Dai nin Makakapapundo sa Sainda

Sarong lalaking dai nakakalakaw an aroaldaw na nakatukaw harani sa saro sa mga trangkahan kan templo para makilimos. Sarong hapon, nahiling niya si Pedro saka si Juan na pasiring sa templo. Nagsabi siya sainda: ‘Palimos man tabi.’ Nagsabi si Pedro: ‘May itatao ako saimo na mas mahalaga pa kisa sa kuwarta. Sa ngaran ni Jesus, tumindog ka asin lumakaw!’ Tapos tinabangan siya ni Pedro na makatindog, asin an lalaki nagpuon na maglakaw! Ugmahon an mga tawo sa milagrong ini kaya mas dakul pa an nagturubod.

Pero naanggota an mga saserdote asin mga Saduceo. Dinakop ninda an duwang apostol, dinara sa korte, asin pirit na pinasimbag: ‘Siisay an nagtao saindo nin kapangyarihan para paumayan an lalaking ini?’ Nagsabi si Pedro: ‘Nag-ako kami nin kapangyarihan hali ki Jesu-Cristo, na ginadan nindo.’ Nagkururahaw an mga lider nin relihiyon: ‘Dai na kamo magtaram manungod ki Jesus!’ Pero nagsabi an mga apostol: ‘Dapat kaming magtaram manungod saiya. Dai kami mapundo.’

Pakatapos na palibrehon si Pedro saka si Juan, nagduman tulos sinda sa iba pang mga disipulo asin inistorya an nangyari. Iriba sindang namibi, na nakikiulay ki Jehova: ‘Tabangi po kaming magin makusog an buot tanganing padagos ming magibo an saimong gibuhon.’ Itinao sainda ni Jehova an saiyang banal na espiritu, asin padagos sindang naghulit saka nagpaumay. Nagparadakul pa an mga nagtuturubod. Grabe an pagkauri kan mga Saduceo kaya dinakop ninda asin iprineso an mga apostol. Pero pagkabanggi, nagsugo si Jehova nin anghel, binuksan kaiyan an mga pinto kan presuhan dangan sinabi sa mga apostol: ‘Magbalik kamo sa templo, asin magtukdo kamo duman.’

Kinaagahan mismo, may nagsabi sa Sanhedrin, an korte na an mga miyembro mga lider nin relihiyon: ‘Nakakandado pa an presuhan, pero mayo na an mga lalaking dinakop nindo! Nasa templo sinda, nagtutukdo sa mga tawo!’ Dinakop giraray an mga apostol asin dinara sa Sanhedrin. Nagsabi an halangkaw na saserdote: ‘Pinagbutan mi na baga kamo na dai na magtaram manungod ki Jesus!’ Pero nagsimbag si Pedro: “An Diyos an dapat ming sunudon bilang tagapamahala imbes na an mga tawo.”

Angguton an mga lider nin relihiyon kaya gusto nindang gadanon an mga apostol. Pero an Fariseong si Gamaliel nagtindog tapos nagsabi: ‘Mag-ingat kamo! Posibleng sinusurog nin Diyos an mga lalaking ini. Gusto daw talaga nindong kalabanon an Diyos?’ Sinunod ninda an sinabi niya. Pagkatapos na pagparabadulan an mga apostol, pinagbutan ninda giraray sinda na magpundo na sa paghuhulit, tapos binutasan na sinda. Pero dai kaiyan napapundo an mga apostol. Nagpadagos sindang maghulit kan maugmang bareta na may kusog nin buot, sa templo asin sa mga harong.