Magdanay na Harani sa Organisasyon ni Jehova

NAGSURAT an disipulong si Santiago: “Rumani kamo sa Diyos, asin marani siya sa saindo.” (Sant. 4:8) Iyo, si Jehova bako man halangkawon o harayuon para madangog an mga gusto tang sabihon saiya, dawa mga bako kitang perpekto. (Gibo 17:27) Paano kita magigin harani ki Jehova? An sarong paagi iyo an pagkaigwa nin personal na relasyon sa saiya patin udok na pamimibi. (Sal. 39:12) Kaipuhan ta man na regular na pag-adalan an saiyang Tataramon, an Bibliya. Paagi kaiyan, namimidbid niyato an Diyos na Jehova asin naaaraman ta an mga katuyuhan niya saka an kabutan niya para sa sato. (2 Tim. 3:16, 17) Huli kaiyan, namumutan ta siya asin natatakot kitang mapaanggot siya.—Sal. 25:14.

² Pero magigin harani kita ki Jehova solamente paagi sa saiyang Aki, si Jesus. (Juan 17:3; Roma 5:10) Daing ibang arog ni Jesus na makakatabang sa sato para urog na masabutan an kaisipan ni Jehova. Midbid niyang marhay an saiyang Ama kaya nasabi niya: “Dai nin siisay man na nakakamidbid kun siisay an Aki kundi an Ama sana, saka dai nin siisay man na nakakamidbid kun siisay an Ama kundi an Aki sana asin an siisay man na gusto kan Aki na pahayagan manungod sa saiya.” (Luc. 10:22) Kaya pag pinag-aadalan ta an mga Ebanghelyo para maaraman an manungod sa kaisipan asin pagmati ni Jesus, garo ta man sana kaiyan pinag-aadalan an kaisipan asin pagmati ni Jehova. Paagi kaiyan, nagigin mas harani kita sa satong Diyos.

³ Nasa irarom kita kan pamamayo kan Aki nin Diyos asin nagdadanay kitang harani ki Jehova kun harani man kita sa nahihiling na kabtang kan organisasyon nin Diyos na ginagamit niya para tabangan kitang maaraman kun paano gigibuhon an saiyang kabutan. Arog kan ihinula sa Mateo 24:45-47, pignombrahan kan Kagurangnan na Jesu-Cristo “an maimbod asin mapagmansay na uripon” tanganing magtao nin “kakanon sa tamang panahon” sa gabos na lingkod nin Diyos. Sa ngunyan, tinatawan kita kan maimbod na uripon nin abundang espirituwal na kakanon. Paagi sa uripon na ini, sinasadol kita ni Jehova na basahon an saiyang Tataramon aroaldaw, regular na umatender sa satong Kristiyanong mga pagtiripon, asin lubos na makikabtang sa paghuhulit kan ‘maugmang bareta kan Kahadian.’ (Mat. 24:14; 28:19, 20; Jos. 1:8; Sal. 1:1-3) Bakong perpekto an maimbod na uripon pero sigurado kita na ginigiyahan sinda nin Diyos. Dapat kitang maghinguwa na magdanay na harani sa nahihiling na kabtang kan organisasyon ni Jehova asin sumunod sa paggiya kaiyan. Paagi kaiyan, magigin mas harani kita sa satong Diyos na si Jehova saka magseserbi iyan na kusog asin proteksiyon sa sato pag may mga pagbalo o kasakitan.

⁴ Tibaad haloy ka na sa katotoohan. Kaya siguradong nag-agi ka na nin mga pagbalo sa integridad. Pero dawa dai pa nahahaloy kan mamidbid mo si Jehova asin makiiba-iba ka sa mga lingkod niya, aram mong kinokontra ni Satanas na Diyablo an siisay man na nagpapasakop sa soberaniya ni Jehova. (2 Tim. 3:12) Kaya gurano man kagrabe an tinagalan mong mga pagbalo, daing dahilan na matakot ka o pangluyahan nin buot. Nangangako si Jehova na tatabangan ka niya asin sa maabot na panahon bibiyayaan ka niya nin kaligtasan asin buhay na daing sagkod.—Heb. 13:5, 6; Kap. 2:10.

⁵ Kita gabos posibleng umagi pa nin mga pagbalo sa natatada pang mga aldaw kan sistema ni Satanas. Puon kan maestablisar an Kahadian nin Diyos kan 1914, si Satanas asin an maraot na mga anghel niya ihinulog digdi sa daga asin dai na tinugutan na makaduman sa kalangitan ni Jehova. An naggagrabeng pagsakit sa kinaban, pati na an nag-uurog na pagpersegir sa nagdusay na mga lingkod ni Jehova, resulta kan kaanggutan ni Satanas asin pruweba na kita nabubuhay na sa huring mga aldaw kan saiyang maraot na pamamahala sa katawuhan.—Kap. 12:1-12.

⁶ Grabe an kaanggutan ni Satanas huli sa paghulog sa saiya digdi sa daga tapos aram niyang halipot na sana an saiyang panahon. Kaiba an mga demonyo niya, ginigibo niya an gabos para ulangon an paghuhulit kan Kahadian asin rauton an pagkasararo kan mga lingkod ni Jehova. Kaya kaipuhan tang makipaglaban sa espirituwal na paagi, sarong “pakikipaglaban, bako tumang sa dugo asin laman, kundi tumang sa mga gobyerno, tumang sa mga awtoridad, tumang sa mga tagapamahala kan madiklom na kinaban na ini, tumang sa maraot na mga puwersang espiritu sa langitnon na mga lugar.” Tanganing manggana kita na nasa kampi ni Jehova, dai kita dapat pumundo sa pakikipaglaban asin dapat na pirmi tang sulot an satong kumpletong espirituwal na pangalasag. Dapat kitang ‘manindugan tumang sa mga tusong gibo-gibo’ kan Diyablo. (Efe. 6:10-17) Nangangaipo iyan nin pakatagal.

⁷ An pakatagal iyo “an kakayahan na makayanan an kasakitan o problema.” Sa espirituwal na kahulugan, nanunungod iyan sa determinasyon na gibuhon an tama sa ibong nin kasakitan, pagkontra, pagpersegir, o iba pang bagay na makakaraot kan satong integridad sa Diyos. An lambang Kristiyano dapat na magkaigwa nin pakatagal. Nangangaipo ini nin panahon. An satong kakayahan na makatagal nadadagdagan miyentras na nag-uuswag an satong espirituwalidad. Kun natagalan ta an saradit na pagbalo sa pagtubod kaidtong nagpupuon pa sana kita bilang Kristiyano, mas makakaya tang tagalan an mas masakit na mga pagbalo na siguradong maabot. (Luc. 16:10) Dai ta na paghalaton pang umabot an darakulang pagbalo bago kita magin determinadong manindugan sa pagtubod. Ngunyan pa sana, dapat na magin determinado na kita. Para iduon na kaipuhan na magkaigwa nin pakatagal pati na kan iba pang diyosnon na kuwalidad, isinurat ni apostol Pedro: “Gibuhon nindo an gabos na paghihinguwa na maidagdag sa saindong pagtubod an karahayan, sa saindong karahayan an kaaraman, sa saindong kaaraman an pagpupugol sa sadiri, sa saindong pagpupugol sa sadiri an pakatagal, sa saindong pakatagal an debosyon sa Diyos, sa saindong debosyon sa Diyos an pagkamuot sa mga tugang, sa saindong pagkamuot sa mga tugang an pagkamuot sa gabos.”—2 Ped. 1:5-7; 1 Tim. 6:11.

⁸ Idinuon man ni Santiago an kahalagahan kan pakatagal kan siya magsurat: “Mga tugang, ibilang nanggad nindong kaugmahan pag napapaatubang kamo sa lain-lain na pagbalo, huling siring kan aram nindo, an saindong pagtubod na nabalo sa arog kaining paagi nagbubunga nin pakatagal. Alagad pabayaan nindo na mautob kan pakatagal an katuyuhan kaiyan, na sa siring kamo magin lubos asin makusog sa gabos na bagay, na dai nagkukulang nin ano man.” (Sant. 1:2-4) Uyon ki Santiago, dapat asahan na kan mga Kristiyano an mga pagbalo asin akuon iyan na may kaugmahan huling tinatabangan kita kaiyan na makanuod na magtagal. Arog man daw kaiyan an sabuot mo? Dangan, ipinahiling ni Santiago na pag nagtatagal kita, nalulubos an satong Kristiyanong personalidad asin nagigin lubos na akseptable kita sa Diyos. Iyo, nadadagdagan an satong pakatagal pag napapaatubang kita sa mga pagbalo asin nakakayanan ta iyan. Asin paagi sa pakatagal, nagkakaigwa man kita kan iba pang marahayon na mga kuwalidad na kaipuhan ta.

⁹ Nauugma si Jehova sa satong pakatagal kaya tatawan niya kita nin balos na buhay na daing katapusan. Sinabi pa ni Santiago: “Maugma an tawo na padagos na nagtatagal nin pagbalo, huli ta pag siya inuyunan nin Diyos aakuon niya an korona nin buhay, na ipinanuga ni Jehova sa mga danay na namumuot sa Saiya.” (Sant. 1:12) Iyo, nagtatagal kita dahil buhay an nakataya. Kun mayo kitang pakatagal, dai kita makakapagdanay sa katotoohan. Kun mapadara kita sa mga panggigipit, mabubutong kita pabalik sa kinaban. Kun mayo kitang pakatagal, mawawara sa sato an espiritu ni Jehova asin dai ta maipapahiling sa satong buhay an mga kuwalidad na bunga kaiyan.

¹⁰ Tanganing padagos kitang makatagal sa masakit na mga panahon na ini, kaipuhan na magkaigwa kita nin tamang sabuot manungod sa pagsakit bilang mga Kristiyano. Girumdumon an surat ni Santiago: “Mag-ugma nanggad kamo.” Puwedeng bako iyan madali, lalo na kun may minamating kulog o iniisip na grabeng problema. Pero tandaan na nakataya diyan an buhay mo sa maabot na panahon. Makakatabang sa sato an eksperyensiya kan mga apostol para masabutan kun paano kita makakapag-ugma dawa nagsasakit. Mababasa iyan sa libro nin Gibo na nagsasabi: “Ipinaapod ninda an mga apostol, ipinahampak an mga ini saka pinagbutan na pumundo na sa pagtaram manungod sa ngaran ni Jesus, dangan tinugutan nindang makahali an mga ini. Kaya nagluwas sinda sa Sanhedrin na nag-uugma, dahil para sa sainda sarong pribilehiyo an mag-agi nin kasusupgan alang-alang sa ngaran ni Jesus.” (Gibo 5:40, 41) Nasabutan ninda na an saindang pagsakit pruweba na sinda nagin makinuyog sa pagbuot ni Jesus asin na inuuyunan sinda ni Jehova. Pakalihis nin dakul na taon, kan ginigibo ni Pedro an inot na surat na ipinasabong sa saiya, ipinaliwanag niya an kahalagahan kan siring na pagsakit alang-alang sa katanusan.—1 Ped. 4:12-16.

¹¹ Yaon man an eksperyensiya ni Pablo asin Silas. Kan naglilingkod sinda bilang mga misyonero sa Filipos, inarestar sinda asin inakusaran na nagpaparibok daa sa siyudad saka nagpapalakop nin ilegal na mga kaugalian. Dahil diyan, binugbog sinda asin iprineso. Sinasabi sa sato kan Bibliya na “kan kamatangaan na nin banggi,” mantang nasa presuhan pa si Pablo asin Silas asin dai pa nabubulong an saindang mga lugad, “namimibi [sinda] saka nag-aawit nin pag-umaw sa Diyos, asin nagdadangog sa sainda an mga preso.” (Gibo 16:16-25) Tama nanggad an nagin pagmansay ni Pablo asin kan kaiba niya na an mga pagsakit ninda huli ki Cristo bako sanang patunay kan saindang integridad sa atubangan nin Diyos asin nin mga tawo kundi saro man iyan na oportunidad na urog pang makapagpatotoo sa mga tibaad gustong magdangog sa maugmang bareta. Kalabot an buhay kan iba. Kan mismong bangging idto, an bantay sa presuhan saka an mga kairiba niya sa harong nagdangog asin nagin mga disipulo. (Gibo 16:26-34) Si Pablo asin Silas nagtiwala ki Jehova, sa saiyang kapangyarihan, asin sa saiyang pagmawot na tabangan sinda sa panahon nin kasakitan. Nangyari an inaasahan ninda.

¹² Ngunyan, itinatao man ni Jehova an gabos na kaipuhan ta para tabangan kita sa mga panahon nin pagbalo. Gusto niyang makatagal kita. Itinao niya sa sato an saiyang ipinasabong na Tataramon para tawan kita nin tamang kaaraman manungod sa katuyuhan niya. Pinapakusog kaiyan an pagtubod ta. May oportunidad kitang makaiba-iba an satong mga kapagtubod asin maggibo nin sagradong paglilingkod. May pribilehiyo man kitang magdanay na harani ki Jehova paagi sa pamibi. Nagdadangog siya sa satong mga kapahayagan nin pag-umaw asin sa satong pakimahirak na tabangan kitang magdanay na may malinig na kamugtakan sa atubangan niya. (Fil. 4:13) Asin dai man paglingawan kun paano kita napapakusog pag hinuhurop-hurop ta an paglaom na itinao sa sato.—Mat. 24:13; Heb. 6:18; Kap. 21:1-4.

¹³ An mga pagbalo na inaagihan ta ngunyan kapareho nanggad kan inagihan kan inot na mga disipulo ni Jesu-Cristo. An mga Saksi ni Jehova sa ngunyan nakakaeksperyensiya nin berbal asin pisikal na pang-aabuso gibo kan mga nagkokontra na nadaya nin salang impormasyon manungod sa sato. Arog kan panahon kan mga apostol, an promotor kan kadaklan na pagkontra iyo an mga panatiko sa relihiyon na an palsong mga katukduan asin gibo ibinubuyagyag sa Tataramon nin Diyos. (Gibo 17:5-9, 13) Kun minsan, an mga lingkod ni Jehova nakakakua nin tabang paagi sa pagpetisyon sa korte na midbidon an legal na mga deretso ninda na ginagarantiyahan kan mga gobyerno. (Gibo 22:25; 25:11) Pero may mga tagapamahala man na nagpapautob nin opisyal na pagbabawal sa gibuhon ta sa paghihinguwang papunduhon an satong ministeryo. (Sal. 2:1-3) Sa arog kaiyan na mga sitwasyon, pusuan tang inaarog an maimbod na mga apostol, na nagsarabi: “An Diyos an dapat niyamong sunudon bilang tagapamahala imbes na an mga tawo.”—Gibo 5:29.

¹⁴ Miyentras na nagkukusog an nasyonalismo sa bilog na kinaban, lalo man na ginigipit an mga parahulit kan maugmang bareta na ipundo na an saindang ministeryo na ipinagibo sa sainda nin Diyos. Kaya mas lubos na napapahalagahan kan gabos na lingkod nin Diyos an patanid na yaon sa Kapahayagan 14:9-12 manungod sa pagsamba sa “mabangis na hayop asin sa imahen kaiyan.” Nasasabutan ta an kahulugan kan sinabi ni Juan: “Digdi kaipuhan an pakatagal sa parte kan mga banal, idtong mga nag-uutob kan mga tugon nin Diyos asin nangangapot sa pagtubod ninda ki Jesus.”

¹⁵ Pag may mga pagbalo dahil sa mga giyera, rebolusyon, o direktang pagpersegir asin opisyal na mga pagbabawal, tibaad dai mo na magibo nin hayagan an Kristiyanong pagsamba. Tibaad dai na puwedeng magtiripon bilang kongregasyon. Tibaad dai na makontak an sangang opisina. Tibaad dai makadalaw an mga paraataman nin sirkito. Tibaad wara nang mag-abot na mga publikasyon. Kun mangyari an arin man sa mga ini, ano an dapat mong gibuhon?

¹⁶ An simbag, gibuhon an ano man na magigibo mo asin an pinakamakakaya mo depende sa saimong sitwasyon. Siguradong magigibo mo na mag-adal nin solo. Sa parati, puwedeng magtiripon sa harong an sadit na mga grupo. Puwedeng gamiton sa mga pagtiripon na iyan an mga publikasyon na pinag-adalan na kaidto asin an Bibliya mismo. Daing gayo mahadit o matakot. Sa parati, nakakagibo tulos nin paagi an Namamahalang Grupo para makontak an responsableng mga brother.

¹⁷ Dawa pa mapasuway ka sa gabos mong tugang na Kristiyano, tandaan na dai ka mapapasuway ki Jehova asin sa saiyang Aki, si Jesu-Cristo. Dai mawawara an saimong paglaom. Madadangog pa man giraray ni Jehova an mga pamibi mo, asin puwede ka niyang pakusugon paagi sa saiyang espiritu. Hagadon an paggiya niya. Girumdumon na lingkod ka ni Jehova asin disipulo ni Jesu-Cristo. Kaya kun may oportunidad, magpatotoo ka. Bebendisyunan ni Jehova an mga paghihinguwa mo, asin posible pa nganing may mga umiba sa saimo sa tunay na pagsamba.—Gibo 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Pero, kun mapaatubang ka talaga sa huma nin kagadanan, arog kan nangyari sa mga apostol asin iba pa, magtiwala sa “Diyos na nagbabangon kan mga gadan.” (2 Cor. 1:8-10) An pagtubod mo sa pagkabuhay liwat makakatabang saimo na matagalan dawa an pinakagrabeng pagkontra. (Luc. 21:19) Si Cristo Jesus an ehemplo niyato; aram niya na an kaimbudan niya sa ibong nin pagbalo makakapakusog sa iba na magtagal. Kun aarugon mo siya, mapapakusog mo man an mga tugang.—Juan 16:33; Heb. 12:2, 3; 1 Ped. 2:21.

¹⁹ Apuwera sa pagpersegir asin pagkontra, tibaad kaipuhan mong tagalan an iba pang masakit na sitwasyon. Halimbawa, may mga pinangluluyahan nin buot huli ta dai nagdadangog an mga tawo sa saindang teritoryo. An iba may tinatagalan na pisikal o emosyonal na mga hilang o mga limitasyon na dara kan bakong perpektong hawak niyato. Kinaipuhan man ni apostol Pablo na tagalan an sarong klase nin pagbalo na nakaulang sa saiya o nagpadipisil kun minsan sa saiyang paglilingkod. (2 Cor. 12:7) Si Epafrodito man, sarong Kristiyano kan inot na siglo na taga Filipos, nakamati nin grabeng kamunduan dahil nabaretaan kan mga amigo niya na nagkahilang siya. (Fil. 2:25-27) An pagigin bakong perpekto niyato asin kan iba puwedeng magin dahilan nin mga problema na mas masakit tagalan. Dahil sa pagkakaiba nin personalidad, puwedeng magkaigwa nin mga dai pagkakasundo an mga Kristiyano o dawa an mga magkakapamilya. Pero makakaya tang tagalan asin mapangganahan an mga iyan kun susunudon ta an konseho kan Tataramon ni Jehova.—Ezeq. 2:3-5; 1 Cor. 9:27; 13:8; Col. 3:12-14; 1 Ped. 4:8.

²⁰ Dapat na pirmi kitang masinunod sa ninombrahan ni Jehova bilang Payo kan kongregasyon, si Jesu-Cristo. (Col. 2:18, 19) Kaipuhan na makipagtabangan kita sa “maimbod asin mapagmansay na uripon” saka sa mga pignombrahan bilang paraataman. (Heb. 13:7, 17) Kun susunudon ta an teokratikong mga areglo asin makikikooperar kita sa mga nanginginot, magigin organisado kita sa paggibo kan kabutan ni Jehova. Dapat na pirmi kitang mamibi. Tandaan na maski an mga lanob nin presuhan o bartolina dai kayang putulon an komunikasyon ta sa satong mamumuton na Ama sa langit o ulangon an pagkasararo niyato kan satong mga kapagtubod.

²¹ May determinasyon asin pakatagal, gibuhon ta an bilog tang makakaya na isagibo an pagbuot sa sato na maghulit; magin matiyaga sa gibuhon na ipinagbuot kan binuhay liwat na si Jesu-Cristo sa mga parasunod niya: “Padumán kamo asin gumibo kamo nin mga disipulo sa mga tawo kan gabos na nasyon, na binabawtismuhan sinda sa ngaran kan Ama asin kan Aki asin kan banal na espiritu, na tinutukduan sinda na utubon an gabos na bagay na ipinagbuot ko sa saindo.” (Mat. 28:19, 20) Arog ni Jesus, magtagal kita. Lugod na pirming malinaw sa satong isip an paglaom sa Kahadian asin an buhay na daing katapusan. (Heb. 12:2) Bilang bawtisadong mga disipulo ni Cristo, may pribilehiyo kitang magpartisipar sa kautuban kan hula ni Jesus mapadapit sa “pagtatapos kan sistema nin mga bagay.” Sinabi niya: “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.” (Mat. 24:3, 14) Kun bilog na puso kitang mapartisipar sa gibuhon na iyan sa panahon na ini, mauugma kitang mabuhay nin daing sagkod sa matanos na bagong kinaban ni Jehova!