harong ninda. Dai kaini hinanap an saiyang ama o ina. Siya an tuyo kan bisita! Sigurado siya na bako ining taga Nazaret. Sadit sana an banwaan ninda kaya naririparo kun may estranghero. Maririparo an bisitang iyan maski sain. Bago ki Maria an pagbati niya: “Tara, ika na [pano nin pabor], an Kagurangnan nasa saimo.”—Basahon an Lucas 1:26-28.
2 Sa paaging ini ipinamidbid sa sato kan Bibliya si Maria, an aki ni Heli, na taga banwaan nin Nazaret sa Galilea. Sa panahon na iyan, napapaatubang siya sa importanteng marhay na desisyon. Ikakasal na siya sa karpinterong si Jose, na bakong mayaman pero may makusog na pagtubod. Kaya garo baga nakaplano na an buhay niya—simpleng buhay na sinusuportaran an agom na si Jose asin magkaibanan na magpapamilya. Pero bigla siyang tinawan kan bisitang ini nin asignasyon hali sa Diyos, sarong responsabilidad na mabago sa buhay niya.
3, 4. Tanganing mamidbid si Maria, ano an dai ta kaipuhan pag-ulayan, asin sa ano kita dapat magpokus?
3 Dakul an napapangalas pag naaaraman nindang limitado sana an sinasabi kan Bibliya dapit ki Maria. Dikit an sinasabi kaiyan dapit sa buhay niya kan aki pa, mas kadikit pa ngani dapit sa personalidad niya, asin mayo lamang nin dapit sa saiyang itsura. Alagad, dakul an manunudan ta sa talagang sinasabi kan Tataramon nin Diyos dapit sa saiya.
4 Tanganing mamidbid si Maria, kaipuhan tang halion sa isip an dakul na ideya dapit sa saiya na itinutukdo nin manlain-lain na relihiyon. Kaya dai ta pag-uulayan an mga ladawan niya na ipininta, mga imahen na inukit o gibo sa marmol. Dai ta man pag-uulayan an komplikadong teolohiya asin mga doktrinang nagtao sa mapakumbabang babaying ini nin haralangkawon na titulo na arog baga kan “Ina nin Diyos” asin “Reyna kan Kalangitan.” Imbes, magpokus kita sa kun ano talaga an sinasabi kan Bibliya. Tinatabangan kita kaiyan na masabutan an pagtubod niya asin kun paano ta iyan maaarog.
Pagbisita nin Sarong Anghel
5. (a) Ano an manunudan ta sa reaksiyon ni Maria sa pagbati ni Gabriel? (b) Anong mahalagang leksiyon an manunudan ta ki Maria?
5 Bakong tawo an bisita ni Maria. Si anghel Gabriel idto. Kan apudon siya kaini na “pano nin pabor,” ‘natikbahan’ siya asin napangalas sa pambihirang pagbati sa saiya. (Luc. 1:29) Pano nin pabor niisay? Dai niya inasahan na magkakaigwa siya nin pambihirang pabor sa paghiling nin mga tawo. Pero an pigsasabi kan anghel iyo an pabor ni Jehova. Mahalaga iyan ki Maria. Pero dai siya nangahas na isipon na nasa saiya an pabor nin Diyos. Kun nagmamaigot kitang kamtan an pabor nin Diyos, na nungkang may kapalangkawan na iniisip na nasa satuya na iyan, manunudan ta an mahalagang leksiyon na lubos na nasabutan kan hoben na si Maria. Habo nin Diyos sa mga maabhaw, pero namumutan asin sinusuportaran niya an mga may kababaan an buot saka mapakumbaba.—Sant. 4:6.
Dai nangahas si Maria na isipon na nasa saiya an pabor nin Diyos
6. Anong pribilehiyo an dara kan anghel para ki Maria?
6 Kaipuhan ni Maria an siring na kapakumbabaan, huling daing kaagid na pribilehiyo an dara kan anghel para sa saiya. Ipinaliwanag kaini na ipapangaki niya an magigin pinakaimportante sa gabos na tawo. Nagsabi si Gabriel: ‘[Si Jehova] Diyos matao sa saiya kan trono ni David na saiyang ama. Asin siya maghahadi sa harong ni Jacob sagkod lamang; asin dai nin katapusan an saiyang kahadian.’ (Luc. 1:32, 33) Siguradong aram ni Maria an panuga nin Diyos ki David labing sangribong taon na an nakaagi—na an saro na magikan sa saiya mamamahala sagkod lamang. (2 Sam. 7:12, 13) Kaya an aki niya magigin an Mesiyas na dakul na siglo nang hinahalat kan banwaan nin Diyos!
Sarong daing kaagid na pribilehiyo an dara ni anghel Gabriel para ki Maria
7. (a) Sa hapot ni Maria, ano an manunudan ta dapit sa saiya? (b) Ano an manunudan ki Maria kan mga hoben ngunyan?
7 Dugang pa, sinabihan si Maria kan anghel na an aki ‘aapudon na Aki kan Kahuruhalangkawi.’ Paano maipapangaki nin sarong tawong babayi an Aki nin Diyos? An totoo, paano ngani magkakaaki si Maria? Katrato pa sana niya si Jose, dai pa sinda kasal. Prangkang naghapot si Maria: ‘Paano mangyayari ini, huli ta dai pa ako [nakidurog sa] lalaki?’ (Luc. 1:34) Mangnuhon na dai siya nasupog sabihon na birhen pa siya. An totoo, mahalaga sa saiya an kalinigan sa moral. Sa ngunyan, dakul na hoben an gustong-gustong mawara an saindang pagkabirhen asin tinutuya ninda an mga birhen pa. Iba na talaga an kinaban. Minsan siring, dai nagbabago si Jehova. (Mal. 3:6) Arog kan panahon ni Maria, pinapahalagahan nin Diyos an mga nagsusunod sa moral na pamantayan niya.—Basahon an Hebreo 13:4.
8. Paano magkakaaki si Maria nin sarong perpekto dawa bako siyang perpekto?
8 Minsan ngani maimbod na lingkod nin Diyos si Maria, bako siyang perpekto. Kun siring, paano siya magkakaaki nin sarong perpekto, an Aki nin Diyos? Ipinaliwanag ni Gabriel: ‘An [banal na] espiritu madatong sa saimo, asin an kapangyarihan kan Kahuruhalangkawi lilindungan ka: kaya an banal na ipapangaki mo aapudon na Aki nin Diyos.’ (Luc. 1:35) An “banal” nangangahulugan “malinig,” “dalisay,” “sagrado.” Normal sana na ikinakapamana nin mga tawo sa mga aki ninda an pagigin maati asin makasalan. Pero digdi, magibo si Jehova nin daing kaagid na milagro. Ibabalyo niya an buhay kan saiyang Aki hali sa langit pasiring sa matris ni Maria, dangan gagamiton niya an aktibong puwersa, o banal na espiritu, tanganing ‘lindungan’ si Maria, na pinoprotektaran an aki para dai mamantsahan nin kasalan. Naniwala daw si Maria sa panuga kan anghel? Ano an simbag niya?
An Simbag ni Maria ki Gabriel
9. (a) Taano ta sala an mga nagdududa sa pagkasaysay dapit ki Maria? (b) Paano pinakusog ni Gabriel an pagtubod ni Maria?
9 An mga nagdududa, pati na an nagkapirang teologo nin Kakristiyanuhan, dai makapaniwala na puwedeng magkaaki an sarong birhen. Dawa edukado sinda, dai ninda masabutan an sarong simpleng katotoohan. Arog kan pagkasabi ni Gabriel, ‘dai nin tataramon hali sa Diyos na [imposible].’ (Luc. 1:37) Naniwala si Maria na totoo an sinabi ni Gabriel, huli ta dakula an pagtubod niya. Minsan siring, dai siya basta naniwala. Arog nin siisay man na makatanusan na tawo, kaipuhan ni Maria nin ebidensiya na babasaran kan saiyang pagtubod. Andam si Gabriel na magtao pa nin ebidensiya. Sinabi niya ki Maria an dapit sa may edad nang paryente kaini na si Elizabet, na haloy nang midbid na baog. Milagrosong pinangyari nin Diyos na mangidam ini!
10. Taano ta dai niyato maninigong isipon na dai natakot o nadipisilan si Maria sa pribilehiyo niya?
10 Ano na an gigibuhon ni Maria? May asignasyon sa saiya asin igwa siya nin ebidensiya na gigibuhon nin Diyos an gabos na sinabi ni Gabriel. Dai ta maninigong isipon na dai man lamang siya natakot o nadipisilan sa pribilehiyong ini. An inot na dahilan, dapat niyang isipon na ikakasal na siya ki Jose. Madadagos pa daw an kasal ninda pag maaraman kaini na bados siya? Ikaduwa, an asignasyon na iyan garo baga magabaton na responsabilidad. An ipagbabados niya iyo an pinakamahalaga sa gabos na linalang nin Diyos—an Saiya mismong namumutan na Aki! Mantang umboy pa, kaipuhan niyang atamanon asin protektaran ini sa maraot na kinaban. Magabat nanggad na responsabilidad!
11, 12. (a) Ano an reaksiyon kun minsan dawa kan makusog an buot asin maimbod na mga lalaki sa dipisil na asignasyon hali sa Diyos? (b) Sa simbag ni Maria ki Gabriel, ano an manunudan ta dapit sa saiya?
11 Ipinapahiling kan Bibliya na kun minsan dawa an makusog an buot asin maimbod na mga lalaki nag-alangan na akuon an dipisil na mga asignasyon hali sa Diyos. Si Moises nangatanusan na dai siya puwedeng magin tagapagtaram nin Diyos huli ta bako siyang gayo matibay magtaram. (Ex. 4:10) Si Jeremias nagsabi na siya “aki pa” para sa ipinapagibo nin Diyos. (Jer. 1:6) Asin si Jonas nagdulag sa asignasyon sa saiya! (Jon. 1:3) Kumusta si Maria?
12 Dawa ngunyan nagigirumduman pa an simpleng mga tataramon ni Maria na nagpapahiling nin lubos na kapakumbabaan asin pagkuyog. Nagsabi siya ki Gabriel: ‘Uya, an babaying uripon [ni Jehova]; mangyari sa sako an siring sa saimong tataramon.’ (Luc. 1:38) An babaying uripon an pinakahamak na suruguon; biyong nakadepende an buhay niya sa saiyang kagurangnan. Iyan an sabuot ni Maria dapit sa saiyang Kagurangnan, si Jehova. Aram niyang protektado siya ni Jehova, na maimbod si Jehova sa mga maimbod sa Saiya, asin na bebendisyunan siya ni Jehova mantang ginigibo an pinakamakakaya niya sa dipisil na asignasyon na ini.—Sal. 18:25.
Aram ni Maria na protektado siya kan saiyang maimbod na Diyos, si Jehova
13. Kun garo dipisil o imposible pa ngani an ipinapagibo sa sato nin Diyos, paano kita makikinabang sa halimbawa ni Maria?
13 Kun minsan may ipinapagibo sa sato an Diyos na sa hiling ta garo dipisil o imposible pa ngani. Minsan siring, an Tataramon niya nagtatao nin dakul na dahilan na magtiwala sa saiya, na ipagkatiwala an satong sadiri sa saiya, arog ni Maria. (Tal. 3:5, 6) Iyo man daw kita? Kun iyo, bebendisyunan niya kita, na urog pang mapakusog kan pagtubod ta sa saiya.
An Pagbisita ki Elizabet
14, 15. (a) Paano tinawan ni Jehova nin balos si Maria kan magbisita ki Elizabet asin Zacarias? (b) Sa sinabi ni Maria na nakasurat sa Lucas 1:46-55, ano an manunudan ta dapit sa saiya?
14 Dakulang bagay para ki Maria an sinabi ni Gabriel dapit ki Elizabet. Sa gabos na babayi sa kinaban, siisay pa an mas makakasabot sa sitwasyon niya? Dali-daling nagduman si Maria sa mabukid na lugar nin Juda, na tulo o apat gayod na aldaw na pagbaklay. Paglaog niya sa harong ni Elizabet asin kan saserdoteng si Zacarias, tinawan ni Jehova si Maria nin dagdag pang matibay na ebidensiya tanganing pasarigon an pagtubod niya. Kan madangog ni Elizabet an pagbati ni Maria, namati niya tulos na kuminibol-kibol sa kagayagayahan an umboy sa saiyang matris. Napano siya nin banal na espiritu asin inapod si Maria na “ina nin sakong Kagurangnan.” Ihinayag na nin Diyos ki Elizabet na an aki ni Maria magigin saiyang Kagurangnan, an Mesiyas. Dugang pa, pinasabngan siyang umawon si Maria huli sa maimbod na pagkuyog: “Paladan an nagtubod.” (Luc. 1:39-45) Iyo, mauutob an gabos na ipinanuga ni Jehova ki Maria!
An pagigin magkatuod ni Maria asin Elizabet nagin bendisyon sa saindang duwa
15 Nagtaram man si Maria. An sinabi niya nakarekord sa Tataramon nin Diyos. (Basahon an Lucas 1:46-55.) Ini an pinakahalawig na sinabi ni Maria sa rekord kan Bibliya, asin dakul kitang manunudan diyan dapit sa saiya. Ipinapahiling kaiyan an saiyang pagigin mapagpasalamat asin mapag-apresyar kan inuumaw niya si Jehova sa pagtao sa saiya nin pribilehiyo na magin ina kan Mesiyas. Ipinapahiling man kaiyan an rarom kan saiyang pagtubod kan sinabi niyang ibinababa ni Jehova an mga maabhaw asin makapangyarihan saka tinatabangan niya an mga hamak asin dukha na naglilingkod sa saiya. Ipinaparisa man kaiyan an rarom kan kaaraman niya. Sigun sa sarong pagkarkulo, labing 20 beses siyang nagkotar sa Hebreong Kasuratan!a
16, 17. (a) Paano nagpahiling si Maria asin an aki niya nin kuwalidad na kaipuhan tang arugon? (b) Anong bendisyon an ipinapagirumdom sa sato kan pagbisita ni Maria ki Elizabet?
16 Malinaw na hinurop-hurop ni Maria an Tataramon nin Diyos. Pero, nagdanay siyang mapakumbaba, na mas gusto niyang magkotar sa Kasuratan imbes na magsabi kan sadiri niyang ideya. Pag-abot nin panahon, an aki na nagdadakula sa matris niya mapahiling man nin kaparehong kuwalidad, na masabi: ‘An sakong katukduan bako ko, kundi sa nagsugo sako.’ (Juan 7:16) Marahay na haputon ta an satong sadiri: ‘Ipinapahiling ko daw an siring na respeto asin hararom na paggalang sa Tataramon nin Diyos? O mas gusto ko daw an sadiri kong mga ideya asin katukduan?’ Malinaw na tama an sabuot ni Maria.
17 Mga tulong bulan nag-istar ka Elizabet si Maria, na daing duda na nakapagparinigunan sinda nin buot. (Luc. 1:56) An nakakaugmang pagkasaysay na ini kan Bibliya dapit sa pagbisita ni Maria nagpapagirumdom sa sato na bendisyon an pagkaigwa nin katuod. Kun nagpipili kita nin mga katuod na talagang namumuot ki Jehova, siyertong magigin mas makusog an satong espirituwalidad asin mas mapaparani kita sa saiya. (Tal. 13:20) Pero sa katapos-tapusi, kaipuhan nang magpuli ni Maria. Ano daw an sasabihon ni Jose pag maaraman an kamugtakan niya?
Si Maria Asin Jose
18. Ano an sinabi ni Maria ki Jose, asin ano an reaksiyon kaini?
18 Posibleng dai na hinalat ni Maria na marisa na bados siya. Daing duda na kaipuhan na niyang kaulayon si Jose. Bago kaiyan, tibaad iniisip niya kun ano an magigin reaksiyon kan disente asin may takot sa Diyos na lalaking ini sa sasabihon niya. Minsan siring, kinaulay niya ini asin sinabi an gabos na nangyari sa saiya. Arog kan tibaad maisip nindo, napurisaw si Jose. Gusto niyang paniwalaan an daragang namumutan niya, pero garo baga dai ini nagin maimbod sa saiya. Dai sinasabi kan Bibliya kun ano an naisip niya o kun paano siya nangatanusan. Pero sinasabi kan Bibliya na nagdesisyon siyang idiborsiyo si Maria, huli ta kaidto mag-agom na an paghiling sa mga magkatrato. Minsan siring, habo niyang mapasupog asin maiskandalo sa publiko si Maria, kaya nagdesisyon siyang idiborsiyo ini nin sekreto. (Mat. 1:18, 19) Siguradong makulog para ki Maria na mahiling an mabuot na tawong ini na napupurisaw huli sa pambihirang sitwasyon na ini. Pero, dai siya naghinanakit.
19. Paano tinabangan ni Jehova si Jose na gibuhon an tama?
19 Mabuot na tinabangan ni Jehova si Jose na gibuhon an tama. Sa sarong pangaturugan, sinabi kan anghel nin Diyos na talagang milagro an pagbados ni Maria. Siyertong naginhawahan si Jose! Ginibo niya an ginibo ni Maria sa kapinunan pa sana—naghiro siya uyon sa paggiya ni Jehova. Kinua niya si Maria bilang agom, asin nag-andam siya na gibuhon an daing kaagid na responsabilidad na atamanon an Aki ni Jehova.—Mat. 1:20-24.
20, 21. Ano an manunudan ki Maria asin Jose kan mga may agom saka nagpaplanong mag-agom?
20 An mga may agom—asin nagpaplanong mag-agom—igwang manunudan sa mag-agom na ini na nabuhay 2,000 na taon na an nakaagi. Mantang nahihiling ni Jose na inuutob kan agom niya an mga gibuhon asin responsabilidad bilang ina, siyertong naugma siya na giniyahan siya kan anghel ni Jehova. Siyertong nasabutan ni Jose an kahalagahan nin pananarig ki Jehova kun naggigibo nin magabat na mga desisyon. (Sal. 37:5; Tal. 18:13) Daing duda na nagdanay siyang maingat asin mabuot sa pagdesisyon bilang payo nin pamilya.
21 Sa ibong na lado, ano an manunudan ta sa pagigin andam ni Maria na magin agom ni Jose? Minsan ngani kan primero nadipisilan si Jose na sabuton an nangyari ki Maria, hinalat ni Maria an magigin desisyon ni Jose huling ini an magigin payo kan pamilya. Marahay na leksiyon iyan para sa saiya asin sa mga Kristiyana ngunyan. Ultimo, sa mga pangyayaring ini posibleng dakul an nanudan ni Jose asin Maria dapit sa kahalagahan nin onesto saka prangkang pag-uulay.—Basahon an Talinhaga 15:22.
22. Ano an nagin pundasyon kan pag-aguman ni Jose asin Maria, saka ano an oportunidad ninda?
22 Marahayon nanggad an pundasyon kan pag-aguman ni Jose asin Maria. Pareho nindang namutan si Jehova nin urog sa gabos asin bilang responsable saka maasikasong mga magurang gusto nindang paugmahon siya. Siyempre, may naghahalat sa sainda na mas dakulang mga bendisyon—asin mas dakulang mga kadipisilan man. Oportunidad ninda na padakulaon si Jesus, na magigin an pinakadakulang tawo na nabuhay sa kinaban kasuarin man.
a Malinaw na kaiba sa mga kinotar ni Maria an sinabi kan maimbod na si Hana, na nagkaaki man huli sa bendisyon ni Jehova.—Hilingon an kahon na “Duwang Pambihirang Pamibi,” sa Kapitulo 6.