Pag May Aki Na

Magkahalong ugma asin hadit an namamati kan mga mag-agom pag nagkaaki na sinda. Bilang bagong mga magurang, tibaad manibago kamo pag narisa nindo na an kadaklan kan saindong panahon asin kusog kaipuhan na nindong gamiton sa pag-asikaso sa saindong bagong mundag na aki. An kakulangan nin turog saka mga pagbabago nin emosyon tibaad makaapektar sa saindong relasyon. Kaipuhan nindong duwa na mag-adjust tanganing maasikaso an saindong aki asin maingatan an relasyon nindo. Paano makakatabang sa saindo an Bibliya sa bagay na ini?

AN SINASABI KAN BIBLIYA: ‘An pagkamuot matinios asin mabuot.’ Iyan ‘bako man maimot o maangguton.’ (1 Corinto 13:4, 5, BPV) Bilang bagong ina, normal sanang nasa baby mo an atensiyon mo. Pero, tibaad mamatian kan agom mo na napapabayaan na siya, kaya dai paglingawan na kaipuhan niya man an atensiyon mo. Kun magigin mapasensiya ka asin mabuot, matatabangan mo siya na mamatian na mahalaga siya asin kaiba man siya sa pag-asikaso sa aki nindo.

“Kamong mga agom na lalaki, padagos na makiiba sa sainda . . . sigun sa kaaraman.” (1 Pedro 3:7, NW) Kaipuhan mong masabutan na an kadaklan sa kusog kan saimong agom mapapaduman sa pag-asikaso sa saindong aki. May bago siyang responsabilidad asin posibleng nai-stress na siya, napapagal, o nade-depress pa ngani. May panahon ngani na tibaad mauyam pa siya saimo, pero magin kalmado ka sana huling ‘urog karahay an haloy na maanggot kisa sa makusog na tawo.’ (Talinhaga 16:32) Magin makonsiderasyon, asin itao an suporta na kaipuhan niya.—Talinhaga 14:29.

AN PUWEDE MONG GIBUHON:

• Mga Ama: Tabangan an agom mo sa pag-asikaso sa aki, dawa sa banggi. Bawasan an panahon sa ibang aktibidad para mas dakul an panahon mo sa saimong agom asin aki

• Mga Ina: Pag gustong magtabang kan agom mo, patabangon mo siya. Kun bako siyang arog kaiyan kahusay sa pag-asikaso sa aki, imbes na tatsaran, mabuot mo siyang tukduan

AN SINASABI KAN BIBLIYA: ‘Sinda magigin sarong laman.’ (Genesis 2:24) Dawa ngani may bago nang miyembro sa pamilya nindo, tandaan na “sarong laman” pa man giraray kamo kan agom mo. Hinguwahon pirmi na pakusugon an saindong relasyon.

Agom na babayi, magpasalamat sa tabang asin suporta kan saimong agom. An saimong pag-apresyar puwedeng magin ‘bulong’ sa saiya. (Talinhaga 12:18) Agom na lalaki, sabihon sa saimong agom kun gurano mo siya kanamumutan asin na mahalaga siya saimo. Sabihon sa saiya na talagang hanga ka sa pag-asikaso niya sa saindong pamilya.—Talinhaga 31:10, 28.

“An lambang saro maghanap nin ikakarahay nin iba, bakong an ikakarahay kan sadiri.” (1 Corinto 10:24, BPV) Pirming itao sa saimong agom an pinakamarahay. Magtao nin panahon sa pag-uulay bilang mag-agom. Pasalamatan asin dangugon an kada saro. Dai magin makasadiri pag-abot sa saindong seksuwal na relasyon. Isipon an pangangaipo kan saimong agom. An Bibliya nagsasabi: ‘Dai kamo magpasarusayuma apuwera sana kun napagkauyunan sa sarong panahon.’ (1 Corinto 7:3-5) Kaya prangka nindong pag-ulayan an bagay na iyan. An pagigin mapasensiya asin makonsiderasyon mapakusog sa saindong relasyon.

AN PUWEDE MONG GIBUHON:

• Pirming magtao nin panahon sa kada saro

• Dawa sa simpleng mga bagay, ipamati sa saimong agom na namumutan mo siya, arog kan pagsurat o pagtao nin simpleng regalo

AN SINASABI KAN BIBLIYA: ‘Magpuon sa pagkaaki naaraman mo an mga banal na surat, na nakakapadunong sa saimo manungod sa kaligtasan.’ (2 Timoteo 3:15) Planuhon kun paano tutukduan an saindong aki. May pambihira sindang kakayahan na makanuod dawa dai pa namumundag. Mantang nasa matris pa, nabibisto na niya an boses mo asin may epekto na sa saiya an emosyon mo. Basahan siya dawa baby pa siya. Dai pa niya iyan maiintindihan pero makakatabang iyan na magustuhan niya an pagbasa pag nagdakula na siya.

Dai mo isipon na akion pa siya para makanuod manungod sa Diyos. Ipadangog sa saiya an pamibi mo ki Jehova. (Deuteronomio 11:19) Dawa pag nagkakawat kamo, sabihon sa saiya an manungod sa mga linalang nin Diyos. (Salmo 78:3, 4) Mantang nagdadakula an aki nindo asin nahihiling niya an saindong pagkamuot ki Jehova, mamumutan man ninda si Jehova.

AN PUWEDE MONG GIBUHON:

• Espesipikong ipamibi na magkaigwa ka nin kadunungan tanganing matukduan an saimong aki

• Ulit-uliton na sabihon sa saindong aki an simple pero importanteng mga tataramon asin ideya para makanuod siya sa amay na edad